Məşhur amerikalı iqtisadçı Ceffri Saş ABŞ xarici siyasət strategiyasının bilinməyən bəzi detallarını açıqlayıb.
İqtisadçı ABŞ-ın Venesuelaya müdaxiləsini sərt şəkildə tənqid edib. Amerikanın bu hərəkətlərini beynəlxalq hüququn və konstitusiya nizamının çökməsi kimi xarakterizə edən Saş, dünya sülhünün böyük təhlükə altında olduğunu iddia edib.
O, Vaşinqtonun özünün "arxa baxçası" hesab etdiyi Latın Amerikasına təzyiqinin BMT Nizamnaməsini və diplomatik normaları heçə sayan yeni bir dövrə apardığını bildirib. Saş, ABŞ-ın artıq konstitusiya ilə deyil, hərbi dövlət tərəfindən idarə olunduğunu bildirib: "Biz konstitusiyaya əməl etmirik, hər şey prezident fərmanları ilə edilir və bu, dünyanı fövqəladə dərəcədə təhlükəli vəziyyətə gətirir".
Maduronun ABŞ tərəfindən qaçırılmasına AB ölkələrinin və BMT-nin susqunluğunu tənqid edən Saş bildirib ki, Tramp beynəlxalq hüququ şüurlu şəkildə heçə sayır: "Birləşmiş Millətlər Təşkilatı hazırda təsirsizdir, çünki ABŞ onu qəsdən yox etməyə çalışır. Beynəlxalq hüquq faktiki olaraq yox vəziyyətindədir. Beynəlxalq hüququ qlobal fəlakəti və üçüncü dünya müharibəsinin qarşısını almaq üçün qurmuşduq. Lakin indi, xüsusən də nüvə dövründə, hər an bu qanunu kənara ataraq fəlakətə yaxınlaşırıq".
ABŞ-ın keçmiş Venesuela prezidenti Huqo Çavesin dövründən bəri hökuməti devirməyə çalışdığını və bu planın 23 il əvvəl hazırlandığını bildirən Saş əlavə edib ki, Ukrayna və Suriya kimi ölkələrə qarşı hücum planları da uzun müddət əvvəl hazırlanıb.
Saş bildirib ki, Venesuela öz resurslarının ona məxsus olduğuna inandığı və ABŞ-ın neft üzərindəki diktələrini rədd etdiyi üçün “düşmən” elan edilib: “Bu, Trampın son səkkiz ildir üzərində işlədiyi və Marko Rubio kimi şəxslərin rəhbərlik etdiyi uzunmüddətli bir layihədir. ABŞ xarici siyasəti belə işləyir, uzunmüddətli məqsədlərinə çatmaq üçün lazım olan anda hansı yalanı və ya hekayəni demək lazımdırsa onu da deyirlər”.
O, hətta iddia edib ki, Ukrayna, Suriya və Venesueladakı hadisələr 30-20 il əvvəl planlaşdırılıb: “Ukrayna 30 illik, Suriya 13 illik, Venesuela isə 20 illik bir layihədir”.
TAHİR
