Sahil Kərimli: "Azərbaycan Prezidentinin Sülh Şurasının ilk iclasında iştirakından çox böyük gözləntilər var"
ABŞ fevralın 19-da Qəzza Sülh Şurasının ilk iclasını keçirəcək. Hazırda Şuranın tərkibinə 27 üzv daxildir, sədri isə ABŞ prezidenti Donalt Trampdır. BMT Təhlükəsizlik Şurası ona Qəzzada atəşkəs razılaşmasının icrasına nəzarət etmək, habelə idarəetmə və bərpa məsələləri üzərində işləmək səlahiyyəti verib. Qeyd edək ki, Azərbaycan və Ermənistan da Qəzza Sülh Şurasının üzvləri sırasındadır.
Fevralın 19-da Trampın Qəzza üzrə Sülh Şurasının ilk iclasına Azərbaycan Prezidenti İlham Əliyev də dəvət olunub. Rusiya isə birinci iclasda iştirakdan imtina edib. Azərbaycan Prezidentinin Qəzza Sülh Şurasının ilk iclasında iştirakından nə gözlənilir? Ekspertlər nə gözləyir? Nə baş verəcək?
Politoloq Sahil Kərimli baki-xeber.com-a bildirdi ki, ümumiyyətlə Azərbaycan öz siyasətində daim dünyada sülhə və təhlükəsizliyə çox ciddi dəstək verən ölkələrdən biri olub. "Azərbaycan Prezidenti İlham Əliyevin həyata keçirdiyi praqmatik və düşünülmüş xarici siyasət daim öz müsbət bəhrələrini verib və Azərbaycanın bu siyasəti ölkəmizi dünyada sülh və təhlükəsizlik tərəfdarı kimi tanıdıb. Bu baxımdan dünya miqyasında Azərbaycana böyük etimad göstərilir. Əsasən də dünyanın güc mərkəzi olan ABŞ kimi bir dövlətin xüsusən də Tramp hakimiyyəti dövründə Azərbaycana inam və etibarı artıb və möhkəmlənib. Əlbəttə, dünyada sülhün və təhlükəsizliyin əldə olunması istiqamətində Trampın həyata keçirdiyi siyasət və bu siyasətdə Azərbaycanın da xüsusi rol oynaması, bu sahədə Azərbaycanla əməkdaşlıq təqdirəlayiqdir. Qəzza Sülh Şurasında Azərbaycanın da təmsil olunması istiqamətində Trampın təklifi və ölkəmizin bu yöndə verdiyi töhfələr təbiidir ki, əvəzsizdir. Azərbaycan Qəzza Sülh Şurasına qoşulan ilk ölkələrdən biridir və Sülh Şurasının nizamnaməsinə imza atan ilk dövlətlərdəndir. Bu Azərbaycanın yürütdüyü siyasətin dünyada gedən siyasi proseslərə, sülh və təhlükəsizlik istiqamətində görülən işlərə böyük dəstəyinin göstəricisidir".
S.Kərimlinin sözlərinə görə, Trampın həm Cənubi Qafqazda, həm dünyada, xüsusilə də Qəzza bölgəsində sülh yaratmaq istəkləri, bu istiqamətdəki missiyası Azərbaycanın da siyasi kursuna uyğundur. "Fevvarlın 19-da Trampın Qəzza üzrə Sülh Şurasının ilk iclasını təşkil etməsi, bu iclasa Azərbaycan Prezidenti İlham Əliyevin də dəvət olunması dünyada sülhə verilmiş əsas dəstək kimi qiymətləndirilə bilər. Ümumiyyətlə, Azərbaycan Prezidentinin Sülh Şurasının ilk iclasında iştirakından çox böyük gözləntilər var. Çünki Azərbaycan Qəzzada sülhün əldə olunmasına yenə də öz töhfəsini verir. Hesab edirəm ki, artıq dünyada yeni bir səhifə yaranıb, yeni reallıqlar formalaşıb, yeni dünya nizamının yaranması istiqamətində bu gün bir çox cəhdləri görürük, xüsusilə də ABŞ-ın timsalında. Həm Rusiya Ukrayan müharibəsini sonlandılması, həm Yaxın Şərqdə-Qəzzada sülhün əldə olunması, eyni zamanda Cənubi Qafqazda Azərbaycanla Ermənistan arasında sülh müqaviləsinin imzalanması üçün göstərilən səylər, bu istiqamətdə Azərbaycanın sərgilədiyi siyasət artıq öz bəhrəsini verir. Hesab edirəm ki, yaxın dövrlərdə dünyada bir çox istiqamətlərdə sülhlə bağlı qarşıya qoyulmuş hədəf və vəzifələrə çatılacaq"-deyə S.Kərimli qeyd etdi.
İradə SARIYEVA
