İrana qarşı hücumlarını davam etdirən ABŞ-ın bölgəyə əlavə qoşun göndərməyə hazırlaşdığı iddia edilir. ABŞ mediası Pentaqonun Yaxın Şərqə təxminən 2500 dəniz piyadasından ibarət kəşfiyyat bölməsi göndərəcəyini yazıb.
“Wall Street Journal” qəzetinə danışan iki ABŞ rəsmisinin sözlərinə görə, ABŞ Yaxın Şərqdəki qoşunlarının sayını artırır.
Onlar iddia edir ki, İran Hörmüz boğazına hücumlarını artırdığı bir vaxtda, ABŞ müdafiə naziri Pit Heqset Yaxın Şərqə dəniz piyadası kəşfiyyat bölməsinin yerləşdirilməsini təsdiqləyib.
Rəsmilər tələbin ABŞ Mərkəzi Komandanlığından (CENTCOM) gəldiyini və dəniz piyada bölməsinin təxminən 2500 əsgərdən ibarət olduğunu bildiriblər.
Pentaqon sözçüsünün iddia ilə bağlı şərh verməkdən imtina etdiyi bildirilən xəbərdə, bu addımın Hörmüz boğazının bağlanması ilə, qlobal iqtisadiyyatın zəifləməsi, yanacaq qiymətlərinin bahalaşması və prezident Donald Trampa böyük siyasi çətinlik yaratdığı bir vaxtda təsadüf etdiyi vurğulanır.
Qəzet bölgəyə əlavə hərbi gəmilərin də göndərildiyini bildirib. Qeyd olunub ki, bu addım İranla müharibəyə əməliyyat hazırlığı kimi nəzərdə tutulub.
Bu arada, ABŞ, İsrail ilə birlikdə, İrana qarşı hücumlarının ikinci həftəsində ABŞ Mərkəzi Komandanlığının və Avropa Komandanlığının (EUCOM) yurisdiksiyası altındakı ərazilərdə 160-dan çox hərbi yanacaqdoldurma təyyarəsi yerləşdirib.
Açıq mənbəli məlumatlardan toplanan məlumata görə, 17 KC-46A "Pegasus" və 62 KC-135 "Stratotanker" təyyarəsi əməliyyat ərazisinin yaxınlığındakı CENTCOM tərəfindən idarə olunan aerodromlarda, eləcə də Böyük Britaniya-ABŞ birgə bazası olan Dieqo Qarsiyada yerləşdirilib. Bunlardan 40-dan çoxunun da İsraildəki Ben Qurion Hava Limanında göndərildiyi bildirilir.
Bundan əlavə, təxminən 36 KC-135 və 1 KC-46A təyyarəsi Cənubi Avropa və Aralıq dənizindəki bazalara yerləşdirilib. Bu təyyarələr, ehtimal ki, Böyük Britaniyadan gələn təyyarələrə yanacaq doldurmaq üçün nəzərdə tutulub.
Tahir TAĞIYEV
