Dövlət çevrilişinə cəhddə ittiham edilərək oktyabrın 14-də barəsində 4 ay müddətinə ev dustaqlığı qətimkan tədbiri seçilən Prezident Administrasiyasının sabiq rəhbəri Ramiz Mehdiyevin işi ətrafında proseslər getdikcə daha maraqlı xarakter alır.
Görünən odur ki, dövlət çevrilişinə cəhd prosesində Ramiz Mehdiyevin müxalif düşərgədə əsas dayağı Azərbaycan Xalq Cəbhəsi Partiyası (AXCP) və onun sədri Əli Kərimli olmalı imiş. Hər iki şəxs barəsində həbs qətimkan tədbirlərinin seçilməsi həm də bundan qaynaqlanır.
Ramiz Mehdiyev-Əli Kərimli tandemi, yəni hakimiyyətdə yüksək vəzifələr tutmuş bir şəxslə uzun illər müxalifət lideri kimi tanınan digər şəxsin gizli əməkdaşlığının kökü, əslində uzun illərə dayanır. Azərbaycan siyasi sisteminin xüsusiyyətləri və hər iki şəxsin uzun illər ərzində fərqli mövqelər tutması belə bir əməkdaşlığın real siyasi kontekstdə nə demək olduğunu indi daha dəqiq təsəvvür etməyə imkan verir. Bəllidir ki, Ramiz Mehdiyev uzun illər Azərbaycan siyasi elitasında yüksək vəzifə tutmuş, ölkənin ideoloji, elmi və dövlət idarəçiliyi sahələrində mühüm təsirə malik fiqurlardan biri olub. Əli Kərimli isə uzun illərdir Azərbaycan müxalifətinin lideri postuna iddia edib və iqtidarın davamlı tənqidçisi kimi çıxış edir. Bu iki fərqli siyasi mövqedə olan şəxsin əməkdaşlıq etməsini isə sadəcə bir məsələ şərtləndirib - xəyanət.
Siyasi və Hüquqi Araşdırmalar Mərkəzinin sədri, hüquqşünas Xəyal Bəşirovun açıqlamaları bu mənada xüsusi diqqət cəlb edir: “Biri ev dustaqlığına, digəri isə həbs-qətimkan tədbirinə məruz qalıb və bu, cəmiyyətdə ciddi rezonans yaradıb. Əgər istintaq və daha sonra məhkəmə tərəfindən hər iki şəxsin və digər iştirakçıların dövlət hakimiyyəti əleyhinə qanunsuz fəaliyyətləri təsdiqlənərsə, onlar qanun qarşısında cavab verəcəklər. Lakin proses bununla bitmir. Siyasi müstəvidə cavablandırılması vacib olan çoxsaylı suallar mövcuddur. Ramiz Mehdiyev uzun illər hakim partiyanın aparıcı simalarından biri, Prezident Administrasiyasının rəhbəri və yüksək dövlət rütbəsinə sahib şəxs olub. Digər tərəfdən, Əli Kərimli uzun müddət müxalifətin lideri kimi çıxış edib və AXCP-nin böyük bir hissəsinin etimadını qazanıb. O, proseslərdə sıravi şəxs kimi deyil, məhz partiya sədri qismində iştirak edib. Bu isə partiyanın digər funksionerlərinin də müəyyən formada məlumatlı olması ehtimalını gündəmə gətirir. Hazırda hər iki şəxs Cinayət Məcəlləsinin ən ağır maddələrindən biri – 278-ci maddə ilə ittiham olunur. Bu ittiham həm hakimiyyət, həm də müxalifət üçün öz cəbhəsinə xəyanət anlamı daşıya bilər”. Hüquqşünas qeyd edib ki, Əli Kərimli öz partiyasını etibarnaməsiz təmsil etdiyi üçün onun fəaliyyəti AXCP-nin hüquqi gələcəyinə də birbaşa təsir edir: “Qanuna əsasən, sədrlərin atdığı addımlar partiyanın məsuliyyəti kimi qiymətləndirilə bilər. Bu baxımdan AXCP-nin qeydiyyat məsələsi və gələcək fəaliyyətinin yenidən gündəmə gəlməsi mümkündür. Bundan başqa, qanuna əsasən, partiyanın qeydiyyatda qalması üçün 5000 üzv şərti mövcuddur. Əli Kərimlinin həbsi fonunda partiya üzvləri arasında etimadın sarsılması, bunun sosial şəbəkələrdə görünən reaksiyalarda əks olunması üzvlük sayının azalması risqini artırır. Bu isə yenidən qeydiyyat prosesini aktuallaşdırır. Ümumilikdə, həm partiyanın hüquqi statusu, həm də sədrin partiyanı təmsil edərək iştirak etdiyi iddia olunan qanunsuz fəaliyyətlər qanunvericilik baxımından yenidən qiymətləndirilə bilər. Çünki Ramiz Mehdiyevin əməkdaşlıq üçün şəxs kimi sadəcə Əli Kərimlini deyil, AXCP sədri olan birini seçməsi partiyanın məsuliyyətini də gündəmə gətirir. Buna görə də yaxın dövrdə partiyanın qeydiyyatı məsələsinin şübhə altına düşməsi və müvafiq qurumların addım atması ehtimalı yüksəkdir”.
İndiki halda Əli Kərimli barəsində səsləndirilən ittihamları qəbul etmir. Amma 2013-cü ildən etibarən Milli Şura layihəsinin Azərbaycan siyasi səhnəsində qurulması, Rusiya emissarları ilə koordinasiya və “Milyarderlər İttifaqı” xəttinin inteqrasiyası prosesi Əli Kərimli ilə əlaqəlidir. Bu fonda həm Ramiz Mehdiyevin, həm də Əli Kərimlinin yaxın çevrəsindən olan şəxslər istintaqa cəlb olunur. Bura Gültəkin Hacıbəyli də daxildir. Ümumiyyətlə, məhz bu şəxsin Əli Kərimli ilə Ramiz Mehdiyev arasında əsas əlaqələndirici olması ehtimal edilir. Gültəkin Hacıbəyli Ramiz Mehdiyev işi üzrə istintaqa cəlb edilən şəxslər sırasındadır və artıq onunla bağlı prosedurlar da başlanıb. Gültəkin Hacıbəyli hazırda Türkiyədə saxlanır. Türkiyə qanunlarına əsasən, Hacıbəyli kimi şəxslərin deportasiya qərarına etiraz etmək hüququ var. Bu proses 15 gün davam edir və həmin şəxs deportasiyanın qanunsuz olduğunu əsaslandırmalıdır. Əsaslandırma olmadığı halda deportasiya həyata keçirilir. Prosesin Ramiz Mehdiyev və Əli Kərimli kimi şəxslərlə bağlı istintaq işi fonunda aparıldığı nəzərə alınarsa, Gültəkin Hacıbəylinin deportasiyasının reallaşacağı qaçılmaz görünür. Bu arada daha bir maraqlı nüans odur ki, Yeni Azərbaycan Partiyasının Veteranlar Şurasının sədri, Milli Məclis sədrinin keçmiş birinci müavini Arif Rəhimzadə mediaya açıqlamasında bildirib ki, Ramiz Mehdiyev Azərbaycan Xalq Cəbhəsinin iqtidarda olduğu dövrdə rəhbərliyə müraciət edərək “mənim çox böyük təcrübəm var, işi bilirəm, mənə vəzifə verin, sizə xidmət edəcəyəm” deyib. A.Rəhimzadə qeyd edib: “Xalq Cəbhəsinə müraciətinin olmasını dəqiq bilirəm. Onda Heydər Əliyev hələ hakimiyyətə gəlməmişdi”. Milli Məclisin deputatı Kəmaləddin Qafarov isə bunlar fonunda qeyd edir ki, ehtimala əsasən, istintaq nəticəsində Ramiz Mehdiyev–Əli Kərimli cütlüyünün 1991-1992-ci illərdə Azərbaycanın vətəndaş müharibəsi astanasına gətirilməsində də aparıcı rol oynadıqları aşkar edilə bilər: “Bu gün ölkədə daxili sabitliyi sarsıtmağı, cəmiyyətdə qütbləşmə yaratmaqla dövlətin idarəetmə sistemini zəiflətməyi və beynəlxalq imicini zədələməyi özlərinə hədəf olaraq seçən düşmən ünsürlərin o keşməkeşli illərdə ölkəni parçalayaraq marionet dövlətçiklərə ayırmaq kimi niyyətlərinin olması artıq heç kimi təəccübləndirməz”. O qeyd edir ki, Ramiz Mehdiyev–Əli Kərimli–Milli Şura antidövlətçilik xəttinin iflası və ifşası Azərbaycanın siyasi sisteminə qarşı planlaşdırılan təxribatların mahiyyətini açıq şəkildə göstərir. Onun fikrincə, Cəmil Həsənlinin rəhbərlik etdiyi Milli Şura layihəsi həmin planın ön səhnəsi idi: “Formal olaraq müxalifət koalisiyası kimi təqdim olunan bu qurum, əslində, daxildən iflasa məhkum idi. Çünki qurumun siyasi xəttini və qərarlarını müəyyən edən şəxslərin real ictimai dayaqları yox idi. Milli Şura adına keçirilən mitinqlərin ardınca Ramiz Mehdiyevin kənardan diqtə etdiyi digər tələblər və Əli Kərimlinin bu tələblərə kor-koranə əməl etməsi faktiki olaraq “icraçı-sifarişçi” modelini formalaşdırmışdı. Mehdiyev mitinqlərin davamlı olmasını, kütlənin küçələrə çıxarılmasını, sosial gərginliyin artırılmasını tələb edir, Kərimli isə bu prosesin önündə gedən əsas fiqur kimi təqdim olunurdu. Əslində isə, icra edilən planın arxasında qara qüvvələrin ölkədə xaos yaratmaq və siyasi sistemi təzyiq altında saxlamaq niyyəti dururdu. Əlbəttə ki, bu niyyət Mehdiyev–Kərimli alyansının sadəcə iqtidara qarşı deyil, bütün Azərbaycan xalqına açıq-aşkar düşmən mövqelərini ortaya qoyur... Mehdiyev və Kərimlini birləşdirən keçmiş əlaqələr də təsadüfi deyildi. Uzun illər ərzində eyni siyasi çevrədə fəaliyyət göstərmiş bu şəxslər sonradan müxtəlif səbəblərlə fərqli mövqelərə keçsələr də, hakimiyyətə münasibətdə ortaq narazılıq onların yollarını yenidən birləşdirdi. “Boz kardinal” obrazı ilə tanınan Ramiz Mehdiyevin gizli görüşləri, məxfi məlumatların ötürülməsi və proseslərin koordinasiyası barədə yayılan məlumatlar bu ittifaqın xəyanətkar mahiyyətini bir daha üzə çıxarır”.
Tahir TAĞIYEV
