Azər Həsrət: “Yeni rejim hakimiyyətə gələcəyi təqdirdə bizim üçün də müəyyən çağırışlar ortaya çıxa bilər”
Məlum olduğu kimi, fevralın 28-də səhər saatlarından etibarən ABŞ və İsrail hərbi qüvvələri Körfəzə gətirilən təyyarədaşıyan gəmilərdən, ətraf ölkələrdəki hərbi bazalardan, eləcə də aviasiyadan istifadə etməklə İrana zərbə endirməyə başlayıb.
Paytaxt Tehran, Kirmanşah, İsfahan və s. şəhərlərdəki hərbi hədəflər - SEPAH bazaları, hərbi-kəşfiyyat qurumlarının binaları hədəfə alınıb. Zərbələr nəticəsində ölkənin ali dini rəhbəri Əli Xamenei öldürülüb. İndi proseslərin bundan sonra necə inkişaf edəcəyi, İrandakı rejimin aqibətinin necə olacağı maraq doğurur.
Maraqlıdır, endirilən zərbələr fonunda ABŞ-İsrail İran rejimini çökdürsə və yaranan yeni rejim Vaşinqton-Təl-Əviv ittifaqının təsirinə düşsə, bu vəziyyət Türkiyənin, Cənubi Qafqazın, Pakistanın və Mərkəzi Asiyanın gələcəyi üçün nə vəd edir?
Sözügedən məsələni baki-xeber.com-a şərh edən siyasi şərhçi Azər Həsrət buna bir neçə prizmadan yanaşdı: “Əlbəttə ki, baş verən proseslərdə qardaş Türkiyənin, Azərbaycanın maraqları yox deyil. Xüsusən də bizim maraqlarımız var. İranda molla rejim çökəcəyi və yeni rejim hakimiyyətə gələcəyi təqdirdə bizim üçün də müəyyən yeniliklər, yeni çağırışlar ortaya çıxa bilər. Hesab etmirəm ki, Azərbaycanın geosiyasi əhəmiyyəti azalacaq. O baxımdan Azərbaycan tərəfinin ciddi bir problemi olacağını düşünmürəm. O cümlədən Türkiyə üçün də problem yaranacağını düşünmürəm. Baxmayaraq ki, bu müharibəni başladan İsraildir. Təbiidir ki, yeni gələcək rejim İsrailə yaxın olacaq. Ancaq o da məlumdur ki, ABŞ-la Türkiyə strateji müttəfiqdir. Belə olan şəraitdə əlbəttə ki, İranın idarə edilməsində ABŞ-ın sözü əsas olacaq. Bu isə o deməkdir ki, Türkiyə üçün problem yaranmayacaq. Sadəcə olaraq biz indi fürsəti əldən verməməliyik. Çalışmalıyıq ki, İranda hakimiyyətə gələn rejim, bizim üçün də uyğun bir rejim olsun. Rza Pəhləvidən söhbət gedirsə, İran xalqının əksəriyyəti onu qəbul etmir. O baxımdan hesab edirəm ki, ABŞ da, İsrail də həm Azərbaycan, həm də Türkiyə ilə yəqin məsləhətləşirlər. Elə bir uyğun variant üzərində dayanacaqlar ki, həmin variant hər kəs üçün məqbul olsun. İndiki şəraitdə güman edirəm ki, bu, elə Məsut Pezeşkian olacaq. Pezeşkian hakimi mütləqə çevrilərsə, İranın problemlərini həll etmək və qonşularla, eləcə də ABŞ və İsraillə də anlaşmaq mümkün olacaq. Yəni bu, bir növ Venesuela variantına bənzəyir. Düzdür, Venesuelada rejim fərqli idi. Orada dini rəhbərlik yox idi. Ancaq Maduro qaçırıldıqdan sonra onun vitse-prezidenti hazırda ölkəyə rəhbərlik edir. Həmin o vitse-prezident də ABŞ prezidenti Trampla tez-tez zəngləşir, məsləhətləşir, onun sözünə qulaq asır və s. Yəni faktiki olaraq Venesuelada qan tökmədən, əhalini narahat etmədən rejimi dəyişdiriblər. Özü də Maduronun ən yaxın adamı ilə. İranda da belə bir variant gözlənilir. Yəni ali dini rəhbərlik idarəetmədən çəkilir və onun yerinə Məsut Pezeşkian idarəetməni ələ alır. Bir vaxtlar SSRİ-də olduğu kimi. Qorbaçov hakimiyyətə gəldi və ondan sonra gedən proseslər SSRİ-nin dağılması ilə nəticələndi”.
Vidadi ORDAHALLI
