Afsəddin Nəbiyev: “Hərbi-texniki əməkdaşlıq və təhlükəsizlik sahəsindəki koordinasiya regionda sabitliyin ən böyük qarantıdır”
Təşkilatımızın gələcək inkişafı ilə bağlı növbəti addımlar atılacaq. Bu barədə Prezident İlham Əliyev Türk Dövlətləri Təşkilatına üzv dövlətlərin hökumət başçılarının/Vitse-prezidentinin görüşünün iştirakçılarını qəbul edərkən bildirib.
“Bu gün Türk Dövlətləri Təşkilatı dünya miqyasında böyük nüfuz qazanmışdır və bizim beynəlxalq mövqelərimiz möhkəmlənir”, - deyən dövlət başçısı vurğulayıb ki, həm bölgədə gedən proseslərə bizim təsir imkanlarımız artır, eyni zamanda, qlobal müstəvidə də təşkilatımızın rolu artmaqdadır və biz müştərək səylərlə mövqelərimizi möhkəmləndirməliyik.
Bütün bunlar TDT-nin bölgədə gedən proseslərə necə təsir göstərdiyini və getdikcə bunun artdığını göstərir. TDT İran müharibəsində təsirli rol oynamağa, regionda sabitliyin təmin edilməsinə çalışır.
Sözügedən məsələni baki-xeber.com-a şərh edən AMİP-in sədr müavini Afsəddin Nəbiyevin fikrincə, qarmaqarışıq ziddiyyətlərlə dolu olan münaqişələrin geniş yayıldığı, müasir beynəlxalq münasibətlər sistemində yeni güc mərkəzlərinin formalaşdığı bir dövrdə TDT özünün qızıl dövrünə qədəm qoyur: “Prezident İlham Əliyevin "Bizim ailəmiz Türk dünyasıdır" kəlamı bu dövrümüzdə diplomatik bəyanat deyil, həm də milyardlarla dollarlıq iqtisadi layihələrin, nəhəng geosiyasi dəhlizlərin və mənəvi birliyin təməl fəlsəfəsidir. Bu ifadənin digər türk dövlətlərinin rəhbərləri tərəfindən də mənimsənilməsi, təşkilatın artıq vahid bir orqanizm kimi hərəkət etdiyinin ən bariz göstəricisidir. TDT-ni digər beynəlxalq bloklardan fərqləndirən ən böyük üstünlük onun dil, ortaq tarix, mədəniyyət və coğrafi yaxınlıq üzərində qurulmasıdır. Adriatik dənizindən Altay dağlarına qədər uzanan bu coğrafiya, ortaq mədəniyyətləri ilə bir-birinə bağlanıb. Azərbaycan İranda gedən müharibə fonunda, Şərqlə Qərb arasında əsas logistika mərkəzidir”.
Sədr müavini hesab edir ki, dövlət başçıları səviyyəsində qurulan səmimi dialoq, ölkələrimiz arasında ən həssas məsələlərdə belə ortaq məxrəcə gəlməyə imkan verir: “Məhz bu amil təşkilatın güclənməsinə böyük təkan verir.Ortaq əlifba layihələri, media platformaları və təhsil mübadiləsi proqramları gələcək nəsillərin bir-birini tərcüməsiz anlamasını təmin edəcəyi heç bir şübhə doğurmur. İqtisadiyyat hər bir birliyin onurğa sütunudur. TDT çərçivəsində atılan addımlar göstərir ki, siyasi birlik artıq real kapitala çevrilir. İnvestisiya fondları bu məqsədlə yaradılıb. Bu fondun yaradılması üzv dövlətlər arasında maliyyə asılılığını azaldır və daxili layihələrin öz resurslarımız hesabına reallaşmasına şərait yaradır. Bu da xüsusilə infrastruktur və texnologiya sahəsində sıçrayış deməkdir. Gömrük prosedurlarının rəqəmsallaşdırılması və "Yaşıl Dəhliz" layihələri nəticəsində ölkələrimiz arasındakı ticarət həcmi durmadan artır. Biz artıq bir-birimiz üçün sadəcə qonşu deyil, əsas strateji ticarət tərəfdaşlarıq. Prezident İlham Əliyevin qeyd etdiyi kimi, TDT-nin beynəlxalq mövqeləri ildən-ilə möhkəmlənir. Bu gün bu təşkilatın rəyi olmadan regionda hər hansı irimiqyaslı layihənin həyata keçirilməsi qeyri-mümkündür. Şərq-Qərb nəqliyyat dəhlizinin (Orta Dəhliz) mərkəzində dayanan Türk dünyası, qlobal təchizat zəncirinin qırılmaz halqasına çevrilib. Üzv dövlətlər arasında hərbi-texniki əməkdaşlıq və təhlükəsizlik sahəsindəki koordinasiya regionda sabitliyin ən böyük qarantıdır. Təşkilatın gələcək addımları "Türk Dünyası 2040 Vizyonu" sənədinə uyğun olaraq daha da konkretləşəcək. Elektron ticarət və innovasiya sahəsində ortaq standartların tətbiqi, enerji təhlükəsizliyi, Xəzər resurslarının dünya bazarına çıxarılmasında vahid tarif və tranzit siyasəti təşkilatın "onurğa sütunu" hesab olunur. Türk dünyasının öz elmi və texnoloji mərkəzlərinin formalaşdırılması bu dövrün qaçılmaz tələbidir. Türk Dövlətləri Təşkilatı bu gün dünyanın yeni geosiyasi xəritəsində parlayan bir ulduzdur. Prezident İlham Əliyevin və digər türk liderlərinin həmrəyliyi sayəsində "Türk ailəsi" XXI əsrin ən nüfuzlu güc mərkəzlərindən biri olmaq yolunda inamla irəliləyir. Bu birlik təkcə keçmişimizə olan hörmət deyil, həm də gələcək nəsillərimiz üçün qoyulan ən böyük mirasdır”.
Vidadi ORDAHALLI
