Məlum olduğu ki, Azərbaycanın rayonlarında fəaliyyət göstərən bir qrup stomatoloq işdən çıxarılıb. Həmin stomatoloqlar buna etiraz olaraq yanvarın 7-də TƏBİB-in inzibati binasının qarşısında aksiya keçirib. Qeyri-qanuni işdən çıxarıldıqlarını iddia edən stomatoloqlar öz işlərinə bərpa olunmalarını istəyirlər.
İddialara görə, 150-200 minlik əhalisi olan rayonlarda xəstəxanaların hər birində cəmi 3 stomatoloq ştatda saxlanılıb. Aksiyaya yığışanlar bildirib ki, rayonlarda stomatoloqlara ehtiyac daha böyükdür. Bu səbəbdən də onların ixtisar olunması düzgün deyil.
Onu da qeyd edək ki, zamanla bölgələrdə həkim çatışmazlığının şahidi olmuşuq. Stomotologiya sahəsində də bu hal müşahidə olunub.
Maraqlıdır, bölgələrdə stomatoloq çatışmazlığı olduğu halda ixtisar qərarı hansı əsaslara söykənir?
TƏBİB: “Stomatoloji xidmətlərin mövcud şəraitdə əvvəlki həcmlərdə davam etdirilməsi iqtisadi cəhətdən səmərəli hesab edilmir”
Məsələ ilə bağlı TƏBİB-dən “Bakı-Xəbər”ə bunlar bildirildi: “Xidmətlər Zərfinə daxil olmayan və dövlət tibb müəssisələri tərəfindən əhaliyə ödənişli əsaslarla göstərilən tibbi xidmətlərin tarifləri, həmçinin sığortaolunan hesab edilməyən şəxslərə göstərilən tibbi xidmətlərin tarifləri TƏBİB-in Müşahidə Şurasının müvafiq qərarları ilə tənzimlənir. Stomatoloji xidmətlərin əksəriyyəti (149 adda xidmət) icbari tibbi sığorta təminatına daxil deyil və yalnız ödənişli əsaslarla həyata keçirilir. Bu xidmətlərin tarifləri TƏBİB-in Müşahidə Şurasının 21 iyul 2025-ci il tarixli 18-1/17-Q/2025 nömrəli qərarı ilə təsdiq edilib.
Son dövrlərdə stomatoloji xidmətlərin təşkili və şəffaflığın artırılması məqsədilə aparılan geniş təhlillər zamanı müxtəlif regionlarda stomatoloqların xidmət həcmi, iş yükü və real ehtiyac göstəriciləri araşdırılıb. Təhlillər nəticəsində bəzi stomatoloji xidmətlərin faktiki tələbatdan artıq olduğu, mövcud resursların qeyri-səmərəli istifadə edildiyi, ödənişlərin tam şəkildə nağdsız qaydada rəsmiləşdirilməməsi səbəbindən büdcə daxilolmalarının azaldığı müəyyən edilib. Həmçinin, bəzi regionlarda stomatoloqların sayının real ehtiyacı üstələməsi əlavə maliyyə yükünün yaranmasına səbəb olub. Stomatoloji xidmətlərin göstərilməsi zamanı istifadə olunan maddi resurslar (işçi heyəti üzrə əməkhaqqı xərcləri, avadanlıqların saxlanması, dərman və sərfiyyat materialları, kommunal xərclər və s.) bu xidmət üzrə əldə edilən maliyyə gəlirlərini üstələyir. Bunun nəticəsində stomatoloji xidmətlərin mövcud şəraitdə əvvəlki həcmlərdə davam etdirilməsi iqtisadi cəhətdən səmərəli hesab edilmir”.
Qeyd edilir ki, Əmək Məcəlləsinin 11-ci maddəsinin “ə” bəndinə əsasən, əmək şəraitinin şərtlərini dəyişdirmək, eləcə də işçilərin sayını və ya ştatlarının ixtisar edilməsi işəgötürənin hüquqlarından biridir: “Həmin Məcəllənin 70-ci maddəsinin “b” bəndinə əsasən, işçilərin sayının və ya ştatlarının ixtisar olunması əmək müqaviləsinə xitam verilməsi əsaslarından hesab olunur”.
Adil Qeybulla: “Bir yerdə həkim çatmır, digər yerdə həkim artıqlığından ixtisarlar gedir, bunu bu şəkildə etmək qətiyyən yolverilməzdir”
Professor, tibbi ekspert Adil Qeybulla “Bakı-Xəbər”ə şərhində bildirdi ki, tibb kadrların düzgün yerləşdirilməsi çox mühüm şərtdir: “Elə regionlar var ki, orada həkim kadrlar çatmır. Həmin yerlərdə həkimlər ixtisar olunmamalıdır. Hər hansı bir dövlət xəstəxanalarında ştat artıqlığı varsa, regionlarda bunu tənzimləmək lazımdır. Yəni, bir yerdə həkim çatmır, digər yerdə həkim artıqlığından ixtisarlar gedir. Bunu bu şəkildə etmək qətiyyən yolverilməzdir”.
Günel CƏLİLOVA
