Firdovsi Şahbazov: “Overçuk nikbin açıqlamalarla çıxış etsə də, Rusiya texniki məsələləri bəhanə edib prosesi uzadacaq”
Rusiyanın Baş nazirinin müavini Aleksey Overçuk bəyan edib ki, Rusiya Ermənistanın Azərbaycan və Türkiyə istiqamətində yerləşən iki dəmir yolu sahəsinin bərpasına dəstək verməyə hazırdır.
Onun sözlərinə görə, Rusiya ümumi uzunluğu təxminən 1,6 km və 12,4 km olan hissələrin bərpası ilə bağlı danışıqlara başlamağa hazırdır. Danışıqlar zamanı layihənin texniki, maliyyə və digər parametrləri müəyyənləşdiriləcək. Həmin sahələrin bərpası Rusiyaya Naxçıvan Muxtar Respublikası ilə birbaşa dəmir yolu əlaqəsi yaratmağa, həmçinin Türkiyə üzərindən Aralıq dənizi limanlarına, eləcə də İran vasitəsilə Fars körfəzi və Hind okeanı limanlarına çıxış əldə etməyə imkan verəcək.
Overçuk onu da qeyd edib ki, bu addım rus mallarının daşınması üçün daha rəqabətli şərait yaradıb və Aİİ-yə üzv dövlətlər arasında qarşılıqlı ticarətin möhkəmlənməsinə töhfə verib.
Sözügedən məsələyə aydınlıq gətirən iqtisad üzrə fəlsəfə doktoru Firdovsi Şahbazov baki-xeber.com-a açıqlamasında bildirdi ki, bu, Rusiyanın tezliklə Ermənistanda dəmir yollarını bərpa edəcəyi anlamına gəlməməlidir: “Bəli, Rusiyanın dəmir yolları ilə bağlı Ermənistan qarşısında müəyyən öhdəlikləri var. Ermənistan rəhbərliyi də bundan çıxış edərək prosesin sürətlənməsi tələbi ilə çıxış edir. Rusiya birbaşa yox deyə bilmir. Çünki o zaman müqavilədən imtina etməlidir və işi başqa tərəf icra etməlidir. Bunu Ermənistan da edə bilər, Qərb də. O zaman Rusiya növbəti dəfə itirən tərəf olar. Ermənistanda təsir imkanları bir qədər də azalacaq. Bu, baş verməsin deyə, Overçuk müəyyən pauzadan sonra bununla bağlı Ermənistana söz verir. Nəzərə alsaq ki, Rusiya Birləşmiş Ştatların Zəngəzur dəhlizinə nəzarət etməsinə qarşıdır, o zaman Ermənistanın digər ərazilərində dəmir yollarını niyə bərpa etsin ki? Məntiqlə bu, Rusiyanın maraqlarına uyğun deyil. Nə olsun Rusiya bu dəmir yollarından istifadə edəcək. O baxımdan hesab edirəm ki, Overçuk nikbin açıqlamalarla çıxış etsə də, Rusiya texniki məsələləri bəhanə edib prosesi uzadacaq. Bərpa üçün on milyonlarla dollar vəsaitə ehtiyac var. Ukraynada müharibə fonunda Rusiyanın bu vəsaiti dəmir yolunun bərpasına yönəldəcəyi real görünmür”.
Vidadi ORDAHALLI
