Ramil Hüseynov: “Bu, həm də ABŞ tərəfindən Rusiyaya verilən siyasi mesajdır”
Birləşmiş Ştatların vitse-prezidenti Cey Di Vens Ermənistana səfəri zamanı baş nazir Nikol Paşinyanı tərifləyib, 7 iyun parlament seçkilərində ona dəstəyini bildirib: “Bilirəm ki, qarşıdan seçki gəlir. Bu haqda danışmayacağam, amma dəstəyimin hər hansı bir əhəmiyyəti varsa, şübhəsiz, onu dəstəkləyirəm. Çünki o, bu layihələri təmin edə etmək üçün uzunmüddətli tərəfdaşlıq qura biləcək insandır”.
Məlum olub ki, ABŞ tarixində ilk dəfə Ermənistan seçkilərində namizədə açıq dəstək bildirir.
Sözügedən məsələni baki-xeber.com-a şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, ABŞ vitse-prezidentinin bu səviyyədə Paşinyana dəstək verməsi onun mövqeyinin möhkəmləndirilməsi məqsədi daşıyır: “Məsələ ondadır ki, 2021-ci illə müqayisədə Paşinyanın reytinqi cəmiyyətdə aşağıdır. Düzdür, revanşist müxalifətin reytinqi Paşinyandan da çox aşağı səviyyədədir. Ancaq Vaşinqton Paşinyanla bağlı məsələni şansa buraxmaq istəmir. Bax buna görə Vensin Cənubi Qafqaza səfər turnesində ilk olaraq Ermənistan seçildi. Ermənistanla bir sıra müqavilələr imzalandı, bu ölkəyə ABŞ tərəfindən böyük investisiya vəd edildi və s. Bununla Vaşinqton mövqeyini açıq şəkildə ortaya qoyur ki, Paşinyan hakimiyyətinin seçkidə qalib gəlməsində maraqlıdır və bununla əlaqədar dəstək göstərəcək. Bu, həm də ABŞ tərəfindən Rusiyaya verilən siyasi mesajdır. Yəni Birləşmiş Ştatlar Rusiyanın Paşinyanı devirmək istəməsinin fərqindədir. Onu da qeyd edək ki, nəinki ABŞ, Avropa İttifaqı da iyunda keçiriləcək parlament seçkilərində Paşinyan komandasının qalib gəlməsində maraqlıdır. O cümlədən, Türkiyə, Azərbaycan da bənzər mövqedən çıxış edirlər. Çünki bunun əksi Rusiyaya bağlı revanşist qüvvələrin hakimiyyətə gəlməsi deməkdir. O zaman regionda gərginlik artacaq, dəhliz və digər kommunikasiyaların açılması təxirə salınacaq. Rusiya növbəti dəfə destruktiv mövqedən çıxış edərək bundan öz məqsədləri üçün istifadə etməyə çalışacaq. Bunlar baş verməsin deyə, ABŞ açıq şəkildə seçkilərdə Paşinyanı dəstəkləyəcəyini bəyan edir”.
Vidadi ORDAHALLI
