İbrahim Rüstəmli: “...İnanmıram ki, birgə hərbi təlimlərə hansısa türk dövləti razı olmasın”
Azərbaycan Prezidenti İlham Əliyev yanvarın 5-də yerli televiziya kanallarına müsahibəsində keçən il oktyabrın 7-də Qəbələdə Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşündə üzv ölkələrin birgə hərbi təlimlər keçirməsi ilə bağlı irəli sürdüyü təklif barədə də danışıb.
Prezident İlham Əliyev müsahibəsində bildirib: “Qəbələdəki Zirvə Görüşündə mən bu tezisdən daha da irəli gedərək təklif etdim ki, bu il Azərbaycanda üzv ölkələrin birgə hərbi təlimləri keçirilsin. Hesab edirəm ki, buna da ehtiyac var. Biz üzv ölkələrlə ikitərəfli formatda hərbi təlimlər keçiririk. Təbii ki, ən çox Türkiyə ilə, amma digər ölkələrlə də. Ancaq birgə hərbi təlimlərin keçirilməsində həm böyük rəmzi məna ola bilər, eyni zamanda, praktik nöqteyi-nəzərdən buna ehtiyac var...
...Nəzərə alsaq ki, bu gün bütün ölkələr üçün bu, bir nömrəli məsələdir, ona görə təklifim qüvvədədir. Biz indi mesajlarımızı müxtəlif diplomatik kanallarla göndəririk. Əgər ümumi razılıq olarsa, onda biz bu il bu təlimləri görəcəyik. Əgər görsək ki, təlim keçirilmədi, deməli, gərək sual verəsiniz “Kim bunu dəstəkləmədi?”. Amma mən ümid edirəm ki, bütün üzv ölkələr bunu dəstəkləyəcək”.
Prezident İlham Əliyev dedi ki, türk dövlətlərinin bu il birgə hərbi təliminin keçirilməsini təklif etmişəm.
Türk dövlətlərinin hamısı bu təlimə hazırdımı? Bu ilki təlimlərə hansı türk dövlətləri hazır deyil?
“Bu təsirlər də müəyyən mənada bəzi dövlətlərin mövqeyini laxladır”
Hərbi ekspert İbrahim Rüstəmli baki-xeber.com-a bildirdi ki, bu cür təlimlərin keçirilməsi Azərbaycanın regiondakı mövqelərini daha da gücləndirən amillərdəndir. İ.Rüstəmli qeyd etdi ki, Azərbaycan Cənubi Qafqazın ən güclü və nüfuzlu dövləti kimi bu cür təlimlərdə təşkilatçılıq missiyasını yerinə yetirməkdə maraqlıdır. “Çünki türk dövlətlərinin vahid bir cəbhədə birləşməsi müasir qarışıq dünyada çox mühüm əhəmiyyət daşıyır.
Birgə hərbi təlimlərə hansı türk dövlətlərinin hazır olmadığını soruşursunuz. Bütövlükdə götürəndə inanmıram ki, birgə hərbi təlimlərə hansısa türk dövləti razı olmasın. Hətta deyərdim ki, belə bir təlimlərin keçirilməsi hər bir türk dövləti üçün mənəvi baxımdan da mühüm əhəmiyyət daşıyır. Bu baxımdan inanıram ki, Azərbaycanın bu mühüm təklifinə TDT-yə üzv olan bütün dövlətlər dəstək verəcək və bu təlimlərə qatılacaq”.
Bununla belə İ.Rüstəmli onu da dedi ki, qloballaşmış dünyada müəyyən təsirlər var və bəzən hansısa bir dövlət başqa bir dövlətin təsiri altında ola bilir. Ekspert konkret ad çəkməsə də bildirdi ki, keçmiş Sovet İttifaqının tərkibində olmuş türk dövlətlərinin bəziləri regionun nüfuzlu dövləti olan Rusiyanın təsiri altındadır. “Ona görə də hər hansı bir türk dövlətinin bu təlimlərə hazır olub olmamasından çox hər hansı bu dövlətin bu təlimlərdə iştirak etmək həvəsində olub olmamasından danışmaq istəyirəm. Əslində, mənəvi, psixoloji, ruhi, mədəni, siyasi, iqtisadi cəhətdən bu dövlətlərin hamısı əlbəttə, vahid bir məxrəcdə birləşmək istəyərlər. Amma istəmək azdır. Bəzən elə təsirlər olur ki, hər hansı bir dövlət öz istəyini, belə təlimlərə hazır olduğunu ifadə edə bilmir. Fikrimcə, belə bir təlimlərin keçirilməsində bütün türk dövlətlərinin iştirakı önəmlidir. Yaxud bütün türk dövlətləri belə bir təlimin keçirilməsini istəyir. Bəzən monopolyalar, siyasi, iqtisadi və hərbi təsirlər olur ki, bu təsirlər də müəyyən mənada bəzi dövlətlərin mövqeyini laxladır. Cənab Prezidentin dediklərində çox böyük həqiqət var. Başda Azərbaycan, qardaş Türkiyə olmaqla türk dövlətlərinin vahid bir cəbhədə birləşməsi günün ən böyük tələblərindən biridir. Prezident İlham Əliyevin bu təklifini çox yüksək dəyərləndirirəm. Bu təklif sıradan bir təklif deyil, bu günün reallığından doğan və gələcək perspektivlər üçün hesablanmış bir təklifdir”-deyə İ.Rüstəmli qeyd etdi.
İradə SARIYEVA
