Prezident İlham Əliyev bildirib ki, nazirliklər və digər dövlət qurumları özlərinə məxsus ayrıca mobil tətbiqləri tədricən ləğv etməlidirlər. Onun fikrincə, bütün dövlət xidmətləri vahid platforma üzərindən, yəni “mygov” sistemi vasitəsilə təqdim olunmalıdır. Bu yanaşma vətəndaşlar üçün daha rahat, sadə və əlçatan xidmət mühiti yaradacaq. Qeyd olunub ki, vahid sistem üzərindən xidmətlərin göstərilməsi koordinasiyanı gücləndirəcək və idarəetməni daha səmərəli edəcək. Bununla bağlı müvafiq tədbirlər planının hazırlanması və dövlət qurumları arasında inteqrasiyanın artırılması nəzərdə tutulur. “Mygov” platformasının istifadəçi sayı artmaqdadır və elektron xidmətlərin inkişafı istiqamətində işlər davam etdirilir.
Prezident burada rəqəmsallaşma, süni intellekt və kibertəhlükəsizlik üzrə bütün qurumlarda müavin ştatının yaradılmasını təklif etdi. “myGov” sistemindən istifadə çox zəifdir. Cəmi 1,5 milyon nəfər istifadə edir.
Bu sahədə dünya təcrübəsi necədir? Nəyə görə hər qrumun ayrıca tətbiqi olmasın, hamı vahid tətbiq olan “myGov”a gəlsin?
Dünya təcrübəsində əsas tendensiya dövlət xidmətlərinin vahid rəqəmsal platforma üzərindən təqdim olunmasıdır. Bir çox ölkələr “vahid giriş” prinsipi tətbiq edir. Məsələn, Estoniyada dövlət xidmətləri əsasən bir mərkəzi sistem üzərindən göstərilir, Sinqapurda “Singpass”, Böyük Britaniyada isə “GOV.UK” platforması vətəndaşlara müxtəlif qurumların xidmətlərinə bir pəncərədən çıxış imkanı yaradır. Bu model həm istifadəçi rahatlığını artırır, həm də dövlət məlumat bazalarının inteqrasiyasını asanlaşdırır.
Hər qurumun ayrıca tətbiqinin olması ilk baxışda daha çevik görünsə də, bu, bir neçə problem yarada bilər. Vətəndaşlar fərqli xidmətlər üçün müxtəlif tətbiqlər yükləməli, ayrıca qeydiyyatdan keçməli və fərqli interfeyslərlə işləməli olurlar. Bu isə istifadəni çətinləşdirir və rəqəmsal xidmətlərə marağı azalda bilər. Bundan əlavə, ayrı-ayrı tətbiqlərin saxlanması və təhlükəsizliyinin təmin olunması daha çox maliyyə və texniki resurs tələb edir.
Vahid platforma isə məlumatların təhlükəsiz və koordinasiyalı idarə olunmasına, kibertəhlükəsizlik standartlarının mərkəzləşdirilmiş şəkildə tətbiqinə və xidmət keyfiyyətinə vahid nəzarətə imkan verir. Rəqəmsallaşma, süni intellekt və kibertəhlükəsizlik üzrə ayrıca məsul rəhbər şəxslərin təyin edilməsi də bu prosesin daha sistemli və strateji şəkildə idarə olunmasına kömək edə bilər.
“myGov” sistemindən istifadənin zəif olması isə adətən iki əsas səbəblə bağlı olur: ya vətəndaşlar üçün funksionallıq kifayət qədər cəlbedici deyil, ya da maarifləndirmə və istifadə rahatlığı yetərli səviyyədə deyil. Dünya təcrübəsi göstərir ki, vahid platforma yalnız texniki olaraq deyil, istifadəçi təcrübəsi baxımından da sadə, sürətli və etibarlı olduqda geniş yayılır.
Akif NƏSİRLİ
