Ölkədə sensasiya sayıla biləcək hadisə baş verdi. 25 il boyunca dövlətin ən yüksək vəzifələrindən birində — Prezident Administrasiyasının rəhbəri kimi “hüquq” oynayan, istədiyini yüksəldən, özünə qarşı duranların qələmini qıran, səlahiyyətlərini şəxsi intiqam və maraqlarına xidmət üçün istifadə etmiş Ramiz Ənvəroviç Mehdiyev ən ağır cinayət maddələri ilə ittiham olunaraq həbs qətimkan tədbiri ilə üzləşdi. Bu, sadəcə bir şəxsin həbsi deyil — bu, uzun illər boyunca mövcud olmuş münbit rüşvətxorluq, siyasi cinayətkarlıq və dövlət maraqlarının məhv edilməsinin ifşasıdır.
Daha dəhşətlisi odur ki, belə məqamda danışmaq üçün növbəyə duran minlərlə məmur, deputat və “səslənən” elitanın çoxu səssiz qalmağı üstün tutdu. Onların susqunluğu təkcə qorxu deyil — bu, tərəf seçiminin və məsuliyyətdən qaçışın açıq etirafıdır. Susanlar özlərinə güvənmirlər; onlar Ramizin sistemi ilə rahatdırlar və bu susqunluq onların kimlərin kadrı, kimlərin himayədarı olduğunu dünyaya elan edir!
Mən, Rizvan Talıbov, illər öncə — 2005-2006-cı illərdə açıq, geniş mətbuat konfranslarında bu şəxsin nə Ulu Öndərimiz Heydər Əliyevə, nə Azərbaycan xalqına, nə də dövlət müstəqilliyinə heç bir sədaqəti olmadığını aşkar demişəm. Mən o vaxtdan etibarən onun ağrılı nifrətini, antipatiyasını — və əksinə, ruslara və ermənilərə qarşı duyduğu açıqlanmamış rəğbəti xəbər vermişəm. Bu, təsadüfi deyil: onun fəaliyyətləri, qərarları və maneələri birbaşa olaraq Qərbi Azərbaycana — yəni tarixi yurdlarından zorla qovulan soydaşlarımızın hüquqlarının bərpasına və onların doğma torpaqlarına dönməsinə yönələn bütün təşəbbüslərə qarşı yönəlib. Mənim rəhbərlik etdiyim Qayıdış Birliyinin fəaliyyətlərinə qarşı törətdiyi qanunsuz əngəllər bunun ən bariz nümunəsidir.
Dövlətə, qanuna, prezidentin siyasətinə hörmətlə yanaşan bir insan kimi — heç bir qanuna zidd hərəkət etməyən birinə — o, xüsusi sifarişlə 4 il azadlıqdan məhrum edilmə cəzası verdi, ağır şəraitdə saxladı, həm mənə, həm də ailəmə dərin travmalar yaşatdı. Bunun səbəbi şəxsi qisasdan, siyasi məkrdən və xarici maraqlara xidmət edən siyasətdən başqa bir şey deyildi. Onun səlahiyyətlərini sui-istifadəsi yalnız məni hədəfə almadı — o, erməni-rus ekspansionist maraqlarına qarşı duran bütün milli qüvvələri sıradan çıxartmaq məqsədi güddü. O, Azərbaycan xalqının və dövlətçiliyinin deyil — açıq və gizli şəkildə digər dövlətlərin maraqlarına xidmət edən bir məmur idi!
Bu iddiaları mən indi demirəm; bütün bunları o vəzifəyə malik olduğu vaxtdan 20 il öncə mətbuata verdiyim müsahibələrdə açıqlamışam. Və indi gələn həbslə bağlı bir şey aydındır: bu, müstəqil Azərbaycanın, ədalətin və xalqın qələbəsidir. Ramiz Mehdiyevin tutulması sadəcə şəxsi məsələ deyil — bu, illərlə yığılan cinayətlərin, sədaqətsizliyin və dövlətə xəyanətin ifşasıdır.
Mən Ramiz Ənvəroviçə ölüm deyil — həyatı boyunca yaşadığı azadlığı yox, layiq olduğu həbsi arzulayıram: müstəqil Azərbaycan dövlətinin həbsxanasında, layiq olduğu cəza ilə üzləşməsini. O, dövlətçiliyə, milli maraqlara və xalqın hüquqlarına vurduğu zərərlərin cavabını verməlidir. Onun həbsi ilahi ədalətin deyil, həm də xalqımızın haqqını bərpa etmə mübarizəsinin təntənəsidir.
Bu dövrün ən acı həqiqəti budur: uzun illər boyu şəxsi maraqları üçün dövlətimizi talan edib, ona xəyanət edənlərin, vəzifələrindən dövlət marağımızın, müstəqilliyimizin əleyhinə çıxanların hesabı tutulur. Susanlar cavab verəcək — tarix onları da yazacaq.
Rizvan Talıbov
