Ermənistan ABŞ-ın rəhbərliyi ilə 13 milyard dolları keçə biləcək investisiya dalğasına hazırlaşır. Bu, ölkənin illik iqtisadi inkişafını təxminən ikiqat artıracaq və Rusiyadan uzun müddətdir asılılığını zəiflədəcək.
Bloomberg agentliyi yazır ki, ABŞ-ın vitse-prezidenti C.D.Vensin bu həftə Ermənistana səfəri və 9 milyard dollarlıq mülki enerji tərəfdaşlığı imzalaması Vaşinqtonun bu kiçik keçmiş sovet respublikası ilə əlaqələrinin potensial olaraq dramatik şəkildə dərinləşməsini göstərir.
4 milyard dollarlıq süni intellekt layihəsinin ayrıca genişləndirilməsi də Ermənistanın 27 milyard dollarlıq iqtisadiyyatının perspektivini dəyişdirməyə kömək edə bilər.
“Bloomberg” yazır ki, Ermənistanla bağlanan müqavilələr və Vensin ertəsi gün qonşu Azərbaycana səfəri Moskvanın onilliklərdir möhkəm saxladığı Çini Orta Asiya vasitəsilə Avropaya bağlayan həyati əhəmiyyətli ticarət və enerji dəhlizi olan Qafqaz bölgəsində təsir uğrunda geosiyasi mübarizənin gücləndiyini göstərir.
Bunlar ABŞ prezidenti Donald Trampın ötən ilin avqust ayında Ağ Evdə Ermənistanın Baş naziri Nikol Paşinyanı və Azərbaycan lideri İlham Əliyevi Dağlıq Qarabağ bölgəsində onilliklər boyu davam edən münaqişəyə son qoyan ilkin sülh sazişini imzalamaq üçün qəbul etməsindən sonra baş verib. Bu sazişə "Beynəlxalq Sülh və Rifah üçün Tramp Yolu"nun - Azərbaycanı Ermənistan vasitəsilə Naxçıvanla birləşdirən nəqliyyat dəhlizinin açılması planı da daxildir.
"Azərbaycanla müdafiə sazişi olan Türkiyə 1993-cü ildən bəri bağlı olan Ermənistanla sərhədini açmağa və Sovet İttifaqının dağılmasından bəri ilk dəfə diplomatik münasibətlər qurmağa hazırlaşır. Avropa İttifaqı həmçinin, hazırda Rusiyanın rəhbərlik etdiyi gömrük blokunun bir hissəsi olmasına baxmayaraq, AB-yə üzv olmaq planlarını açıqlayan Ermənistanla əlaqələrini gücləndirir” – deyə nəşr yazır.
Qeyd edilir ki, nüvə əməkdaşlığı müqaviləsi Amerika şirkətlərinə Ermənistana nüvə texnologiyaları ixrac etmək və ölkənin təxminən 3 milyon əhalisini elektrik enerjisinin təxminən 40%-ni təmin edən Sovet dövründən qalma Metsamor Atom Elektrik Stansiyasını əvəz etmək üçün rəqabətə şərait yaradacaq hüquqi çərçivə yaradır. Metsamor Rusiyanın dövlətə məxsus “Rosatom” korporasiyası tərəfindən idarə olunur. Vansın səfəri ərəfəsində “Rosatom” nümayəndələri Moskvada Ermənistan liderləri ilə görüşərək yeni nüvə potensialının yaradılması üçün "hərtərəfli əməkdaşlıq" təklif ediblər.
Ümumilikdə, 13 milyard dollar dəyərində potensial layihələr Ermənistana əvvəlki xarici investisiyalardan daha çoxdur. Bütün bunlar 7 iyunda keçiriləcək parlament seçkilərindən əvvəl Paşinyanın əlini gücləndirir.
TAHİR
