Rəsul Cahangirli: “Bu, o deməkdir ki, heç bir məmur pozuntulara yol verdiyinə görə cəzasız qalmayacaq”
Prezident İlham Əliyev yerli telekanallara müsahibəsində deyib ki, mənim qərarlarımın bir çoxu məhz ictimai nəzarət nəticəsində verilib.
Ölkə qeyd edib ki, bunu indi ictimaiyyət bilmir, amma yerlərdən gələn siqnallar yoxlanılır və qeyd etdiyim bu uğursuz təyinatlarla bağlı siqnallar yerlərdən gəlir: “Əgər yerlərdən siqnal gəlməsə, onda mən haradan biləcəyəm? Onlar bir neçə dəfə yoxlanılır və bir neçə qurum tərəfindən, bir qurum yox, bir neçə qurum ki, burada şəxsi-qərəz olmasın. Ondan sonra bu, öz təsdiqini tapanda artıq qərar qəbul edilir və bütün məmurlar onu bilməlidirlər”.
Sözügedən məsələ ilə bağlı fikirlərini bakı-xeber.com-la bölüşən ekspert Rəsul Cahangirli hesab edir ki, bu, bir sıra məqamlardan xəbər verir: “Bu, o deməkdir ki, heç bir məmur pozuntulara yol verdiyinə görə cəzasız qalmayacaq. Xüsusən bölgələrə təyin edilən nümayəndələr, icra başçıları, digər vəzifəli şəxslər özlərini elə aparırlar ki, sanki onların özbaşınalıqlarından kimsənin xəbəri yoxdur. Elə icra başçıları var ki, feodal təfəkkürlə rayonu idarə edir. Sakinlərin problemlərini, şikayətlərini görməzdən gəlirlər. Rayonların infrastrukturuna - yolların təmirinə, digər sosial məqsədlər üçün ayrılan vəsaitləri mənimsəyirlər. Sakinləri incidirlər. Təbii ki, bütün bunlar insanların narazılığına səbəb olur. Nəticədə mərkəzə müxtəlif formada şikayətlər edilir. Eləsi var ki, sosial şəbəkə üzərindən şikayət edərək problemləri ictimaiyyətin, bəlli qurumların diqqətinə çatdırır. İndiyə qədər bir neçə icra başçısı, digər vəzifəli şəxslər həbs edilib. Hesab edirəm ki, ictimai nəzarət artsa, neqativ hallar azalacaq”.
Vidadi ORDAHALLI
