Əli Orucov: “Müəyyən müddətdən sonra Ermənistanın arxiv məlumatlarını, sənədlərini dərc etmək hüququ var”
Rusiya Xarici İşlər Nazirliyi Ermənistanı dövlət başçılarının yazışmalarını onların razılığı olmadan yayaraq etik standartlara məhəl qoymamaqda ittiham edib.
Rusiya XİN-in rəsmi nümayəndəsi Mariya Zaxarova keçirdiyi brifinqdə rəsmi İrəvanın keçmiş Qarabağ münaqişəsi ilə bağlı eks-prezident Serj Sarkisyanın Rusiya Prezidenti Vladimir Putinə ünvanladığı məktubla bağlı məsələyə münasibət bildirib. Onun sözlərinə görə, İrəvan ATƏT-in Minsk qrupu həmsədrlərinin iş materiallarını və dövlət başçılarının yazışmalarını onların razılığı olmadan açıqlayaraq etik standartlara məhəl qoymayıb.
Məlumat üçün qeyd edək ki, Ermənistan hökuməti keçmiş Dağlıq Qarabağ münaqişəsi ilə bağlı danışıqlara dair sənədləri dərc edib. Hökumətin saytında ümumilikdə 13 fayl yerləşdirilib. Bunların arasında 2011-ci ildə Kazanda müzakirə olunan sənəd, 2019-cu ildə təqdim olunan vasitəçilərin təklifləri və üçüncü prezident Serj Sarkisyanın 2016-cı ilin avqustunda rusiyalı həmkarı Vladimir Putinə məktubu da var.
Göründüyü kimi, Paşinyanın danışıqlarla bağlı arxiv məlumatlarını yayması Moskvanın xoşuna gəlməyib. Zaxarova iddia edir ki, bu, diplomatik etikaya uyğun deyil. Doğrudanmı Ermənistanın bu sənədləri yaymağa ixtiyarı yoxdur? Bunun üçün Rusiyadan icazə almaq lazım idimi? Əgər bu, Ermənistan dövlətinin siyasi tarixi ilə bağlıdırsa, o zaman bu ölkə bunu məsləhət bilib. Yəni rəsmi İrəvan Putinin bu ölkəyə ünvanlandığı məktubu açmayıb, Sarkisyanın ona ünvanladığı məktubu dərc edib. O zaman bunun Rusiyaya nə dəxli var?
“Məktubun ümumi məzmunu Rusiyanın münaqişənin həllində maraqlı olmadığını göstərir”
Sözügedən məsələni “Bakı-Xəbər”ə şərh edən AMİP funksioneri Əli Orucov hesab edir ki, Rusiyanın Sarkisyanın məktubunun dərc olunması ilə bağlı belə narahat olmasının kökündə duran faktorlar var: “Əvvəla, müəyyən müddətdən sonra Ermənistanın arxiv məlumatlarını, sənədlərini dərc etmək hüququ var. İctimaiyyət bir sıra məsələləri bilməlidir. Buna görə Ermənistan hansısa dövlətdən, o cümlədən, Rusiyadan icazə alası deyil. Həmin məktubun yazılmasından 9 il ötür. Sarkisyan 7 ildir hakimiyyətdə deyil. Ən başlıcası isə, Qarabağ məsələsi tam həll olunub. Azərbaycan ərazi bütövlüyünü və suverenliyini tam təmin edib. Ermənistan Qarabağı Azərbaycanın tərkib hissəsi kimi tanıyıb. O zaman, Rusiya Sarkisyanın Putinə yazdığı məktubun ictimailəşməsindən niyə belə narahatdır? Məsələ ondadır ki, məktubun ümumi məzmunu Rusiyanın münaqişənin həllində maraqlı olmadığını göstərir. Məktub Ermənistanın işğalının arxasında Rusiyanın dayandığını ortaya qoyur. Məktubu oxuyanda açıq görünür ki, Rusiya olmasa Ermənistan öz imkanları hesabına işğalı davam elətdirə bilməz. Bax buna görə Zaxarova bu qədər narahatdır. Biz unutmamalıyıq ki, 2016-cı ildə Aprel döyüşlərini dayandıran Rusiya idi. Çünki o vaxt prezident Sarkisyan bilavasitə Rusiyanın sateilliti idi. Kreml istəmədi ki, Rusiyaya bağlı “Qarabağ klanı” çətin vəziyyətə düşsün. İndi də Moskva revanşistlərə stavka etdiyi üçün belə narahatdır. Çünki Rusiya istəyir ki, gələn il Ermənistanda keçirilən seçkilərdə Köçəryan və Sarkisyana bağlı siyasi qüvvələr qalib gəlsin”.
Vidadi ORDAHALLI
