İsrail və ABŞ fevralın 28-də Tehran və Vaşinqton arasında danışıqların davam etdiyi bir vaxtda İrana qarşı hücuma başlayıb. İran ABŞ bazalarının yerləşdiyi İsrail, Qətər, Birləşmiş Ərəb Əmirlikləri və Bəhreyn də daxil olmaqla bir neçə regional ölkədə hədəflərə hücumlarla cavab verir.
ABŞ-İsrail hücumları nəticəsində İran lideri Ayətullah Əli Xameneyi və bir çox yüksək vəzifəli İran rəsmisi öldürülüb. Məhz bundan sonra İran İsraili, ABŞ bazalarının olduğu region ölkələrinə qarşı qisas hücumuna başlayıb.
Son açıqlamalara görə, İsrail və ABŞ iki gün ərzində İrana 2 minə yaxın zərbə endirib. İranda ölənlərin sayı 500-ü keçib. İranın hədəf aldığı İsrail və region ölkələrində də ölü və yaralıların sayı artır. ABŞ müharibənin ikinci günü 3 əsgərinin öldüyünü, 5-nin yaralandığını açıqlayıb.
Şənbə günü ABŞ və İsrailin İrana hücumu ilə başlayan müharibə üçüncü günündə tam gücü ilə davam edir. Qarşılıqlı raket hücumları davam edərkən, gecə ərzində başqa bir ölkə münaqişəyə cəlb edilib. İsrail ordusu Livana hava hücumu təşkil edərək, ölkədən raketlərin atıldığını iddia edib. İsrail ordusu Hizbullahı hədəf aldığını iddia edərək Livana hava hücumlarına başlayıb.
Müharibə bütün bölgəyə yayılıb. Bölgədə vurulmayan yeganə ölkə isə Misirdir…
15:50
İran İnqilab Keşikçiləri Korpusu (SEPAH) İsrail Baş naziri Binyamin Netanyahunun ofisinin və İsrail Hərbi Hava Qüvvələri Komandanlığının qərargahının hədəfə alındığını açıqlayıb.
SEPAH-n 10-cu raket hücumu dalğası ilə bağlı açıqlamasında deyilir: "İsrail Baş nazirinin ofisi və İsrail Hərbi Hava Qüvvələri Komandanlığının qərargahı Xayber raketləri ilə hədəfə alınıb".
İsrail rəsmiləri iddialarla bağlı hələlik rəsmi açıqlama verməyib.
16:18
İranın Birləşmiş Millətlər Təşkilatının nüvə monitorinqi agentliyindəki (BAEA) səfiri Rza Nəcəfi, Natanz nüvə obyektinin ABŞ və İsrailin hücumlarına məruz qaldığını açıqlayıb.
16:33
Səudiyyə Ərəbistanı dövlət televiziyası İran tərəfində dron hücumuna məruz qalan Dammam yaxınlığındakı Ras Tanura neft emalı zavodunun dron hücumundan sonra müvəqqəti olaraq bağlandığını açıqlayıb.
16:50
“Qatar Energy” şirkəti Ras Laffan və Mesaieddəki obyektlərinə hərbi hücumlardan sonra mayeləşdirilmiş təbii qaz (LNG) istehsalını dayandırdığını açıqladı.
16:53
ABŞ Mərkəzi Komandanlığının (CENTCOM) açıqladığı məlumata görə, ölən ABŞ əsgərlərinin sayı dördə çatıb.
16:55
İranda general Məcid bin əl-Rza müvəqqəti olaraq müdafiə naziri vəzifəsinə təyin edilib.
17:40
Küveytdəki ABŞ-a məxsus Ali Al-Salem hərbi hava bazası yaxınlığında ard-arda bir neçə ABŞ döyüş təyyarəsi qəzaya uğrayıb. Müxtəlif vaxtlarda baş verən qəzaları Küveyt ordusu da təsdiqləyib.
18:06
Böyük Britaniya Dəniz Ticarət Əməliyyatları İdarəsi (UKMTO) Bəhreyn limanında bir neft tankerinə iki naməlum cismin çırpıldığını və nəticədə yanğına səbəb olduğunu bildirib.
18:20
ABŞ-İsrail hücumlarında ağır yaralanan və komada olan İranın Ali Lideri Ayətullah Əli Xameneyinin həyat yoldaşı Mənsurə Höcəstə Bəkirzadə vəfat edib.
18:24
İran Milli Təhlükəsizlik Şurasının katibi Əli Laricani bildirib ki, ABŞ-dan fərqli olaraq, İran uzunmüddətli müharibəyə hazırlaşıb.
18:27
ABŞ prezidenti Donald Tramp ABC News-a verdiyi müsahibədə İran hücumları ilə bağlı "Məndən başqa heç kim bunu edə bilməzdi" deyib.
18:37
İsrail ordusu Livanın paytaxtı Beyrutu bombalayıb.
18:44
İran İnqilab Keşikçiləri Korpusu (SEPAH) Qətərdəki Əl-Udeyd hava nazasında yerləşdiriklən 1,1 milyard dollarlıq ABŞ erkən xəbərdarlıq radarı vurub. Qeyd edilir ki, bununla ABŞ-ın Körfəzdəki hava hücumundan müdafiə qalxanına ciddi zərbə vurulub.
19:20
ABŞ Prezidenti Tramp İrana böyük zərbənin hələ gəlmədiyini deyib: "Biz hələ onlara güclü zərbə vurmamışıq, böyük dalğa hələ gəlməyib. Böyük dalğa tezliklə gələcək".
21:19
Qətər Müdafiə Nazirliyi İrandan gələn iki SU-24 qırıcı təyyarəsinin Qətər Əmirliyi Hərbi Hava Qüvvələri tərəfindən vurulduğunu, 7 ballistik raket və 5 pilotsuz uçuş aparatının (PUA) zərərsizləşdirildiyini açıqlayıb.
21:29
Tramp ərəb ölkələrinə hücumla İranın onları təəccübləndirdiyini deyib: "İran bizi təəccübləndirdi. Onların ərəb ölkələrinə hücum edəcəyini gözləmirdik. Ən böyük sürpriz onlara hücum etmələri oldu".
23:41
Qətərin paytaxtı Dohada partlayış səsləri eşidilir.
Tahir TAĞIYEV
