Qulamhüseyn Əlibəyli: “Rusiyanın dəmir yolu ilə bağlı öhdəliyi yerinə yetirəcəyi real deyil”
Nikol Paşinyan İrəvanda keçirdiyi brifinqdə ölkənin dəmir yolunun Ermənistandan Azərbaycan və Türkiyə sərhədlərinə qədər olan hissələrində bərpa işləri ilə bağlı rusiyalı tərəfdaşlarından qərar gözlədiyini diqqətə çatdırıb:
“Bəli, bu məsələ müzakirə olundu. Mən bunu Rusiya prezidenti Vladimir Putinlə də müzakirə etmişəm. Ermənistan baş nazirinin müavininin də bunu Rusiya baş nazirinin müavini ilə müzakirə etmək imkanı olub. Biz rusiyalı tərəfdaşlarımızdan cavab gözləyirik. Bərpa işlərinin başlanması üçün ən uyğun vaxt indidir”.
Maraqlıdır, Rusiya Ermənistan dəmir yolları ilə bağlı bu öhdəliyi yerinə yetirəcəkmi? Nə dərəcədə realdır ki, ən azından seçkilərdən əvvəl Rusiya buna getsin?
Sözügedən məsələni baki-xeber.com-a şərh edən sabiq millət vəkili, hüquqşünas Qulamhüseyn Əlibəylinin fikrincə, Paşinyan ölkədaxili dəmir yollarının bərpası məsələsini Rusiyanın üzərinə atmaqla maraqlı və bir qədər hiyləgər gediş edir: “Söhbət ondan gedir ki, Ermənistanın daxili dəmir yolları Rusiyanın istifadəsindədir. Çox güman ki, bağlanmış müqavilədə daxili dəmir yollarının bərpası, yenidən qurulması və digər məsələlər də Rusiyanın üzərinə bir vəzifə kimi qoyulub. Bununla bağlı Ermənistanla Rusiya arasında 2008-ci ildə saziş imzalanıb. Paşinyan həmin müqaviləyə istinad edərək belə bir tələblərlə çıxış edir. Rusiyanın dəmir yolu ilə bağlı öhdəliyi yerinə yetirəcəyi real deyil. Halbuki, bunu edərsə, Ermənistan hakimiyyəti iqtisadi baxımdan xeyli irəli düşəcək. Rusiya hesabına dəmir yolunu yeniləyəcək. Moskva bundan imtina edərsə, o zaman Ermənistan dəmir yollarının Rusiyanın nəzarətindən geri alınması məsələsi qaldırıla bilər. Ona görə Paşinyan israr etməklə Rusiyanı seçim qarşısında qoyur. Rusiya bir tərəfdən Zəngəzur dəhlizinə qarşı çıxır, o biri tərəfdən bu dəhlizdən yararlanmaq istəyir. Belə olan halda Rusiya çətin seçim qarşısında dayanır. Düzdür, Zəngəzurdan keçən dəmir yolu Rusiyanın nəzarətinə aid deyil. Ancaq Ermənistanın digər dəmir yolları Rusiya şirkətinin idarəçiliyindədir. Çox güman ki, Rusiya yayınmaq üçün prosesi uzadacaq”.
Vidadi ORDAHALLI
