Prezident İlham Əliyev Azərbaycan telekanallarına müsahibəsində son dövrlər vəzifələrə təyin etdiyi bəzi kadrların onun etimadını doğrultmadığını bildirib.
Prezident vurğulayıb: “Məsələn, mən Naxçıvanda da xüsusi nümayəndə institutu yaratmışam. Ancaq əfsuslar olsun ki, oraya təyin etdiyim kadr etimadımı doğrultmayıb və buna görə vəzifəsindən çıxarılmışdır. Bu yaxınlarda Bakının rayonlarının birinə icra başçısı təyin edilmişdir. Özü də noyabr ayındakı o təyinatda qrup şəklində bir neçə icra başçısı təyin edilirdi. İnsanlara diqqət, iş adamlarına dəyməmək, rüşvətxorluğa, korrupsiyaya qarşı mübarizə, sosial ədalət barədə mənim verdiyim tapşırıqlar, sözlər mətbuatda gedib. Amma təyin etdiyim adamlardan birini mən bir aydan sonra vəzifəsindən çıxartmışam. Yəni bu, məni çox məyus edir. Çünki bilirsiniz, mən artıq 22 ildir ki, bu vəzifədəyəm və bu illər ərzində bir çox kadrları vəzifəyə təyin etmişəm, etimad göstərmişəm. Hər dəfə yeni təyin edilən icra başçısı ilə mənim ya görüşlərim, ya telefonla söhbətim olur. Onların bəziləri televiziyaya, mətbuata verilir, bəziləri verilmir və tövsiyələrim də təxminən çox da dəyişmir. Məyus edən də odur ki, əfsuslar olsun, gənc kadrlar arasında da pozuntulara yol verənlər var. Yəni burada gənc nəsil, yaşlı nəsil söhbəti getmir. İnsanların keyfiyyətindən söhbət gedir, ailədə, məktəbdə, cəmiyyətdə aldığı tərbiyədən söhbət gedir. Ona görə etimad göstərilir, onu doğruldan həmişə dəstəklənir. Mən həmişə kadrlara ədalətli olmuşam. Amma etimadı doğrultmayan, əyri yola gedənlər, əlbəttə ki, ya cinayət məsuliyyətinə cəlb edilir, - belə hallar kifayət qədər çoxdur, - ya da ki, inzibati qaydada cəzalandırılır...”
Prezidentin etimadını doğrultmayan kadrlardan biri onun keçən ilin noyabr ayında Naxçıvan Muxtar Respublikasında Azərbaycan Prezidentinin səlahiyyətli nümayəndəsi vəzifəsindən azad etdiyi Fuad Nəcəflidir ki, o, bu vəzifəyə 2022-ci ilin dekabrında təyin olunmuşdu.
Fuad Nəcəflinin təyinatı cəmiyyətdə də ajeotaj yaratmışdı. Naxçıvanlılar inanırdılar ki, F.Nəcəfli Prezidentin etimadını doğruldacaq və vəzifəsini vicdanla həyata keçirəcək. F.Nəcəfli də vəzifəsinə başlar-başlamaz özünü reklam etməklə məşğul oldu, küçəyə-bazara çıxdı, camaatın “dərdini” dinlədi, görüşlər keçirdi, insanlara bolluca vədlər verdi, amma sözləri ilə əməlləri bir-birini tutmadı. Qısa müddətdən sonra onun əməlləri ilə bağlı mediada məlumatlar yayılmağa, ictimaiyyət arasında söz söhbətlər, narazılıq dolaşmağa başladı. Onun gününü eyş işrətlə keçirdiyi, vəzifəsi ilə məşğul olmadığı tez bir vaxtda ifşa olundu. Özünü camaata vicdanlı kadr kimi göstərmək məqsədilə Naxçıvan MR-ın keçmiş rəhbərliyini yartımaz fəaliyyətdə də ittiham etdi. Hətta sonralar məlumatlar yayıldı ki, onun özünün də fəaliyyəti yarıtmazdır. Öz vəzifəsini doğru-dürüst icra etmədiyinə görə sonda işdən çıxarıldı. Prezident də açıq şəkidlə dedi ki, o, mənim etimadımı doğrultmadı.
Yeri gəlmişkən, Fuad Nəcəfli vəzifəsindən azad edildikdən sonra, onun qanunsuz əməlləri ilə bağlı bir sıra faktlar aşkara çıxdı. Məsələn, mediada yazılanlara görə, Naxçıvan Muxtar Respublikasının Ehtiyat Fonduna məxsus illərdir strateji məhsul kimi anbarlarda qorunub saxlanılan 10 min tondan çox buğda dəyərindən ucuz qiymətə formal olaraq Naxçıvan Taxıl Məhsulları MMC-yə satılıb. Nəticədə dövlətə 3,5 milyon manat ziyan dəyib. Biz yalnız bir faktı qeyd etdik, yazmadığımız onlarla fakt isə media səhifələrində öz əksini tapıb.
Prezident ilham Əliyevin etimadını doğrultmayan kadrlardan biri də Nəsimi Rayon İcra Hakimiyyətinin başçısı Elxan İbrahimovdur ki, dövlət başçısı onu bu vəzifəyə keçən ilin noyabrında təyin etmişdi. Amma o, Nəsimi rayon icra başçısı vəzifəsində cəmi 42 gün işləyə bildi, yarıtmaz əməllərinə görə 2025-ci ilin 29 dekabrında Prezidentin sərəncamı ilə vəzifəsindən azad olundu.
Qeyd edək ki, E.İbrahimov Prezident İlham Əliyevin 12 noyabr 2025-ci il tarixli sərəncamı ilə Kürdəmir Rayon İcra Hakimiyyətinin başçısı vəzifəsindən azad olunub Nəsimi Rayon İcra Hakimiyyətinin başçısı təyin edilmişdi.
Prezidentin etimadını doğrultmayan bəzi kadrların yarıtmaz fəaliyyəti onların yaşları ilə bağlı deyil, aldıqları tərbiyə ilə əlaqədardır. Çünki ailədə, məktəbdə, universitetdə normal tərbiyə alan, dövlətinə xidmət etmək istəyən bir kadr heç zaman ona etimad göstərib yüksək vəzifəyə təyin edən ölkə başçısının etimadını qırmaz.
İradə SARIYEVA
