Tural İsmayılov: “Vaşinqtonun Bakı ilə münasibətləri bərabərhüquqlu tərəfdaşlıq müstəvisinə çəkməsi...”
Amerika Birləşmiş Ştatlarının (ABŞ) vitse-prezidenti Ceyms Devid Vens Bakıya səfər edəcək. Son məlumatlara görə, Vens fevralın 9-u Ermənistana gedəcək, fevralın 10-u isə Azərbaycana gələcək. ABŞ vitse-prezidentinin səfəri Azərbaycan-Amerika münasibətlərinin inkişafının göstəricisi kimi xarakterizə olunur.
Ekspertlər hesab edirlər ki, ABŞ vitse-prezidentinin Azərbaycana səfəri iki ölkə arasında münasibətlərin son illərdə dinamik şəkildə inkişaf etdiyini göstərən mühüm siyasi hadisədir. Bu səfər, ilk növbədə, Azərbaycan–ABŞ strateji dialoqunun möhkəmləndirilməsinə, qarşılıqlı etimadın artırılmasına və regional məsələlər üzrə əməkdaşlığın genişləndirilməsinə xidmət edir. Təhlilçilərin fikrincə, enerji təhlükəsizliyi, regional sabitlik, nəqliyyat-logistika layihələri və təhlükəsizlik sahəsində əməkdaşlıq səfərin əsas gündəm mövzuları sırasında yer alır. Eyni zamanda, belə yüksək səviyyəli təmaslar Azərbaycanın Cənubi Qafqazda artan geosiyasi rolunun Vaşinqton tərəfindən nəzərə alındığını və ikitərəfli münasibətlərin yalnız taktiki deyil, uzunmüddətli maraqlara əsaslandığını nümayiş etdirir.
Səfər təkcə ikitərəfli münasibətlərin deyil, eyni zamanda ABŞ-da hakim siyasi xəttin və lider faktorunun Azərbaycan–ABŞ əlaqələrinə birbaşa təsirinin göstəricisi kimi qiymətləndirilə bilər.
Politoloq Tural İsmayılov baki-xeber.com-a bildirdi ki, ABŞ vitse-prezidenti Ceyms Devid Vensin gözlənilən Bakı səfəri, 2025-ci ilin avqustunda Vaşinqtonda təməli qoyulan strateji yaxınlaşmanın ən yüksək səviyyədə təsdiqi və ikitərəfli münasibətlərin keyfiyyətcə yeni mərhələyə keçidinin mühüm göstəricisidir:“Bu səfər sadəcə diplomatik protokol xarakteri daşımır; rəsmi Bakının Cənubi Qafqazda formalaşdırdığı yeni reallıqların, xüsusilə Azərbaycan-Ermənistan sülh gündəliyinin Ağ Ev tərəfindən birbaşa dəstəklənməsi və prosesdə ABŞ-ın zamin rolunun güclənməsi deməkdir. Vaşinqtonun Bakı ilə münasibətləri bərabərhüquqlu tərəfdaşlıq müstəvisinə çəkməsi Azərbaycanın həm regional təhlükəsizlik arxitekturasındakı liderliyini, həm də qlobal enerji və nəqliyyat (məsələn, TRIPP marşrutu) dəhlizlərindəki əvəzedilməz mövqeyini qəbul etməsindən xəbər verir. Eyni zamanda, Vensin səfəri çərçivəsində müzakirə olunacaq strateji tərəfdaşlıq xartiyası və yüksək texnologiyalar sahəsində əməkdaşlıq perspektivləri Azərbaycanın beynəlxalq münasibətlər sistemindəki çoxşaxəli balans siyasətinin növbəti uğuru kimi qiymətləndirilməlidir. Belə bir yüksək səviyyəli təmas rəsmi Bakının Qərb üçün təkcə etibarlı tərəfdaş deyil, həm də regionun gələcək inkişaf modelini müəyyən edən müstəqil güc mərkəzi olduğunu bir daha nümayiş etdirir”.
İradə SARIYEVA
