Rauf Zeyni: “Bu o mesajı verir ki, ABŞ da, Azərbaycan da bölgədə sülh və sabitliyin, dayanıqlı inkişafın bərqərar olmasında maraqlıdır”
ABŞ-ın vitse-prezidenti Ceyms Devid Vensin Azərbaycana rəsmi səfəri münasibətilə Bakıda Heydər Əliyev Mərkəzi ABŞ bayrağının rəngləri ilə işıqlandırılıb. ABŞ-ın Azərbaycandakı səfirliyinin yaydığı məlumatda bildirilib ki, bu addım iki ölkə arasında möhkəmlənən strateji tərəfdaşlığı, dostluğu və əməkdaşlığın daha da inkişaf etdirilməsinə dair ortaq öhdəliyi simvolizə edir.
Heydər Əliyev Mərkəzinin ABŞ bayrağı ilə işıqlandırılmasını dünyadakı dost və düşmənlər necə oxuyacaq? Bu necə bir mesajdır?
Bakı İctimai Əməkdaşlıq Mərkəzinin sədri Rauf Zeyni baki-xeber.com-a bildirdi ki, Azərbaycan tarixində çox önəmli hadisələr və səhifələr olub. “Bu səhifələrdən biri də vaxtilə 907-ci əlavəni qəbul edən ölkə ilə bu gün strateji müttəfilik, strateji tərəfdaşlıq səviyyəsinə çatmağımızdır. Prezident İlham Əliyevin milli, bəşəri və mütərəqqi siyasəti bizi bu zirvələrə gətirib çatdırdı”.
R.Zeyni qeyd etdi ki, Azərbaycanın 2020-ci ildə tarixi zəfər əldə etməsi, 2023-cü ildə antiterror tədbirləri ilə ərazilərimizin bütövlükdə işğaldan azad olunması, suverenliyimizin bərpa edilməsi və konstitsion hüququmuzun idarəetmədə tətbiq olunması, bütün ərazilərimizin hakimi olmağımız bizi dünyada çox hörmətli və şöhrətli etdi. O, vurğuladı ki, qazandığımız zəfərə görə bizimlə bağlı tamamilə başqa münasibət formalaşdı.
“Bu gün regionda yaranmış yeni mühitdən irəli gələrək bütün ölkələrin, o cümlədən də ABŞ-ın Azərbaycanla tərəfdaşlıq və müttəfiqlik etməsi böyük bir hadisədir.
Bu baxımdan Heydər Əliyev Mərkəzinin ABŞ bayrağının rəngləri ilə proyeksiya olunması hər iki ölkənin bu əməkdaşlığa, tərəfdaşlığa böyük önəm verdiyini ifadə edir. Bu o mesajı verir ki, ABŞ da, Azərbaycan da bölgədə sülh və sabitliyin, dayanıqlı inkişafın bərqərar olmasında maraqlıdır. Hesab edirəm ki, bölgədə sülhün və stabilliyin, dayanıqlı inkiafın təmin olunması Azərbaycan üçün də, ABŞ üçün də, Ermənistan üçün də çox vacibdir. Bundan irəli gələrək biz bu strateji müttəfiqliyə, tərəfdaşlığa çox böyük önəm veririk. Düşünürəm ki, bu həm regionun, həm də ABŞ-Azərbaycan münasibətlərinin böyük gələcəyindən xəbər verir”-deyə R.Zeyni qeyd etdi.
İradə SARIYEVA
