Əli Mustafa: “Moskva anlayır ki, bu istiqamətdə aparılan işlər ABŞ-Ermənistan münasibətlərini, iqtisadi əlaqələri gücləndirir”
Rusiyanın Xarici İşlər Nazirliyi Ermənistanla nüvə energetikası sahəsində əməkdaşlıq məsələsinə dair sərt mövqe ortaya qoyub.
Sözügedən məsələ ilə bağlı qeyd edilib ki, enerji təhlükəsizliyi mövzusu məsuliyyətsiz yanaşma tələb etmir və bu cür məsələlər “bu gün elan edib, sabah maliyyə toplamaq, o biri gün təməl qoymaq, sonra isə yarımçıq buraxmaq” kimi yanaşmalarla həll edilə bilməz: “Regionun enerji təhlükəsizliyi ayrı-ayrı dövlətlərin daxili qərarı kimi deyil, ümumi maraqlar prizmasından qiymətləndirilməlidir”.
Görünən odur ki, Ermənistanın nüvə sahəsində ABŞ-la əməkdaşlığı Rusiyada ciddi narahatçılığa səbəb olub. Rusiya tərəfi açıq formada ABŞ-ın adını çəkməsə də, bu xəbərdarlıqda Ermənistanla Birləşmiş Ştatlar arasında nüvə sahəsində əməkdaşlığı nəzərdə tutur.
Sözügedən məsələni baki-xeber.com-a şərh edən siyasi ekspert Əli Mustafanın fikrincə, bu, onu göstərir ki, hazırda Rusiya ilə Birləşmiş Ştatlar arasında səssiz bir savaş var: “Bu savaşın baş verdiyi məkanlardan biri də Cənubi Qafqazdır. ABŞ Vitse-prezidenti Cey Di Vensin Azərbaycan və Ermənistanda səfərdə olması, imzalanan sazişlər ciddi məqamlardan xəbər verir. Xüsusən Ermənistanla nüvə energetikası ilə bağlı imzalanan sənədlər Rusiyanı narahat edir. Üstəlik, Rusiya mediası bunu süngü ilə qarşılayır. Düzdür, Rusiya bunu açıq və rəsmi formada Birləşmiş Ştatlara qarşı bir pritenziya kimi səsləndirə bilmir. Çünki Tramla körpüləri yandırmaq istəmirlər. Ancaq Ermənistana qarşı bir formada “zəhərini” göstərir. Buna görə Ermənistanı sərt tənqid edirlər və modul tipli nüvə reaktorların perspektivinin olmadığını bəyan edirlər. Bununla demək istəyirlər ki, enerji təhlükəsizliyi məsələsi sadə məsələ deyil. Anlaşılan odur ki, Rusiya Ermənistanda Metsamor AES-in onun nəzarətindən çıxması və yaxud da ona alternativ kiçik modullu stansiyaların tikilməsi məsələlərində məmnun deyil. Moskva anlayır ki, bu istiqamətdə aparılan işlər ABŞ-Ermənistan münasibətlərini, iqtisadi əlaqələri gücləndirir. Rusiyanın isə bu ölkə üçün aktuallığını azaldır. Rusiyanı bir növ lazımsız bir vəziyyətə gətirir. Ona görə də Rusiya XİN-i belə bir açıqlama ilə çıxış edib. Bunun yalnız Ermənistanın daxili məsələsi olmadığını açıq bəyan edirlər. Bununla Rusiya həm də öz aləmində sanki regionun təəssübkeşi rolunda çıxış edir. Ancaq Ermənistan suveren dövlətdirsə, hansısa dövlətlə əməkdaşlıq barəsində özü qərar verməlidir. Bu günə qədər enerji sahəsində Rusiya ilə əməkdaşlıq edib. Bundan sonra ABŞ və digər dövlətlərlə əməkdaşlıq prioritet ola bilər. Proses də buna doğru gedir”.
Vidadi ORDAHALLI
