ABŞ və İsrailin İranın əhəmiyyətli miqdarda uran saxladığı “Pikaks dağı”ndakı obyektə zərbə endirmək gücünə malik olmadığı ortaya çıxıb. İranın nüvə proqramının ürəyi kimi təsvir edilən və yerin 100 metrdən çox dərinliyində tikilmiş "Pikaks dağı" kod adlı yeni obyekt regional münaqişənin gedişatını dəyişdirə biləcək ən vacib hədəfə çevrilib.
Qeyd edilir ki, ABŞ və İsrail “Pikaks dağı”ndakı obyektə zərbə endirmək gücünə malik deyillər. Çünki dağın dərinliyində gizlənmiş bu nəhəng kompleksin hazırkı hava hücumları və bunker partladıcı bombalarla məhv edilməsi demək olar ki, mümkün deyil. Obyektin zərərsizləşdirilməsi üçün təkcə hava hücumlarının kifayət etməyəcəyi bildirilir və qeyd edilir ki, onu yalnız xüsusi təyinatlı qüvvələrin İran ərazisinə göndərilməsini nəzərdə tutan riskli yerüstü əməliyyat vasitəsilə zərərsizləşdirmək olar.
ABŞ administrasiyasının İranın nüvə imkanlarını aradan qaldırmaq strategiyası, Tehranın 400 kiloqramdan çox zənginləşdirilmiş uranı müxtəlif yerlərə daşıması ilə yeni bir mərhələyə keçib. Keçmiş hava hücumlarına baxmayaraq, nüvə proqramını sürətlə yenidən qurub, müdafiəsini gücləndirən İranın, Natanz stansiyası yaxınlığındakı bu yeni qalada 60% təmiz uran ehtiyatı saxladığı bildirilir.
Mütəxəssislər, bu ehtiyatların ən azı 11 nüvə başlığı istehsal etmək üçün kifayət qədər kritik həddə yaxınlaşdığını və sözügedən dağın mövcud Fordo stansiyasından daha dərin və daha təhlükəsiz olduğunu bildirirlər.
Strateji təhlilçilər vurğulayır ki, ABŞ və İsrailin bölgədəki hərbi məqsədlərinə çatdıqlarını iddia etmələri üçün “Pikaks dağı”nda istehsalın dayandırılması və zənginləşdirilmiş uran ehtiyatlarının ələ keçirilməsi vacibdir.
Tahir TAĞIYEV
