Əli Mustafa: “Azərbaycan ortaya qoyduğu real işlə vasitəçilərin əsl niyyətini ifşa etdi və bütün dünya bunu gördü”
Prezident İlham Əliyev XIII Qlobal Bakı Forumunun açılış mərasimindəki çıxışında deyib ki, özlərini Minsk qrupu adlandıran vasitəçilərin 28 illik fəaliyyəti bir fəlakət idi:
“Həmsədrlərin məqsədi münaqişəni dondurmaq, onu əbədiləşdirmək və hər iki ölkəyə qarşı təzyiq aləti kimi istifadə etmək idi. Biz qərara gəldik ki, bu dırnaqarası vasitəçilikdən qurtulmalıyıq və ikitərəfli formatda – heç bir üçüncü tərəf olmadan fəaliyyətə başlayan kimi sülhə nail olduq. Beləliklə, bu bir təcrübədir və bu, sadəcə, nəzəriyyə deyil, bu, bizim yaşadığımız, indi isə şahid olduğumuz bir reallıqdır. Hesab edirəm ki, mövcud münaqişələrin həlli istiqamətində çalışarkən bu məsələ mütləq nəzərə alınacaq”.
Sözügedən məsələni baki-xeber.com-a şərh edən siyasi ekspert Əli Mustafa hesab edir ki, Prezidentin Minsk qrupu həmsədrləri ilə bağlı fikirləri tamamilə doğrudur: “Azərbaycan 30 il ərzində beynəlxalq vasitəçilərin vasitəsilə işğal altında olan ərazilərini azad edə bilmədi. Çünki bəlli oldu ki, ATƏT-in Minsk qrupunun həmsədrləri münaqişəni həll etmək deyil, münaqişəni saxlamaqda və bundan hər iki dövlətə təzyiq vasitəsi kimi istifadə etməkdə maraqlıdılar. Ona görə ki, münaqişənin mövcudluğu onların da regionda qalması demək idi. Münaqişə üzərindən burada özlərinin geosiyasi maraqlarını reallaşdırmaq istəyirdilər. Bu baxımdan həmsədrlər vasitəçilik missiyası ilə çıxış etmələrinə baxmayaraq, əslində öz vasitəçiliklərinin əbədi olmasına daha çox çalışdılar. Nəinki münaqişənin həllinə. Bu baxımdan hesab edirəm ki, əgər moderatorlar ədalətli və obyektiv deyilsə, münaqişənin həllini istəmirlərsə, öz missiya və vəzifələrini yerinə yetirmirlərsə, o halda onlara ehtiyac yoxdur. Azərbaycan ortaya qoyduğu real işlə vasitəçilərin əsil niyyətini ifşa etdi və bütün dünya bunu gördü. Azərbaycan Ermənistanla ikitərəfli danışıqlara üstünlük verməklə problemlərin həllinə nail oldu. Ancaq üç həmsədr prosesin içində olanda münaqişə 30 il uzandı. Hesab edirəm ki, bu, çox doğru təsbitdir. Regiondakı məsələlərin dünyanın nəzərinə çatdırılması baxımından da sözügedən forum əslində yaxşı bir fürsətdir. Yəni Cənubi Qafqazda yaşananlarla bağlı doğru arayış idi ki, Prezident də onu reallaşdırdı”.
Vidadi ORDAHALLI
