Qulamhüseyn Əlibəyli: “Bu, o deməkdir ki, Qarabağ erməniləri geri qayıtmaq istəmir və Avropa Parlamenti bunu nəzərə almalıdır”
Ermənistan baş naziri Nikol Paşinyan Avropa Parlamentində çıxışında bildirib ki, bizim üçün vacib məsələlərdən biri Qarabağı tərk edən ermənilərin emosiyalarından sui-istifadə edilməməsidir.
Onun sözlərinə görə, Qarabağı tərk edən ermənilər Ermənistan vətəndaşlığını almalı və daimi olaraq Ermənistan Respublikasında yaşamalıdır: “Biz artıq onların məskunlaşması proqramını başlamışıq və bu proqram 4 886 ailəyə fayda gətirib. Bu məsələnin həllində sülhün möhkəmləndirilməsi üçün beynəlxalq tərəfdaşlarımızdan maksimum dəstəyə ehtiyacımız var”.
Burada diqqəti çəkən məqam odur ki, Paşinyan bunu Avropa Parlamenti tribunasında bəyan edir. O Avroparlament ki, neçə dəfə Qarabağ erməniləri ilə bağlı qərəzli və bitərəf qətnamə qəbul edib, yersiz olaraq ermənilərin qayıdışını qabartmağa çalışıb və bundan Azərbaycana qarşı siyasi təzyiq vasitəsi kimi istifadə etməyə cəhd edib.
Sözügedən məsələ ilə bağlı fikirlərini baki-xeber.com-la bölüşən sabiq millət vəkil, hüquqşünas Qulamhüseyn Əlibəyli buna bir neçə prizmadan yanaşdı: “Ümumiyyətlə, Paşinyanın Avropa Parlamentində Qarabağ erməniləri ilə bağlı söylədiklərini iki aspektdə nəzərdən keçirmək olar. Birincisi, Paşinyan Ermənistanın baş naziri kimi başa düşür ki, Qarabağdan könüllü köçüb getmiş ermənilər geri qayıtmaq istəmirlər. Onların müəyyən hissəsi xarici ölkələrə köçüb orada daimi yaşamaq istəyirlər. Artıq onların bir hissəsi xaricə köçüb. Xeyli hissəsi də Ermənistan vətəndaşlığını qəbul edib və orada yaşamaq istəyir. İkincisi, Nikol anlayır ki, indiki şəraitdə onların geri qaytarılması haqqında məsələ qaldırılması yalnız siyasi təzyiq vasitəsi kimi mümkün ola bilər. Özü də bu məsələni daha çox Rusiya qaldırır. Rusiya çalışır ki, Qarabağ erməniləri ilə bağlı Paşinyana təzyiq göstərsin və revanşist qüvvələrin əlinə əlavə imkanlar vermiş olsun. Yəni revanşist qüvvələri fəallaşdırsın. Moskvanın məqsədi Qarabağ erməniləri vasitəsi ilə Ermənistanda Kremlə bağlı marionet rejim qurmaqdır. Baxın, bu günlərdə Rusiya Qarabağ ermənilərinə humanitar yardım göstərmək istəyib, amma Paşinyan buna razılıq verməyib. Niyə məhz indi? Ona görə ki, Ermənistan parlament seçkilərinə hazırlaşır. Rusiya humanitar yardım göstərməklə revanşistlərin mövqelərini möhkəmləndirmək istəyir. Başqa bir tərəfdən, Azərbaycan Qarabağ ermənilərinin qayıtmasına qarşı deyil. Onlar bizim qanunları qəbul etməlidilər. Digər tərəfdən Ermənistandan qovulan azərbaycanlıların geri qayıtmasına rəsmi İrəvan razılıq verməli və buna şərait yaratmalıdır. Paşinyanın çıxışı həm də o deməkdir ki, Qarabağ erməniləri geri qayıtmaq istəmir və Avropa Parlamenti bunu nəzərə almalıdır. Yəni bundan bir təzyiq vasitəsi kimi istifadə edib regionda gərginliyə səbəb olacaq addım atmamalıdır. Paşinyan həm də bununla Avropadan iqtisadi yardım umur ki, Qarabağ erməniləri üçün Ermənistanda şərait qurulsun”.
Vidadi ORDAHALLI
