ABŞ həftələrdir təqib etdiyi Rusiya bayrağı altında üzən “Marinera” tankerini ələ keçirib. Bu barədə ABŞ-ın Avropa Komandanlığı X sosial media platformasında açıqlama yayıb.
Əvvəllər Panama bayrağı ilə “Bella 1” adı altında üzən gəmi, sanksiyaları pozduğuna görə, ABŞ Ədliyyə Nazirliyi tərəfindən Müharibə Nazirliyinin dəstəyi ilə Şimali Atlantikada dayandırılıb. Açıqlamada əməliyyatın ABŞ Prezidentinin Qərb yarımkürəsində təhlükəsizliyi təmin etmək üçün verdiyi göstərişlərə uyğun olaraq həyata keçirildiyi bildirilir.
ABŞ "Karib dənizində qanunsuz fəaliyyətlər həyata keçirdiyini" iddia etdiyi başqa bir sanksiyalı tanker olan “M/T Sophia”nın da ələ keçirildiyini açıqlayıb.
Bundan bir neçə saat əvvəl yayılan xəbərlərdə deyilirdi ki, ABŞ Sahil Mühafizəsi Venesuelanı tərk etdikdən sonra Rusiya bayrağını qaldıran və Rusiya yurisdiksiyasını tanıdığını elan edən “Marinera” tankerini ələ keçirmək üçün əməliyyata başlayıb. “Reuters” agentliyi ABŞ ordusunun da dəstəklədiyi əməliyyat zamanı ərazidə Rusiya sualtı qayığının və digər Rusiya gəmilərinin olduğunu bildirib.
“RT”yə danışan mənbə bildirib ki, helikopter gəminin ətrafında dövrə vurub və bir komandolar göyərtəyə enməyə cəhd edib. "The Times" qəzeti Kral Hərbi Hava Qüvvələrinə məxsus “Boeing Poseidon MRA1” təyyarəsinin əməliyyatın bir hissəsində iştirak etdiyini bildirib.
Tanker ABŞ Sahil Mühafizəsi tərəfindən iki həftədən çoxdur ki, izlənilirdi. Panama bayrağı altında üzən gəmi, dekabr ayında ABŞ Prezidenti Donald Trampın elan etdiyi blokadaya baxmayaraq, Venesuela sularına yaxınlaşmağa çalışıb. Cənubi Amerikadan uzaqlaşdıqdan sonra tanker ABŞ Sahil Mühafizəsi gəmiləri tərəfindən izlənilib. Daha sonra gövdəsində Rusiya bayrağı qaldıraraq adını “Marinera” olaraq dəyişdirib. Moskva gəminin beynəlxalq dəniz qanunvericiliyinə uyğun olaraq milli bayrağı altında üzdüyünü bildirib.
CBS News və CNN xəbər verir ki, gəminin ələ keçirilməsi Vaşinqtonda günlərdir müzakirə olunurdu. ABŞ Venesuela sahillərindəki əməliyyatlarını qanunsuz neft daşınmaları və bəzi tankerlər tərəfindən saxta bayraqlardan istifadə edilməsi ilə əsaslandırır.
Bu, Vaşinqton və Moskva arasında Tramp administrasiyasının Latın Amerikası ölkəsinə qarşı blokadasına təhdid yaradan yeni bir qarşıdurma nöqtəsi kimi ortaya çıxır. Maduro rejiminin güclü tərəfdarı olan Kreml xəbərə dərhal reaksiya verməyib, sadəcə ABŞ-ın tankerə "qeyri-mütənasib" yanaşmasını tənqid edib.
Tahit TAĞIYEV
