İlqar Hüseynli: “Bir çox hallarda vəzifə təyinatlarında...”
Kənd təsərrüfatı naziri Məcnun Məmmədovun imzaladığı müvafiq əmrlə nazirliyin tabeliyindəki Tərəvəzçilik Elmi Tədqiqat İnstitutu Publik Hüquqi Şəxsin İdarə Heyətinin sədri Elmar Allahverdiyev vəzifəsindən azad olunub. E.Allahverdiyev Azərbaycan Qida Təhlükəsizliyi Agentliyində (AQTA) işə başlayıb. O, agentlik sədri Qoşqar Təhməzlinin müvafiq əmri ilə AQTA-nın Bitki sağlamlığı və bioloji təhlükəsizlik şöbəsinin müdiri vəzifəsinə təyin olunub.
Kənd təsərrüfatı naziri E.Allahverdiyevi işdən çıxarıb, amma AQTA sədri onu şöbə müdiri vəzifəsinə təyin edib.
Biz kiminsə işdən çıxarılmasının əleyhinə deyilik. Nazir məsləhət bilib onu işdən çıxarıb. AQTA sədri də E.Allahverdiyevi işə götürüb, bu da yerində olan məsələdir. Biz nə naziri, nə də agentlik rəhbərinin qərarını pisləmək fikrində deyilik, kimlərisə ittiham etməkdən uzağıq.
Amma burada məntiqi sual yaranır, əgər bu kard yaxşı kadr idisə, peşəkar idisə onu nazirlikdən niyə işdən çıxarıblar? Yox, əgər pis kadr idisə onu ondan da əhəmiyyətli, strateji status daşıyan başqa bir dövlət idarəsində niyə vəzifəyə qoyublar? Bütün bunlar onun ifadəsi deyilmi ki, Azərbaycanda ayrı-ayrı dövlət qurumları, ayrı-ayrı yüksək vəzifəli məmurlar səviyyəsində kadrlara bir halda ayrı-seçkilik, bir halda qaralama, qərəzli bir halda himayəçilik münasibəti var. Bütün bunlar bütövlükdə yüksək məmurların səviyyəsində kadr siyasətinə kölgə salır. Bu proseslər eyni situsiyada baş verir. Bu nə qədər normal kadr siyasəti praktikasıdır? Belə halların qarşısını almaq, ümumiyyətlə baş verməməsi üçün nə etmək lazımdır?
Bəzi ekspertlər hesab edir ki, bir dövlət idarəsinin işdən çıxardığı bir şəxsə digər bir dövlət idarəsində dərhal vəzifə verilməsi müsbət tendensiya sayılmır. Bu cür iş üsulunun həm ziyanlı, həm də müəyyən qədər müsbət tərəflərinin olduğunu deyən ekspertlərin sözlərinə görə, bəzi hallarda kimlərsə haqsız yerə işdən uzaqlaşdırılır, amma əsasən işdən çıxarılanın çoxu işlərində nöqsanlara yol verdikləri üçün onlara qarşı belə addım atılır.
Sosial-iqtisadi sahə üzrə ekspert İlqar Hüseynli “Bakı-Xəbər”ə bildirdi ki, dövlətin strateji vəzifələri, postları ilə bağlı ortada bir statistika, göstərici, kadr bankı olmalıdır. “Bir kadrı sonralar əvəzləmək üçün həmin sahə üzrə ixtisaslaşmış, savadlı, qabiliyyətli bir neçə nəfər yetişdirilməlidir ki, kadr dəyişikliyi zamanı onlar üzərindən yeni təyinatlar həyata keçirilsin. Çox təəssüflər olsun ki, Azərbaycanın dövlət qurumlarının əksəriyyətində çox mənfi bir “ənənə” mövcuddur. Bir çox hallarda vəzifə təyinatlarında əsasən dostluq, qohumluq, qardaşlıq prinsiplərinə üstünlük verildiyini görürük. Hansısa bir dövlət qurumunun işdən çıxardığı əksər şəxslər sonradan bu üsulla başqa bir qurumda işlə təmin olunurlar. Tutalım, bir nazirin qohumunu başqa bir nazir, komitə sədri işdən çıxarır, o da öz rəhbərlik etdiyi nazirlikdə ona vəzifə verir, hətta yer olmayanda onun üçün yeni vəzifə təsis edir. Yəni işdən çıxan adam işsiz qalmır, ona dərhal başqa bir qurumda iş verilir. Belə çıxır ki, “sən narahat olma, istənilən halda mən səni haradasa işə qoyacağam” yanaşması da var. Bu olduqca yanlış tendensiyadır.
Ümumiyyətlə, bu elə bir məsələdir ki, buna dərindən yanaşılmalıdır. Əslində araşdırmaq lazımdır ki, bu adam niyə işdən çıxarılıb, onun işdən çıxarılması haqlı səbəblərlə bağlıdır, yoxsa ona qarşı qərəzli münasibət göstərilib? Yəni yaxşı kadrdır, amma işlədiyi qurumda ona qarşı qərəzli yanaşma üzündən işini itirib. Bəlkə doğrudan da yaxşı bir kadrdır və təcrübəyə, biliyə, qabiliyyətə malik insandır ki, onun dövlət idarəçiliyindən kənarda qalması yaxşı olmazdı. Bu mənada belə bir şəxsin başqa bir dövlət qurumunda işə götürülməsi pozitivdir”.
İ.Hüseynli qeyd etdi ki, bütün hallarda kadr məsələsinə həssas yanaşılmalıdır və kadrların seçiminə diqqət edilməlidir. İstənilən dövlət qurumunda vəzifədən çıxarılan şəxsi başqa bir qurum işə götürərsə onun işdən çıxarılması səbəblərini dəqiqliklə incələməlidir. “Hansısa bir nazirliyin, komitənin, agentliyin strukturundan yüksək vəzifə daşıyan şəxs çıxarılıbsa onunla bağlı araşdırma aparılmalıdır. Bu şəxs çox ciddi səbəblərdən işdən çıxarlıbsa onun başqa bir dövlət qurumunda işə götürülməsi təbii ki, qəbul olunan deyil. Burada yanaşma belə olmalıdır. Fikrimcə, kadrlar qabiliyyətlərinə, bacarıqlarına, peşəkarlığına, təcrübəsinə görə təyinatlar almalıdır”-deyə İ.Hüseynli bildirdi.
İ.Hüseynli hesab edir ki, yüksək vəzifəli məmurlar kadr siyasətinə çox ciddi yanaşmalı və layiq olanları vəzifələrə irəli çəkməlidir, bu məsələyə qohumluq, tanışlıq nöqteyi-nəzərindən yanaşmamalıdır, belə olanda bu praktika mənfi hal kimi diqqəti çəkir.
İradə SARIYEVA
