Xəyal Bəşirov: “Azərbaycan hüquq-mühafizə orqanlarında bununla bağlı təkzib olunmaz sübutlar və dəlillər olarsa...”
Epşteyn fayllarının açılması bütün dünyanı yerindən oynadıb. Elə bir ölkə yoxdur ki, oradan hansısa şəxslərin adı Epşteyn fayllarında əks olunmasın. Bir sıra ölkələrdə Epşteyn fayllarında adı keçən siyasətçilər, diplomatlar barədə ya cinayət işi açılıb, ya araşdırma başladılıb. Məsələn, Norveçin maliyyə nazirinə qarşı, eləcə də Norveçdə keçmiş baş nazir və Avropa Şurasının keçmiş baş katibi Torbyorn Yaqland barəsində korrupsiya və Epşteyn işi üzrə şübhə altında istintaq başlanılıb. Amerikanın özündə bu yöndə proses gedir, bəzi hallarda cinayət işi açıblar, bəzi yerdə araşdırma aparırlar. Azərbaycanın da bəzi şəxslərinin adı o fayllar da keçir, aralarında deputatlar da, keçmiş və indiki məmurlar da var.
Azərbaycanda adı Epşteyn fayllarında keçən şəxslərlə bağlı araşdırma başlatmaq mümkündürmü? Ümumiyyətlə, bu lazımdırmı?
Siyasi və Hüquqi Araşdırmalar Mərkəzinin rəhbəri Xəyal Bəşirov baki-xeber.com-a bildirdi ki, Epşteyn faylları ilə bağlı məlumatlar artıq bütün dünyanın diqqətindədir, burada çox ciddi ittihamlardan söhbət gedir. “Epşteyn fayllarında adı keçən və dünyanın ayrı-ayrı dövlətlərinin siyasi liderləri, dövlət adamları, diplomatları, mədəniyyət sahəsində olan aparıcı şəxsləri ilə bağlı bu ittihamlar həqiqəti əks etdirəcəksə o halda bu əsrin cinayəti hesab oluna bilər. Səsləndirən ittihamlar nə dərəcədə həqiqəti əks etdirir, onlarla əlaqələr real sübutlar, dəlillər varmı, yoxdumu kimi məsələlər ciddi suallar doğurur. ABŞ-ın baş prokuroru da 300-dən artıq tanınmış siyasətçinin, digər sahələr üzvə məşhur şəxslərin, o cümlədən, özünün də adının olduğu bir siyahını ABŞ-ın Ədliyyə Nazirliyinə göndərib. Yəni bu fayllarda adı çəkilən şəxslərin hamısının o prosesdə hansı səviyyədə iştirak etməsi, baş verən cinayətlərdə onların payının nə qədər olması ilə bağlı suallar var. Bu reallığı əks etdirirsə bu istiqamətdə ciddi araşdırmalar aparılmalıdır. Təbii ki, cinayətlərdə bu və digər formada iştirak ediblərsə o halda kimliyindən, tutduğu vəzifədən asılı olmayaraq bütün şəxslər məsuliyyətə cəlb edilməlidilər. O şəxslərin ayrı-ayrı dövlətlərin ərazisində yaşalar belə bu onların mühakimə olunmasına maneçilik törətmir.
Faktlar varsa fakta görə cinayət işi açıla bilər. Bu Azərbaycan Cinayət Prosesual Qanunvericiliyində də belədir”.
X.Bəşirovun sözlərinə görə, əgər o şəxslərlə bağlı ABŞ da cinayət işi başlanırsa, o halda ayrı-ayrı dövlətlərin vətəndaşlarının və yaxud vəzifəli şəxslərinin o cinayətlərdə iştirakı varsa bununla bağlı tədbir görülməlidir. O, vurğuladı ki, Azərbaycanda da bu istiqamətdə araşdırmaların başladılması vacibdir. “Bu Azərbaycana da aiddir. Onlar o şəxslərlə bağlı cinayət işi başlamasalar belə Azərbaycan hüquq mühafizə orqanlarında bununla bağlı təkzib olunmaz sübutlar və dəlillər olarsa biz özümüz həmin o şəxslərin məsuliyyətə cəlb olunması üçün addımlar ata bilərik. Çünki adı çəkilən o cinayətlər Azərbaycan qanunvericiliyində də ən ağır cinayətlərdən hesab olunur”-deyə X.Bəşirov qeyd etdi.
O, vurğuladı ki, həmin cinayət əməllərinə görə, Azərbaycan qanunvericiliyi də məsuliyyət tələb edir. X.Bəşirovun sözlərinə görə, araşdırma aparılır, cinayət işi başlanır və şəxslərlə bağlı müvafiq tədbirlər görülür. “Əgər söhbət Azərbaycan vətəndaşlarından gedərsə və onların digər dövlətlərə verilməsi məsələsinə gəlincə, Azərbaycan Konstitutsiyasına görə, onların Azərbaycan ərazisində mühakimə edilməsi, məsuliyyətə cəlb olunması istisna deyil. Epşteyin faylları ilə bağlı araşdırmalar aparılır...Bu uzun müddət davam edəcək. Bu fayllarda adları keçən Azərbaycanın vəzifəli şəxslərinin o prosesdə bu və ya digər şəkildə iştirakı, məsuliyyət yaradan addımları olubsa onların da məsuliyyətə cəlb edilməsi ilə bağlı addımlar atılacaq. Bu addım atılmalıdır. Burada söhbət hansı ölkənin ərazisində baş verməsindən aslı olmayaraq bütün dünyada ən ağır cinayət hesab olunan əməllərdən gedir. Bu cinayətdə iştirak edən şəxslər dünyanın harasında, o cümlədən də Azərbaycanda olmasından aslı olmayaraq onların məsuliyyətə cəlb olunması zərurudir”-deyə X.Bəşirov qeyd etdi.
İradə SARIYEVA
