Elşad Həsənov: “Azərbaycanın yanaşması BMT nizamnaməsinə və beynəlxalq hüquq normalarına əsaslanır”
Prezident İlham Əliyev İran Prezidenti Məsud Pezeşkiana başsağlığı verib. Ölkə başçısı bildirib ki, İran İslam Respublikasının Ali Rəhbəri Ayətullah Seyid Əli Xameneinin faciəvi vəfatı xəbəri bizi dərindən kədərləndirib:
“Bu ağır itki ilə əlaqədar Sizə, mərhumun ailəsinə və dost İran xalqına dərin hüznlə başsağlığımızı ifadə edir, səbir və dözüm arzulayırıq. Ayətullah Seyid Əli Xamenei uzun illər ərzində İran dövlətinin və cəmiyyətinin həyatında mühüm rol oynamış, ölkəsinin siyasi və dini həyatında xüsusi yer tutmuş şəxsiyyət olmuşdur. Onun vəfatı İran üçün böyük itkidir. Bu çətin gündə dost və qardaş İran xalqına sülh, sabitlik və əmin-amanlıq arzulayırıq”.
İndiki məqamda Prezident Əliyevin bu addımını ekspertlər ümumən necə dəyərləndirir?
Sözügedən məsələ ilə bağlı fikirlərini baki-xeber.com-la bölüşən siyasi ekspert Elşad Həsənov hesab edir ki, Xameneinin faciəvi vəfatı ilə bağlı Prezident İlham Əliyevin İran tərəfinə başsağlığı verməsi mühüm məqamdır: “Bu, Azərbaycanın müstəqil siyasət yeritməsini, qonşularla münasibətlərə xüsusi önəm verməsinin göstəricisidir. Azərbaycan İranla qonşu dövlətdir. Orada milyonlarla soydaşımız yaşayır. Rəsmi Bakı regionda sülh və sabitliyin olmasında maraqlıdır. Prezident Əliyevin İranın çətin günündə başsağlığı verməsi gözlənilən idi. Ona görə ki, Azərbaycan hər zaman qonşu dövlətlərdə sabitliyin olmasında maraqlı olub. Azərbaycanın yanaşması BMT nizamnaməsinə və beynəlxalq hüquq normalarına əsaslanır. Dövlətlərin suverenliyinə, ərazi bütövlüyünə, müstəqilliyinə hörmət edilməlidir. Ali dini liderin ölümü ilə əlaqədar Prezidentin, xarici işlər nazirinin öz tərəf müqabillərinə başsağlığı verməsi də yaxın qonşuluq münasibətlərindən irəli gəlir. Hadisələrin gedişi, Birləşmiş Ştatların ağır şərtlərlə çıxış etməsi belə vəziyyətin yaranmasına səbəb oldu. Fikrimcə, ABŞ danışıqlarda ağır şərtlərlə çıxış etməsəydi, müharibədən qaçmaq olardı. İran hansısa güzəştlərə gedərdi. Ancaq Trampın sərt tələbləri belə vəziyyətin yaranmasına səbəb oldu. Belə nəticənin yaranacağı gözlənilən idi. Ona görə ki, ABŞ İran körfəzinə çoxsaylı təyyarədaşıyan gəmilər topladı. ABŞ-ın Yaxın Şərqdəki hərbi bazaları gücləndirilmiş rejimdə işləyirdi. Cenevrədə son danışıqların nəticəsiz başa çatmasından sonra İsrailin təhriki ilə ABŞ İranı vurmağa başladı”.
Vidadi ORDAHALLI
