Ermənistanın baş naziri Nikol Paşinyan bir daha parlament seçkilərindən sonra yeni konstitusiyanın qəbulu ilə bağlı referendum keçiriləcəyini diqqətə çatdırıb. Bundan öncə o bildirib ki, Müstəqillik Bəyannaməsi konstitusiyadan çıxarılmalıdır.
Ədliyyə naziri Srbuhi Qalyan məsələ ilə bağlı bildirib: “Yeni konstitusiyanın preambulası konstitusiyanın mətninə və Ermənistan Respublikasının yaxın illərdə qəbul edəcəyi istiqamətə uyğun olmalıdır".
Müstəqillik Bəyannaməsinin bu vəziyyətdə problem yarada biləcəyini düşünüb-düşünmədiyi soruşulduqda, nazir belə cavab verib: “Hələlik fikrimi açıq şəkildə bildirmirəm, amma bir neçə dəfə Ermənistan Respublikasının qanunvericilik sahəsində sülhü təhlükə altına qoyan və ya heç olmasa şübhə altına alan heç bir formulun olmamasının daha yaxşı olacağını düşündüyüm barədə danışmaq imkanım olub”. Erməni mediası yazır ki, bununla irəvan Bakının tələblərini icra etdiyini bir daha təsdiqləmiş olur. “Azatutyun” qeyd edir: “Srbuhi Qalyan Müstəqillik Bəyannaməsinin sülh gündəliyinə necə zərər verdiyini açıqlamayıb və əvvəlcə Konstitusiya Dəyişiklikləri Şurasının bu məsələ ilə bağlı mövqeyini gözləyəcəyini bildirib. O, həmçinin baş nazirlə Müstəqillik Bəyannaməsinin dövlət əleyhinə sənəd olması ilə razılaşıb-razılaşmadığını da deməyib. Müxalifətin fikrincə, hökumət ictimaiyyəti yeni konstitusiyanın qəbulunun Bakının tələbləri ilə heç bir əlaqəsi olmadığına inandıra bilmir. Deputat Kristine Vardanyan deyir ki, Nikol Paşinyan yaxın gələcəkdə müxtəlif şərhlərlə insanları əksinə inandırmağa çalışacaq: “Əliyevin tələbi Paşinyanın seçkiqabağı proqramına və xalqa daxili təklifinə çevrilib. Paşinyan Üçüncü Respublikanı ləğv etməyi, məhv etməyi təklif edir ki, yeni konstitusiyaya sahib olmağın yeganə yolu bu olsun, Əliyev də elə bunu tələb edir. O, bunu təklif edir, bunun qablaşdırılması fərqlidir, amma Paşinyan xalqa bunu təklif edir. Bu, ictimai rəydə varmı? Hazırda yoxdur, ona görə də olsaydı, Paşinyan sabah referendum keçirərdi. O bilir ki, etmir, ona görə də onu keçirmir, amma öhdəliyindən imtina etmir”. Yeni konstitusiyanın layihəsi hələ ictimaiyyətə təqdim olunmasa da, Paşinyan bir daha xalqın yeni baş qanunun lehinə səs verəcəyinə əminliyini ifadə edib”. Erməni politoloq Stepan Danielyan bütün bunların təsadüfi olmadığını bildirir: “Siz elə düşünürsünüz ki, Ermənistanın öz daxili məsələləri var və Azərbaycan indi qərar verib ki, Ermənistanın daxili işlərinə qarışır? Bu, cəmiyyətimizdə Ermənistan-Azərbaycan münasibətləri haqqında yanlış təsəvvürün olmasından irəli gəlir. Ermənistan çox məhdud suverenliyə malik bir ölkədir və məğlub olmuş, kapitulyasiyaya məruz qalmış dövlət kimi Azərbaycanın tələblərini yerinə yetirir. Azərbaycanın Ermənistanın daxili informasiya siyasətini müəyyən etməsi buna misaldır. Son ən parlaq nümunələrdən biri budur ki, bir media qurumu hansısa verilişdə “artsax” sözündən istifadə etmişdi və nəticədə həmin media Ermənistanda bağlandı. Azərbaycan qərar verir ki, Ermənistan hansı daxili və xarici siyasət yürütməlidir, dərsliklərdə nə yazılmalıdır, məktəblərdə “qəhrəmanlar”ın şəkilləri olmalıdır, yoxsa yox, hansı hərbi texnikanı almalıyıq, hansını almamalıyıq, mövcud olan texnika məhv edilməlidir, yoxsa yox, konstitusiyamız necə olmalıdır, milli simvollarımız necə görünməlidir, Ermənistan-Azərbaycan sərhədində üçüncü ölkənin nümayəndələri olmalıdır, yoxsa yox”.
Erməni ekspert bildirib ki, Ermənistan bu gün Azərbaycanın təsir dairəsindədir: “Türkiyə də deyir ki, “Azərbaycan hansı siyasəti qərar verəcəksə, biz Ermənistanla o siyasəti aparacağıq”. Deməli, Ermənistan Azərbaycanın nəzarəti altındadır. Hətta bilmirəm, Azərbaycanın xüsusi xidmət orqanları Ermənistanda mövcuddur, ya yox, amma bu, Ermənistan hakimiyyətinin bilgisi daxilində ola bilər. Reallıq budur”. Avropa İttifaqının Ermənistanla imzaladığı yeni sənəd barədə danışan Danielyan deyib ki, sənəddə Azərbaycanın narazılığına səbəb olmuş ifadələrin Avropa İttifaqının təşəbbüsü ilə daxil edildiyini ehtimal etmək olar: “Aİ Azərbaycan üzərində də təsir rıçaqları əldə etmək istəyir. Ola bilsin ki, Ermənistan hakimiyyətinə həmin bəndləri sənədə daxil etməyi məcbur ediblər. Azərbaycan isə təbii olaraq narahatdır və deyir: “Sən mənim nəzarətimdə olan bir ölkəsən, birdən məlum olur ki, başqa bir ölkə ilə də dərin münasibətlər qurmağa çalışırsan”. Aİ isə Cənubi Qafqazda iştirak etmək istədiyindən, Azərbaycan üzərində də təsir vasitələri olmalıdır və bəlkə də buna görə həmin bəndləri daxil edib. Azərbaycan Ermənistana irad tutur ki, “vassal olaraq özünü yaxşı aparmadın və Aİ-yə müqavimət göstərə bilmədin, belə bəndlərin olmasına imkan verdin”. Ermənistan XİN-in sözçüsü Ani Badalyan isə qeyd edir ki, Ermənistan-Avropa İttifaqı strateji tərəfdaşlıq gündəliyi ikitərəfli tərəfdaşlığın mahiyyətini əks etdirir: “O, təkcə Ermənistan vətəndaşlarının Avropa istəklərini deyil, həm də Aİ-nin suverenlik, ərazi bütövlüyü, demokratiya və sosial-iqtisadi davamlılığı dəstəkləmək öhdəliyini əks etdirir. Özlüyündə bu, yalnız bölgədə sülhün möhkəmlənməsinə öz töhfəsini verir. Qeyd edək ki, Aİ-Ermənistan Tərəfdaşlıq Şurasının iclasının yekunları üzrə qəbul edilmiş birgə bəyanatda Avropa İttifaqı da bu ilin avqustunda Vaşinqton Sülh Sammitində Ermənistan və Azərbaycan arasında əldə olunmuş tarixi mərhələni alqışlayıb. Aİ Ermənistan və Azərbaycan arasında sülhün daha da möhkəmləndirilməsi və institusionallaşdırılmasına güclü dəstəyini bir daha təsdiqləyib”. Bundan əvvəl Azərbaycan Xarici İşlər Nazirliyi Brüsseldə keçirilən Tərəfdaşlıq Şurasının iclasının yekunları üzrə 2025-ci il dekabrın 2-də imzalanmış “Aİ-Ermənistan Tərəfdaşlıq Strateji Gündəliyi”nin məzmunu ilə bağlı ciddi narahatlığını bildirib.
Nahid SALAYEV
