Ramiz Mehdiyev məsələsi yenidən Azərbaycan daxili siyasətinin ən kəskin və ən çox müzakirə olunan mövzularından birinə çevrilib. Bu keçmiş yüksək vəzifəli dövlət xadimi – Prezident Administrasiyasının uzun illər rəhbəri və dövlət idarəçiliyində mərkəzi rol oynamış şəxs barəsində çoxsaylı ittihamlar səsləndirilir. Artıq bu xüsusda rəsmi açıqlamalar da verilir.
Xatırladaq ki, 2025-ci ilin oktyabr ayında Ramiz Mehdiyev barəsində cinayət işi açılıb və o, ağır ittihamlarla məsuliyyətə cəlb edilib. Ona qarşı irəli sürülən əsas ittihamlar arasında dövlət hakimiyyətini zorla ələ keçirməyə yönələn hərəkətlər, vətənə xəyanət və cinayət yolu ilə əldə edilmiş vəsaitin leqallaşdırılması yer alır. Burada qeyd edək ki, Azərbaycan siyasi hakimiyyəti və xüsusi xidmət orqanları yeni müstəqiilik dönəmində bir neçə dəfə dövlət çevrilişinə cəhdi, hakimiyyətin zorla ələ keçirilməsi üçün hazırlanmış planları ifşa ediblər. Müxtəlif vaxtlarda bütün siyasi taleyi üçün Ulu Öndər Heydər Əlievə və prezident İlham Əliyevə minnətdar olmalı olan bəzi məmurların özgə qapılarından ümid dilənməsi kimi hallara da rast gəlinib. Ramiz Mehdiyev bunun konkret nümunələrindən biridir. Dövlət Təhlükəsizlik Xidmətinin yaydığı yeni faktlar – informasiya və səs yazıları, foto/videogörüntülər Ramiz Mehdiyev, Abbas Abbasov, Əli Kərimli və digərlərinin daxil olduğu şəbəkninə xarici xüsusi xidmət orqanlarının diqtəsinə uyğun olaraq Azərbaycanda dövlət çevrilişi həyata keçirmək planını gerçəkləşdirmək istədiyini bir daha təsdiqlədi. DTX-nın apardığı istintaqda təsdiq olunur ki, Ramiz Mehdiyev, Azərbaycanda hakimiyyəti ələ keçirmək məqsədilə yaradılmış “Milyarderlər ittifaqı”nın əsas müəlliflərindən olan baş nazirin keçmiş müavini Abbas Abbasov və AXCP sədri Əli Kərimli hələ 2012-ci ildən etibarən ölkədə çevriliş etmək üçün birlikdə hərəkət ediblər. O da bəlli olur ki, Abbas Abbasov Rusiyada fəaliyyət göstərən Azərbaycan əsilli biznesmenləri “Milyarderlər ittifaqı”nın çətiri altına toplayıb. Bu prosesdən bir qədər əvvəl “Ziyalılar Forumu” yaradılsa da, az sonra orda toplaşan ziyalılardan bəziləri məsələnin mahiyyətini anladılar. Məqsədini “cəmiyyətin problemlərinin müzakirəsi” elan edən Ziyalılar Forumunun bəzi üzvlərinin siyasi bəyanatlar səsləndirməsi digərlərinin bu klubdan uzaqlaşmasına səbəb oldu. Bunun ardınca isə həmin “ziyalılardan” bir qisminin və radikal müxalifətin toplaşdığı “Milli Şura” adlı rusiyapərəst birlik formalaşdı. Prezident seçkilərindən sonra bu şuranın Rusiya prezidentinə məktubu da mediada yayıldı. Bütün bu prosesdə Rüstəm İbrahimbəyov irəli verilib, “Milli Şura”nın vahid namizədi elan olunsa da, hamıya aydın idi ki, dirijorun solo çıxış üçün müəyyənləşdirdiyi şəxs məhz Abbas Abbasovdur. Həmin vaxt PA rəhbəri olan Ramiz Mehdiyev çevriliş planına gizli şəkildə dəstək verib. Əli Kərimli və dəstəsi isə “Demokratik Qüvvələrin Milli Şurası” adı altında siyasi müxalifəti çevriliş planına cəlb edib. Qənimət Zayıdov da Əli Kərimlinin adından Rusiya xüsusi xidmət orqanları ilə gizli danışıqlar aparıb, hakimiyyətə gəlmək üçün veriləcək dəstək qarşılığında həmin dövlətin maraqlarını müdafiə edəcəkləri vədini verib. Misal üçün, Əli Kərimli hakimiyyətə gələcəyi təqdirdə Azərbaycanın mərhələli şəkildə Kollektiv Təhlükəsizlik Müqaviləsi Təşkilatına (KTMT) tam üzv olacağı ilə bağlı razılaşma əldə olunub.
O da faktdır ki, Ramiz Mehdiyev həmişə kiçik intriqalardan, tələlərdən, dedi-qodudan, şantajdan və böhtandan istifadə edən məmur olub. O, özünün və şəbəkəsinin lazımlılığını göstərmək üçün daim radikal siyasi müxalifəti ayaqda saxlamağa çalışıb. Azərbaycanın dövlət müstəqilliyi, ərazi büyövlü və suverenliyinə çıxan Mehdiyev və dəstəsi ölkədə gərgin vəziyyət yaratmaq, ictimai sabitliyi pozmaq, Azərbaycanın dövlət maraqlarına qarşı planlar qurmaq və gerçəkləşdirmək istiqamətində fəaliyyət göstərib. Tovuz döyüşlərindən sonra orduya dəstək məqsədilə 2020-ci ildə Bakıda vətəndaşların yürüşü fonunda yaşanan olaylar bunun nümunələrindən biridir. Vətəndaşların vətənpərvərlik şüarları ilə keçirilən yürüşündə qəfil təxribat xarakterli hallar baş verdi, hətta bir qrup şəxs parlamentin binasına daxil olaraq, qanunverici orqanı ələ keçirməyə çalışdı. AXCP sədrinin müavini Fuad Qəhrəmanlı istintaqa verdiyi ifadədə etiraf edir ki, Əli Kərimli partiya üzvlərinin yürüşə qatılması, kütlənin diqqətini hakimiyyətə qarşı yönəltmək və parlamentin, eləcə də “Azərbaycan Televiziya və Radio Verilişləri” QSC-nin inzibati binalarını ələ keçirmək tapşırığı verib. Prosesə Ramiz Mehdiyev xeyir-dua verib. AMEA prezidenti vəzifəsində olana da o, xəyanətə son vermədi. Bu arada Dövlət Təhlükəsizlik Xidmətinin yaydığı videoda Ramiz Mehdiyevin naməlum bir qadınla telefon danışığının fraqmenti var. Söhbət zamanı Ramiz Mehdiyev qadından Azərbaycanda “dövlət idarəetmə sistemində dəyişiklik”lə bağlı – faktiki olaraq, dövlət çevrilişindən sonrakı idarəetmə modelinə dair hazırladığı məktubu kimlərəsə ötürmək üçün məsləhət istəyir.
Video fraqmentdə qadının şəxsiyyəti açıqlanmayıb. Amma APA-nın məlumatına görə, bu qadın Rusiya Elmlər Akademiyasında çalışır və R.Mehdiyevin Rusiya təhlükəsizlik orqanları ilə təmaslarında vasitəçilik edib. Mənbə bildirib ki, Mehdiyev AMEA prezidenti olduğu dövrdə Rusiyadakı kuratorları ilə məhz təhlükəsizlik orqanlarının Rusiya Elmlər Akademiyasındakı agenturası vasitəsilə əlaqə saxlayıb. Qeyd edək ki, Ramiz Mehdiyev 2022-ci il fevralın 19-da AMEA prezidenti vəzifəsindən azad edilib. Bu hadisədən cəmi 3 ay əvvəl - 2021-ci il noyabrın 25–26-da o, Bakıda Rusiya Elmlər Akademiyasının prezidenti Aleksandr Sergeyevin rəhbərlik etdiyi nümayəndə heyətini qarşılayıb. Mehdiyev qonaqları Heydər Əliyev Beynəlxalq Hava Limanında şəxsən qarşılayıb, AMEA-da keçirilən görüşdə isə ona Rusiya Elmlər Akademiyasının xatirə medalı təqdim olunub. Rusiya kəşfiyyat orqanlarının, xüsusilə FSB-nin Rusiya Elmlər Akademiyasında və digər elmi müəssisələrdə güclü nəzarət mexanizmləri və agentura şəbəkəsi saxlaması faktı beynəlxalq media və araşdırmalarda dəfələrlə qeyd olunub. Daha bir fakt odur ki, xaricdəki söyüş müxalifəti də Mehdiyev və şəbəkəsi tərəfindən təlimatlandırılıb və idarə olunub. Amma onlar faktlarla ifşa olunur. Şəbəkənin görünən və görünməyən üzvlərinin hamısı ifşa olunacaq. Xəyanət cəzasız qala bilməz.
Tahir TAĞIYEV
