Mehman İsmayılov: “Putin ABŞ prezidenti Donald Trampın qətiyyətli addımlarından ehtiyatlanmağa başlayıb”
Bəzi media orqanlarında, xüsusən beynəlxalq mediada ayrı-ayrı şəxslərin belə bir fikrinə rast gəlinir ki, Venesuelada baş verən hadisədən, yəni Maduronun ABŞ-a gətirilməsindən sonra Putin öz mühafizəsini bir neçə qat artırıb. Yəni onunla bağlı əvvəlkindən daha güclü şəkildə xüsusi mühafizə qaydaları həyata keçirilib, onun şəxsi mühafizəsini qat - qat artırıb.
Belə versiya var, Putin ehtiyat edir ki, birdən Maduro ilə bağlı aparılan əməliyyatın eynisi onun da başına da gələ bilər. Qərb mediasında bu fikrin üstündə çox dayanılır. Yəni doğrudanmı, Rusiyada hakimiyyət dairələri Qərbin, Amerikanın Putinlə bağlı belə bir əməliyyat həyata keçirilə biləcəyinə ciddi yanaşırlar? Həqiqətənmi onlar belə bir niyyətin ciddi olduğunu qəbul ediblər və buna görə də Putinin mühafizəsini gücləndiriblər? O mənada yox ki, Qərb ölkələri belə bir əməliyyat həyata keçirə bilər, bilməz, bu başqa məsələdir.
Əsas odur ki, Qərb ölkələrinin Putinə bağlı da Maduroya edildiyi kimi bir əməliyyatın keçirilə biləcəyinə Rusiyada belə ciddi baxırlar və Putinin mühafizəsini gücləndirirlər?
Politoloq Mehman İsmayılov “Bakı-Xəbər”ə “Əlbəttə, Kreml hakimiyyəti, xüsusən də Putin ABŞ prezidenti Donald Trampın qətiyyətli addımlarından ehtiyatlanmağa başlayıb. 2025-ci ilin 28-29 dekabrında Putin hakimiyyəti bir feyk tirajladılar ki, guya Ukraynanın xüsusi xidmət orqanları Rusiya prezidentinin Novqorod vilayətindəki rezidensiyasına zərbə endirib. Sonra da məlum oldu ki, bu feykdir”-deyə bildirdi.
M.İsmayılovun sözlərinə görə, Putin hakimiyyəti danışıqları uzatmaq, Ukrayna ilə birbaşa təmasdan boyun qaçırmaq üçün oyun qurublar və bunu da dərhal amerikalılar başa düşdülər, Donald Tramp buna inanmadığını söylədi. “Sonra Lavrov çıxış edib dedi ki, biz Amerika ilə danışıqlar prosesində qalmaqda davam edəcəyik, amma Ukraynaya qarşı tələblərimiz sərtləşdiriləcək. Onda Tramp adminstrasiyası anladı ki, Putin və onun komandası Trampa qarşı oyun oynayır. Bir neçə gün bundan əvvəl Ağ Evin rəsmi səhifəsində qara fonda iki şəkil qoyulmuşdu. Birinin üzərində rus, o birinin üzərində fars dilində yazmışdılar ki, Donalt Trampla oyun oynamayın. Bu Maduronun 37 dəqiqəlik xüsusi əməliyyat nəticəsində həbs olunub Amerikaya aparılması fonunda yazılmışdı. Bu Putin üçün çox ciddi xəbərdarlıqdır. Ümumiyyətlə, indi Donald Tramp Putini publik müstəvidə aşağılayır və onun bütün maraqlarına çox ciddi zərbələr vurur. Putin rejimi Trampa heç cür cavab verə bilmir. Çünki Ukraynaya qarşı aqressiv müharibədən sonra Rusiya özünün hərbi potensialını, iqtisadi gücünü və əlaqələrini tamamilə itirib. Bu gün Rusiya artıq beynəlxalq hüququn subyekti deyil, bir obyektdir və Çinlə ABŞ arasında alver predmetinə çevrilib. Maduro Putinin şəxsi dostu idi və 2025-ci ilin may ayında Venesuela ilə Rusiya arasında strateji tərəfdaşlıq haqda müqavilə imzalanıb. Venesuelanın neftini Rusiya oğurluq yolla gizli tankerlərlə daşıyıb aparırdı. Maduronu müdafiə etməli olan bütün hava hücumundan müdafiə sistemləri, silahlar hamısı Rusiya silahları idi ki, səslərini belə çıxara bilmədilər. ABŞ-ın silahları, xüsusi xidmət orqanları, xüsusi təyinatlı qüvvələri qarşısında Rusiyanın silahları səslənmədi. Hətta ABŞ-ın müdafiə naziri Rusiyanı ələ salıb dedi ki, Rusiyanın hava hücumlarından müdafiə sistemi yaxşı çalışmadılar, amma onlar ümumiyyətlə çalışa bilmədilər. Bir göz qırpımında amerikalılar bu əməliyyatı həyata keçirdilər, Maduronu həbs edib həyat yoldaşı ilə birgə yatağından apardılar. Əlbəttə ki, Maduro bir cinayətkardır və ABŞ məhkəməsi qarşısında cavab verməyə məcbur ediləcək. Çünki Maduronun Rusiyanın, İranın, hətta Çinin dəstəyi ilə törətdiyi bir sürü cinayətlər var ki, o ABŞ-ın milli maraqlarına zərbələr vururdu və ona görə də Birləşmiş Ştatlar bu cür addım atdı. Bunun arxasınca Atlantik okeanda Rusiyanın bir tankerini həbs etdilər. Rusiyanın yenə səsi çıxmadı. Sadəcə olaraq Rusiyanın Xarici İşlər Nazirliyi belə bəyanat yaydı ki, biz tezliklə ekipajın Rusiyaya qaytarılmasını, orada insan hüquqlarına hörmət edilməsini tələb edirik. Putin soruşa bilmir ki, sən nə üçün Rusiyanın tankerini həbs etmisən. Bu da azmış kimi üstündən bir gün keçmiş Karib dənizində Rusiyanın “Sofiya” adlı bir tankerini də yenə ABŞ həbs etdi və ekipajını Amerikaya apardılar. Bu da azmış kimi, indi də Rusiyanın başqa dostlarını-Kubanı, Kolumbiyanı, Meksikanı ABŞ hədələyir. Yəni bu gün Putin çox ciddi şəkildə həyacan keçirir ki, ABŞ Ukraynanın əli ilə ona qarşı bir əməliyyat hazırlaya bilər. Bu gün Kreml hakimiyyəti, Rusiyanın xüsusi xidmət orqanları, Rusiyanın Müdafiə Nazirliyi Amerikanın keçirə biləcəyi heç bir tədbirə cavab vermək gücündə deyil. Sadəcə, Putin hakimiyyəti feyk tirajlayır, dünyaya qorxu ixrac edir. Amma konkret hadisələrə gələndə hər şey ortaya çıxır və məlum olur ki, Rusiyanın gücü sadəcə təbliğatdadır, feyk yaymaqdadır, dinc insanları kütləvi şəkildə qətlə yetirib insanlığa qorxu yaşatmaqdadır. Amerikanın son günlər apardığı əməliyyatlar Rusiyanın, Putinin, Kremlin hakimiyyətinin reytinqini birmənalı şəkildə sıfırladılar”-deyə M.İsmayılov qeyd etdi.
İradə SARIYEVA
