Qulamhüseyn Əlibəyli: “Rusiya bundan sonra məhz Azərbaycana daha da aqressiv münasibət göstərəcək”
Məlum olduğu kimi, Dövlət Təhlükəsizliyi Xidməti Ramiz Mehdiyev, Əli Kərimli və bir neçə digər şəxs barəsində cinayət işi ilə bağlı məlumat yayıb.
Bildirilib ki, onlar xarici xüsusi xidmət orqanları ilə əlaqədə olaraq hakimiyyətin zorla ələ keçirilməsinə və konstitusiya quruluşunun dəyişdirilməsinə cəhd etməkdə şübhəli bilinirlər. İttihama görə, 2013-cü il prezident seçkiləri ərəfəsində yaradılmış “Milli Şura” və “Milyarderlər İttifaqı” çərçivəsində xaricdən maliyyə və təşkilati dəstək alınıb. Həmin vəsaitlərin kütləvi iğtişaşların təşkili və siyasi sabitliyin pozulmasına yönəldildiyi iddia olunur. Eyni zamanda, bəzi şəxslərin xarici dövlət nümayəndələri ilə gizli danışıqlar apardığı və qarşılıqlı razılaşmalar əldə etdiyi qeyd edilir. Ramiz Mehdiyevin 2025-ci ildə xarici tərəflərə dövlət idarəçiliyi ilə bağlı sənəd göndərdiyi və dövlətə xəyanətdə ittiham olunduğu açıqlanıb. Ona həmçinin cinayət yolu ilə əldə edilmiş böyük məbləğdə vəsaiti leqallaşdırmaq ittihamı irəli sürülüb.
Maraqlıdır, rəsmi ittihamda Mehdiyevlə bağlı xüsusatlar və faktlar bundan sonra Azərbaycan-Rusiya siyasi münasibətlərinə təsir edəcəkmi? Çünki ittihamlarda açıq deyilməsə də, söhbət məhz Rusiya xüsusi xidmət orqanları ilə əlaqələrdən gedir.
Sözügedən məsələni baki-xeber.com-a şərh edən sabiq millət vəkili, hüquqşünas Qulamhüseyn Əlibəylinin fikrincə, Ramiz Mehdiyev və digərləri ilə bağlı açıqlanan faktlar çox ciddi məqamlardan xəbər verir: “DTX-nın müəyyən etdiyi və yaxud da irəli sürdüyü arqumentlər Rusiya-Azərbaycan münasibətlərinə çox əhəmiyyətli təsir göstərməyəcək. Çünki Azərbaycan üçün Rusiya ilə münasibətlər konkret şəxslər üzərində qurulmayıb. Düzdür, vaxtilə Mehdiyevin əlaqələrinin əhəmiyyəti olub. Ancaq indi Rusiyanın Azərbaycana Mehdiyev və yaxud da başqaları ilə təsir göstərmək imkanı demək olar yoxdur. Ola bilsin Mehdiyev istəyər Rusiyanın köməyinə arxalansın. Ancaq Rusiyanın hakim dairələri başa düşürlər ki, onların Ermənistanda olduğu kimi, Azərbaycanda güclü dayaqları yoxdur. Bunu çox gözəl başa düşürlər. Ona görə də çalışırlar ki, Azərbaycana təsirləri başqa vasitələrlə etsinlər. Birinci növbədə diaspor nümayəndələrinin həbs edilməsi ilə bunu etdilər. Hətta onları öldürməklə buna əl atdılar. Daha sonra azərbaycanlı miqrantları sıxışdırırlar ki, bu, Azərbaycanda sosial gərginlik yaratsın. Bunun əsas səbəbi onunla bağlıdır ki, Azərbaycan çoxdan Rusiyanın orbitindən çıxıb. Həm Qərbmeyilli siyasət yeridir, həm də regionda güc sahibidir. Rusiyanın iştirakı olmadan ərazilərini işğaldan azad edib, suverenliyini təmin edib. Bunu Rusiya Azərbaycana bağışlaya bilmir. Rusiya mediasında tez-tez belə narativlər səslənir ki, Azərbaycanda xüsusi əməliyyatlar keçirilməlidir, Ukraynadan sonra ora diqqət etmək gərəkdir və s. Bu təhdidlərin kökü Azərbaycanın müstəqil siyasəti ilə bağlıdır. Çox güman Azərbaycan bundan sonra da müstəqil siyasətini davam etdirəcək və ABŞ-la strateji əməkdaşlığı genişləndirəcək. Bu, o deməkdir ki, Rusiyanın Azərbaycanda təsir imkanları birdəfəlik kəsilir. Yəqin ki, Rusiya bundan sonra məhz Azərbaycana daha da aqressiv münasibət göstərəcək”.
Vidadi ORDAHALLI
