Arzuxan Əlizadə: “Azərbaycana qarşı kifayət qədər ikili, iki üzlü siyasət yürütməklə əslində nəyə xidmət etdiyi o dövrdə də məlum idi”
Norveç polisi keçmiş Baş nazir Torbyorn Yaqlandın mərhum məhkum pedofil Ceffri Epşteynlə əlaqələri ilə bağlı mümkün korrupsiya ilə bağlı araşdırmaya başlayıb.
Hazırda 75 yaşı olan Yaqland 1996-cı ildən 1997-ci ilə qədər Norveçin Baş naziri vəzifəsində çalışıb. Daha sonra o, 2009-cu ildən 2019-cu ilə qədər 10 il Avropa Şurasının Baş katibi vəzifəsində çalışıb və 2009-cu ildən 2015-ci ilə qədər Nobel Sülh Mükafatını verən Norveç Nobel Komitəsinə sədrlik edib.
Yaqlandın adı Epşteynlə birlikdə pedofiliyada çəkilir, onunla birgə ittiham olunur. Yəni Tornboyn Yaqlandın da adı Epşteyn fayllarında çıxıb və iddialara görə o da adada olub.
Yaqland keçmiş illərdə Avropa Şurasının baş katibi olanda Azərbaycana münasibəti necə olub?
“Azərbaycanda insan hüquqları ilə bağlı vəziyyətin “gərgin olması” təəssüratını formalaşdırmağa başladı”
Millət vəkili Arzuxan Əlizadə baki-xeber.com-a bildirdi ki, son dövrlərdə Epşteyn qalmaqalı gündəmi zəbt edib: “Epşteyn qalmaqalında növbəti adı çəkilən şəxs Norveçin keçmiş baş naziri, eyni zamanda sonradan Avropa Şurasının sədri olmuş, uzun müddət ərzində həm də “Nobel” Sülh Mükafatı Komissiyasının İdarə Heyətinin üzvülüyündə təmsil olunmuş Torbyorn Yaqlandla əlaqədardır. Onun da Epşteynlə elektron poçt üzərindən yazışmaları üzə çıxıb, ictimailəşib. Artıq ABŞ Ədliyyə Nazirliyi Norveç rəhbərliyinə müraciət edib, onun diplomatik statusunun ləğv olunması və onunla bağlı araşdırma aparılması yönündə mövqe sərgiləyib.
Yaqland Avropa Şurasına rəhbərlik etdiyi on il müddətində ikili siyasət aparıb. Bu Azərbaycana yönəlik bir siyasət kimi sərt şəkildə tənqid edilirdi. Bu gün artıq onun sözün həqiqi mənasında ikili siyasət qurduğu və bununla da iqtisadi imkanlarını genişləndirməsi ilə bağlı faktlar, sübutlar ortaya çıxıb. Məsələ burasındadır ki, Avropa Şursına rəhbərlik etdiyi dövrdə Yaqland Rusiya ilə xüsusi münasibətlər qurmağa çalışıb və Putin üzərində bir çox məsələlərə müdaxilə etməyi nəzərdə tuturdu. Onun yazışmaları da bu istiqamətdədir ki, Epşteyn üzərindən Rusiya rəhbərliyində olan şəxslərlə iqtisadi münasibətlər qurmaq istəyir. Görünən bundan ibarətdir ki, bu münasibətlər qurulub. Çünki Ukrayana ilə bağlı məsələlərdə də Yaqland tamamilə fərqli mövqe tutub. Rusiya nümayəndə heyətinin mandatının dayandırılması ilə bağlı məsələyə də fərqli yanaşmalar sərgiləyirdi və Rusiyanı geri qaytarmaq üçün əlindən gələni edirdi. Amma paralel olaraq Azərbaycana qarşı münasibəti ilə də gündəmdə idi. O zaman bizim mövqeyimiz, açıqlamalarımız bundan ibarət idi ki, faktiki olaraq Avropa Şurasının rəhbəri Yaqland bu cür ikili siyasət yürütməklə keçmiş post-sovet məkanında olan ölkələri Rusiya təsirinə salmaq, Rusiyanın rolunu artırmaq niyyəti güdürdü”.
A.Əlizadənin sözlərinə görə, Yaqland eyni zamanda Avropa ölkələrinin Yəni Avropa Şurasından imtina etməklə faktiki olaraq Rusiyanın nəzarətinə keçməsi siyasəti yürüdürdü. “Onun davranışlarının kökündə bu dayanırdı. Yadımızdadır ki, 2015-ci ildə Azərbaycanda insan hüquqları ilə əlaqədar bir komitə təşkil etməklə bağlı təşəbbüslə çıxış etdi, özü də o komitənin üzvü oldu. Ondan sonra isə qəfil həmin komitədən çıxmaqla diqqəti özünə, personasına və Azərbaycana yönəltmiş oldu, bununla da Azərbaycanda insan hüquqları ilə bağlı vəziyyətin “gərgin olması” təəssüratını formalaşdırmağa başladı. Azərbaycana qarşı kifayət qədər ikili, iki üzlü siyasət yürütməklə əslində nəyə xidmət etdiyi o dövrdə də məlum idi. Bu gün artıq onun ikili siyasəti faktlarla sübuta yetirilib, söz istintaqındır. Bununla bağlı Yaqlandın vəkili də müraciət edərək onun nümayəndəsinin istintaqla əməkdaşlıq etməyə hazır olduğunu bildirib. Sənədləri təqdim edəcəklər. Amma təbii ki, özünün elektron post vasitəsilə yazışmaları bir çox faktları ortaya qoymuş olur. Qarşıdakı dövrdə biz həmin vaxtlar yürütdüyü siyasətlə, fəaliyyətlə bağlı məsələləri tam olaraq biləcəyik. Məsələ burasındadır ki, Avropa məkanında, eləcə də ABŞ-da Azərbaycana qarşı fəaliyyət göstərən Menderes və digər konqresmenlər korrupsiyanın içində olublar. Maraqlıdır ki, həmin Avropa siyasətçiləri daha çox Rusiyanın iqtisadi məkanından yararlanaraq Azərbaycana qarşı bu cür siyasət yürüdüblər. Bu siyasət bu gün də davam etməkdədir. Yəqin ki, bir müddətdən sonra bu faktlar da üzə çıxacaq, Avropa Parlamentində təmsil olunan bir sıra avropalı deputatlar var ki, bilavasitə həm özləri, həm partiyaları Rusiyanın iqtisadi dairələrindən göstərişlər almaqla Azərbaycana qarşı düşmənçilik mövqeyi sərgiləməkdədirlər. Vaxtı çatdıqca bunların da fəaliyyəti ilə bağlı məsələlər ortaya çıxacaq. Məqsəd Azərbaycanı, eləcə də Gürcüstanı və digər post-sovet məkanındakı keçmiş respublikaları yenidən Rusiyasının təsir dairəsinə qaytarmaq, eyni zamanda onları Avropadan çəkindirmək, Avropa İttifaqına, Avropa Şurasına yaxınlaşmaq siyasətindən geri çəkmək faktiki olaraq yenidən Rusiya boyundurğuna keçməkdir. Yəni bütün bu fəaliyyət bununla bağlıdır və bu fəaliyyət də Rusiyadan idarə olunur. Yaqlan özü elə buna bariz nümunədir”-deyə A.Əlizadə bildirdi.
İradə SARIYEVA
