Əli Orucov: “Bu, İslam Əməkdaşlıq Təşkilatı ilə münasibətlərə heç bir mənfi təsir göstərməyəcək”
Prezident İlham Əliyev yanvarın 5-də yerli televiziya kanallarına verdiyi müsahibədə Qəzza məsələsi ilə bağlı bildirib ki, Azərbaycan ərazisindən kənarda hərbi əməliyyatlarda iştirak nəzərdə tutulmur. Prezident qeyd edib: “Azərbaycanlıların həyatını və sağlamlığını başqaları üçün risqə atmaq niyyətimiz yoxdur.”
O vurğulayıb ki, Azərbaycan heç bir sülhməramlı və ya hərbi əməliyyata qoşun göndərməyəcək və bu barədə hər hansı razılıq verməyib. Başqa sözlə, Prezident müsahibəsində Qəzzaya qoşun göndərmək fikrinin olmadığını və belə bir əməliyyatda iştirak etməyəcəyini açıq şəkildə bəyan edib.
Bir müddət əvvəl ABŞ-ın NATO-dakı nümayəndəsi Azərbaycanın Qəzzaya sülhməramlı kontingent göndərəcəyi barədə açıqlama vermişdi. Prezidentin köməkçisi Hikmət Hacıyev isə bu məlumatı təkzib edərək bildirmişdi ki, belə bir razılaşma mövcud deyil.
Xarici işlər naziri Ceyhun Bayramov mətbuat konfransında qeyd edib ki, bu məsələ ilə bağlı ABŞ hökumətinə suallar ünvanlanıb və həmin sualların cavablarından asılı olaraq qərar veriləcək. Prezident İlham Əliyev də müsahibəsində vurğulayıb ki, Amerika hökumətinə bu mövzu ilə bağlı 20-yə yaxın sual ünvanlanıb, lakin Azərbaycanın bu missiyada iştirak etmək niyyəti yoxdur.
İsrail mediası da Prezident İlham Əliyevin açıqlamalarına istinad edərək yazıb ki, Azərbaycan Qəzzaya qoşun göndərməyəcək.
Azərbaycanın Yaxın Şərqin ən qaynar nöqtələrindən biri olan Qəzza bölgəsinə qoşun göndərməkdən imtina etməsi İslam Əməkdaşlıq Təşkilatı (İƏT) və onun üzv dövlətləri ilə münasibətlərə mənfi təsir göstərə bilərmi?
Politoloq Əli Orucov məsələyə münasibət bildirərkən baki-xeber.com saytına deyib ki, Azərbaycanın Qəzzaya sülhməramlı hərbi kontingent göndərməməsi ilə bağlı Prezident İlham Əliyevin qərarı doğru qərardır və təqdir edilməlidir:
“Ötən ilin 13 oktyabrında ABŞ Prezidenti Donald Trampın təşəbbüsü ilə Misirdə keçirilən Qəzza Sülh Sammitində irəli sürülən 20 bəndlik plan razılaşdırılsa da, sonradan münaqişə tərəfləri həmin razılaşmaları pozdular. Hərbi əməliyyatlar bərpa olundu və HƏMAS silahı təhvil verməkdən imtina etdi. Aktiv döyüş əməliyyatlarının getdiyi bir bölgəyə Azərbaycan əsgərinin göndərilməsi, əlbəttə ki, böyük risqlər yaradır. Ora yerləşdiriləcək hərbi kontingent çarpaz atəş altında qala bilər.
Trampın irəli sürdüyü 20 maddəlik sülh planı tam icra olunarsa, o zaman bu məsələyə qayıtmaq olar. Bildiyim qədər, Qəzza zolağında sülhyaratma missiyasında iştirak edəcəyi nəzərdə tutulan Pakistan və İndoneziya da öz silahlı qüvvələrini göndərməyə ehtiyatla yanaşır və konkret qərar verməkdən çəkinir.
Məsələnin digər tərəfi ondan ibarətdir ki, sülhyaratma prosesi ilə bağlı yaranan suallara hələ də aydınlıq gətirilməyib. Texniki və maddi-texniki təminat məsələləri dəqiqləşdirilməyib. Ən vacibi isə, həmin qüvvələrin beynəlxalq statusu və təhlükəsizliyi ilə bağlı mühüm detallar hələ də həll olunmamış qalır.
ABŞ Əfqanıstanı bir günün içində tərk etdikdə, sülhyaratma missiyasının tərkibində xidmət keçən Azərbaycan hərbçiləri Talibanla faktiki olaraq təkbaşına buraxıldı. Rəsmi Bakı böyük çətinliklə Türkiyə ilə koordinasiyalı şəkildə öz hərbçilərini təhlükəsiz formada evakuasiya edə bildi".
Orucovun fikrincə, Azərbaycanın Qəzza zolağına sülhməramlı göndərməməsi ilə bağlı verdiyi qərar haqlıdır və bu, İslam Əməkdaşlıq Təşkilatı ilə münasibətlərə heç bir mənfi təsir göstərməyəcək. "Azərbaycan hər zaman Fələstin xalqının yanında olub və onun dərdinə şərik çıxıb. Bakı İsrail-Fələstin münaqişəsinin həllini iki dövlət prinsipi əsasında, tam ədalətli şəkildə dəstəkləyir. Şərqi Qüds paytaxt olmaqla müstəqil Fələstin dövlətinin qurulmasının tərəfdarıdır.
Azərbaycan İƏT üzv dövlətləri arasında fəallığı və prinsipial mövqeyi ilə seçilən ölkələrdən biridir və təşkilat üçün böyük fayda yaradır”, - deyə ekspert fikrini yekunlaşdırdi.
Akif NƏSİRLİ
