Günlərdir ki, ölkə Ramiz Mehdiyevin evindən çıxmış 17 milyon dollar çirkli puldan danışır. Hələ bu hamısı deyil... Əmlaklar, səhmlər, Rusiya banklarında depozitlər, hədiyyə verilmiş qızıl-brilyantlar… qabaqda nələrsə də var. Sözüm bu deyil…
Mehdiyevin 17 milyon pulu haqda bu gün bəziləri özündən müştəbeh, "dahiyanə əda" ilə elə təkliflər verir ki, adamın "əli üzündə qalır"… Biri deyir ayrıca qanun qəbul olunsun, belə pullar təhsilin, mədəniyyətin dirçəldilməsinə yönəldilsin, biri deyir pensiyaların artımına yönəldilsin, o biri deyir evsizlərə ev verilsin və sair…
Bu deyilən sahələrin hər birinin sözsüz ki, əlavə dəstəyə ehtiyacı var... Ancaq bu pullar yəqin ki, başbilənlərin məsləhət bildiyi istiqamətlərə yönəldiləcək, büdcəyə qaytarılacaq və sair… Ancaq təkliflər bəzən elə adamlardan gəlir ki, tutub yaxasından soruşmaq istəyirsən ki, Mehdiyevkimilər bu cinayətləri törədəndə sən nüfuzundan, ictimai statusundan istifadə edərək niyə bir dəfə səsini çıxarmadın, niyə bircə cümlə yazıb demədin ki, Mehdiyevkimilərin əməlləri nəticəsində evlərdə kağız qutularda "çirkli milyonlar" yığılır... Axı Mehdiyev və onunkimilər bu pulları bir dəfəliyə qazanmayıblar, illərlə, anbaan, saatbasaat törədilmiş qanunazidd əməllərin pul şəkli almış formasıdır… Ən pisi odur ki, bu günkü "təklif qəhrəmanları" bəzən daşıdıqları statusun mahiyyətini də sanki anlamırlar və fərqinə varmırlar ki, Mehdiyev bəlli vəzifədə otururkən şair, yazıçı, ictimai, siyasi xadimlər onun barəsində açıq və cəsarətli danışa bilsəydilər, iş gəlib evlərdən çıxan milyonlarla “çirkli pul” həddinə çatmazdı… Hələ onu demirəm ki, Mehdiyevin və mehdiyevçilərin əməlləri üzündən minlərlə ləyaqətli və təmiz insanın həyatını alt-üst olmaqdan xilas etmək olardı... İş-işdən keçəndən sonra özlərini "post-faktum qəhrəman” və ya müdrik vətənsevərlər kimi göstərməyə çalışırlar... Mehdiyevinki cinayətdir, buna şübhə ola bilməz, onu görüb susanlarınkı isə qəbahətdir... Cinayətə tay qəbahət...
Ayıbdır, vallah...
Zamanında Mehdiyevin qılıncından, bütün ölkə boyu yaratdığı şantajçı, qisasçı dəstədən qorxmadan sözünü deyənlər var idi axı…
Yeri deyil, yoxsa bir neçə konkret adlar çəkərdim…
Aydın QULİYEV
