Ilqar Hüseynli: “Gənc kadrların təyini zamanı böyük təcrübəsizlik yaşanır”
Son zamanlar qurumlarda kadr dəyişikliyi daha çox müşahidə olunur. Bu günlərdə Bakı Şəhər Mənzil-Kommunal Təsərrüfatı Departamentinin Əhaliyə Vətəndaşlıq Xidməti Trestinin rəisi Zahid Məmmədov işdən çıxarılıb. Bununla bağlı Bakı Şəhər İcra Hakimiyyətinin (BŞİH) başçısı Eldar Əzizov əmr imzalayıb. Digər əmrlə adıçəkilən qurumun rəisi vəzifəsinə Zaur Mirzəzadə təyinat alıb.
Xatırladaq ki, BŞİH başçısı Eldar Əzizov bir müddət əvvəl müşavirə zamanı Əhaliyə Vətəndaşlıq Xidməti Trestinin sabiq rəisi Fəqan Məlikova ciddi iradlarını bildirmişdi. Bundan bir neçə gün sonra F.Məlikov nöqsanlara görə vəzifəsindən azad edilib. Noyabr ayında isə onun yerinə Zahid Məmmədov təyin olunmuşdu.
Qeyd etdiyimiz kimi, son zamanlar qurumlara yeni təyin olunan kadrlar, qısa müddət sonra həmin vəzifən azad olunur. Maraqlıdır, həmin şəxslər öz işlərini düzgün icra etmir ya başqa səbəblər var?
Sosial sahə üzrə ekspert İlqar Hüseynli “Bakı-Xəbər”ə şərhində bildirdi ki, Azərbaycanda yüksək postlara təyinat zamanı ciddi kadr probleminin yaşandığı müşahidə olunur: “Son zamanlar təyin olunan kadrlar özünü doğrultmur. Gənc kadrların təyini zamanı böyük təcrübəsizlik yaşanır. Bu dəfələrlə müşahidə olunub. Dövlətin kadr siyasətini formalaşdırılan bir institut olmalıdır. Siyasi mövqeyindən, ictimai siyasi baxışından asılı olmayaraq insanların kadr kimi yetişməsi prioritet olmalıdır. Dövlət İdarəçilik Akademiyasını bitirənlərin əksəriyyəti kimlərinsə qohumu, yaxınlığı, əlaqəsi ilə vəzifələrə təyinat alıblar. Bu sahədə artıq zəncirvari sistem yaranıb. Bu sistem də korrupsiyaya yol açır. Təbii ki, həmin şəxslər də kimlərə arxayın olur. Ümumiyyətlə, zəncircari qohumluq prinsipi əsasında baş verən təyinatlar özünü doğrultmur. Bu səbəbdən də hesab edirəm ki, yeni metodlara, yeni seçimlərə üstünlük verilməlidir”.
Həmsöhbətimiz hesab edir ki, Bakı Şəhər İcra Hakimiyyətinin tabeliyində olan qurumlarda qeydə alınan kadr dəyişikliyi təcrübəsizliklə bağlıdır: “Yaxşı olar ki, təyinatlar həmin müəssisədə nüfuz sahibi olanlar arasından seçilsin. Cəmiyyətlə işləyən insanlara üstünlük verilməlidir. Məsələn, Gürcüstanda qeyri hökumət təşkilatları institutlarından olan xeyli sayda insan dövlət qulluğunda, qurumlarda vəzifəyə təyin olunur. Onlardan kadr kimi geniş istifadə edilir. Hansısa bir quruma şəxs təyin edilməzdən öncə onların nə kimi təcrübəyə malik olub-olmamadığı araşdırılmalıdır”.
Günel CƏLİLOVA
