Azər Həsrət: “Bu, bir daha Yunanıstanın bir dövlət kimi əsil mahiyyətini ortaya qoyur”
Yunanıstanın Lesbos adası, xüsusilə 2015-ci ildəki Avropa miqrant böhranı zamanı, 2015-2022-ci illər arasında Türkiyədən Avropaya keçmək istəyən qaçqın və miqrantlar üçün əsas tranzit mərkəzi kimi tanınmağa başladı. Həmin illərdə Yaxın Şərq ölkələrindən, əsasən Suriyadan canını götürüb qaçan qaçqınları sularda xilas etdikləri üçün sahil mühafizə əməkdaşlarına hazırda Yunanıstanın müvafiq orqanlarında cinayət işi açılıb. Bununla bağlı 20 nəfərə yaxın şəxs saxlanılıb.
Halbuki, həmin dövrlərdə yunan sahil mühafizə əməkdaşları suda boğulmaq təhlükəsi ilə üzləşən çarəsiz uşaqları xilas ediblər. O zaman Suriya qaçqınları məcburiyyət üzündən Yunanıstanın Lesbos adasına üz tuturdular. Çünki ölkədə dağıdıcı və qanlı vətəndaş müharibəsi gedirdi. Sahil mühafizə əməkdaşları da insanlıq mövqeyindən çıxış edərək onların xilas olmasına kömək ediblər. İndi onlara cinayət işi açılıb ki, guya onlar ölkəyə qanunsuz miqrantların gəlişinə şərait yaradıblar. Halbuki, onlar o addımı atmasaydılar miqrantların çoxu boğulacaqdı və onların cəsədlərini su adanın sahilinə çıxaracaqdı.
Avropa ölkəsi olan Yunanıstanda bu nə yanaşmadır? Onsuz da Suriya qaçqınları oradan Almaniyaya və digər ölkələrə gedib. Məgər Yunanıstan böyük ölçüdə qaçqınlara iqtisadi himayədarlıq edib? Yunanıstan zaman-zaman öz qədim tarixi ilə öyünür. O zaman bu, nə “humanizmdir”? Qaçqınlarla insan kimi davranan sahil mühafizə əməkdaşlarına cinayət işi açmaq nə deməkdir?
Sözügedən məsələni baki-xeber.com-a şərh edən siyasi şərhçi Azər Həsrətin fikrincə, Yunanıstan dövlətinin insanlıqdan uzaq bu davranışı ilk dəfə deyil baş verir: “Ümumiyyətlə, Yunanıstan Avropa İttifaqının bir parçası olaraq, özlərinin də iddia etdiyi kimi, qədim mədəniyyətin bir parçası olaraq zaman-zaman dünyanı təəccübləndirib. Elə bu Suriya qaçqınlarına qarşı humanizm sərgiləmiş adamların belə dara çəkilməsini bir kənara qoyaq. Yunanıstan Avropa İttifaqının üzvüdür. Aİ-nin üzvü olmaq o deməkdir ki, bu ölkə Avropa standartları çərçivəsində davranmalıdır. Ancaq gəlin görək Yunanıstan bu ölkə ərazisində yaşayan türk azlığına qarşı belə münasibət sərgiləyirmi? Onların türk kimliyinin belə Yunanıstanda dilə gətirilməsi qadağandır. Yəni Yunanıstan dövləti iddia edir ki, öz ərazisində türk millətindən heç kim yaşamır. Türkləri müsəlman azlıq kimi göstərirlər. İndi də bədbəxt Suriya qaçqınlarını xilas edənləri dara çəkirlər. Halbuki, onları təşviq etmək lazım idi. Normal dövlətlərdə bu cür sahil mühafizə xidmətləri əməkdaşları buna görə mükafatlandırılır. Çünki yüksək humanizm nümayiş etdiriblər. Ancaq Aİ üzvü olan Yunanıstanda humanizm nümayiş etdirənləri cəzalandırırlar. Bu, bir daha Yunanıstanın bir dövlət kimi əsl mahiyyətini ortaya qoyur. Yeri gəlmişkən, Yunanıstan Qarabağ işğal altında olanda birmənalı şəkildə Ermənistanın tərəfində olan dövlətlərdən biri idi. Düzdür, Azərbaycanın qorxusundan çox da irəli gedə bilmirdilər, amma bununla belə, davamlı şəkildə Ermənistanın arxasında dururdular. Yəni işğal Yunanıstan tərəfindən təşviq olunurdu. İndi də gəlib bu cür özlərinin əsl mahiyyətlərini üzə çıxarırlar. Yəni bizim üçün zamanında Ermənistan nə idisə, Yunanıstan da qardaş Türkiyə üçün odur. Üstəlik, bu ölkədə müsəlman düşmənçiliyi adi haldır. Bu saat Yunanıstan ərazisində məscid tikmək problemdir. Köhnə məscidlər dağıdılır, yenilərin isə tikintisinə icazə verilmir. Belə bir dövlət siyasəti olan ölkədə müsəlman suriyalıları xilas etmiş insanlara cəza kəsilməsi gözlənilən idi. O üzdən, Avropa İttifaqı insanlıq əleyhinə olan bu ayıbı təmizləməlidir”.
Vidadi ORDAHALLI
