Arzuxan Əlizadə: “Bunun davamlı hal alması Ankara ilə Tehran arasında münasibətlərin gərginləşməsinə gətirib çıxara bilər”
İrandan atılan üçüncü raket Türkiyənin hava məkanında məhv edilib. Belə ki, İrandan gələn və Türkiyə hava məkanına daxil olan ballistik sursat Şərqi Aralıq dənizində yerləşdirilən NATO hava və raketdən müdafiə vasitələri tərəfindən zərərsizləşdirilib. Bu barədə Türkiyə Milli Müdafiə Nazirliyinin yaydığı bəyanatda qeyd olunub.
“Ölkəmizin ərazisinə və hava məkanına yönəlmiş hər hansı bir təhdidə qarşı bütün zəruri tədbirlər qətiyyətlə və tərəddüd etmədən görülür. Hadisənin bütün aspektlərini aydınlaşdırmaq üçün müvafiq ölkə ilə məsləhətləşmələr aparılır. Bölgədəki bütün inkişaflar milli təhlükəsizlik prioriteti olaraq diqqətlə izlənilir və qiymətləndirilir”, – məlumatda qeyd olunub.
Məlumat üçün qeyd edək ki, bundan əvvəl də İran tərəfindən Türkiyə istiqamətində 4 və 9 martda 2 dəfə raket atılıb. Hər iki raket havada məhv edilib.
Maraqlıdır, raket atışlarının davam etməsi Türkiyə ilə İranın arasında toqquşmaya, münasibətlərin gərginləşməsinə gətirib çıxara bilərmi?
Sözügedən məsələni baki-xeber.com-a şərh edən AMİP sədri, millət vəkili Arzuxan Əlizadə hesab edir ki, İrandan Türkiyəyə raket atışlarının davamlı hal alması Ankara ilə Tehran arasında münasibətlərin gərginləşməsinə gətirib çıxara bilər: “Bunun iki ölkə arasında hərbi toqquşmaya gətirib çıxaracağı hələ ki, real deyil. Türkiyə ciddi dövlətçilik ənənələrinə malik olduğu üçün maksimum çalışacaq ki, belə təxribatlara alət olmasın. Ona görə ki, raketin atılmasında üçüncü tərəflərin də maraqları var. O mənada ki, iki müsəlman ölkəsini qarşı-qarşıya gətirmək istəyirlər. Türkiyə ona görə hələlik cavab zərbəsi endirmir ki, İran əhalisinin yarısı azərbaycanlı və digər türkdilli xalqlardır. Ölkə prezidenti azərbaycanlıdır. Başqa bir tərəfdən Türkiyə cəmiyyətində son dövrlər İsrail əleyhinə ovqat xeyli güclənib. Prezident Ərdoğan həm də bu amili nəzərə alır. İrandakı molla rejimi, mühafizəkar qanad başını itirsə də rəsmi Ankara islam həmrəyliyindən çıxış edərək təmkinli davranır. Ancaq bu, o demək deyil ki, Türkiyə sonsuza qədər təmkinli davranacaq. İndiyə qədər İrandan Türkiyəyə atılan bütün raketlər vurulub. Əgər növbəti dəfə Allah göstərməsin atılan raket insan tələfatına və ya ciddi dağıntılara səbəb olsa, o zaman Türkiyənin cavabı sərt ola bilər. O üzdən, ümid edək ki, belə hallar bundan sonra təkrarlanmayacaq”.
Vidadi ORDAHALLI
