İyulun 23-də İstanbulda Rusiya ilə Ukrayna arasında sülh danışıqlarının üçüncü raundu keçirilib. Toplantı Türkiyənin xarici işlər naziri Hakan Fidanın sədrliyi ilə baş tutub. Görüş təxminən 40 dəqiqə çəkib.
Rusiya nümayəndə heyətinin rəhbəri Medinski tərəflərin hazırladığı memorandumlar üzərində uzun müddətdir işlədiyini, bəzi humanitar məsələlərdə razılıq əldə edildiyini və təmasların davam etdiriləcəyini bildirib. Rusiya, Ukrayna tərəfinə həlak olmuş şəxslərin meyitlərini toplamaq üçün ön cəbhədə qısamüddətli - 24-48 saatlıq humanitar atəşkəs rejiminin bərpasını təklif edib.
Ukrayna heyəti isə onlar üçün prioritetin liderlər arasında görüş olduğunu bildirib. Ukrayna tərəfi Zelenski ilə Putinin avqustun sonuna qədər bir araya gəlməsini təklif edib. Avqustun sonunda ABŞ prezidenti Donald Trampın Rusiyaya verdiyi 50 günlük müddət də başa çatır.
Ukrayna nümayəndə heyətinin rəhbəri Rüstəm Umerov iki ölkə liderlərinin avqustun sonunda Donald Tramp və Rəcəb Tayyib Ərdoğanın iştirakı ilə görüşməsini təklif etdiklərini bildirib. O, belə bir sammitin real siyasi tərəqqiyə yol aça biləcəyini və ABŞ və Türkiyə prezidentlərinin bu görüşdə iştirakının son dərəcə dəyərli olacağını vurğulayıb. Umerov bildirib ki, ancaq Rusiya bu məsələdə öz səmimiyyətini nümayiş etdirməlidir. Rusiya tərəfi isə bunun üçün ilk növbədə müəyyən razılığın əldə olunmasının vacibliyini vurğulayıb və əks təqdirdə görüşün heç bir əhəmiyyətinin olmayacağını bildirib.
Ukrayna nümayəndə heyəti bildirib ki, Rusiya tərəfi üç ildən artıq əsirlikdə olanların azad edilməsi ilə bağlı onların tələblərini qəbul edib. Rusiyada da ən qısa zamanda azı 1200 əsir hərbçinin qarşılıqlı olaraq dəyişdirilməsi barədə razılıq əldə olunduğunu bildirib. Bundan başqa, Rusiya 3000 əsgərin qalıqlarını da Ukrayna tərəfinə verməyə hazır olduğunu bəyan edib. Medinski, həmçinin sərhəddə ağır yaralı və xəstə əsgərlərin qeyri-müəyyən müddətə dəyişdiriləcəyini, döyüşlər nəticəsində didərgin düşmüş mülki şəxslərin geri qaytarılmasının da müzakirə edildiyini bildirib. O qeyd iddia edib ki, ukraynalı uşaqlarla bağlı adı keçən 339 uşqadan bəziləri artıq geri qaytarılıb, 50-si isə uşaq deyil, böyüklərdir. Moskva Ukraynada və ya Avropada yaşayan rusiyalı uşaqların geri qaytarılması məsələsini də qaldırıb.
Ukrayna nümayəndə heyətinin rəhbəri Umerov bəyan edib ki, onlar təkcə əsirlərin deyil, mülki şəxslərin və uşaqların da azad edilməsini gözləyirlər. Bununla belə, o vurğulayıb ki, Ukrayna əlində olan uşaqları və mülki şəxsləri mübadilə etməyəcək, sadəcə olaraq onları geri almaq istəyir. O, sülh üçün tam atəşkəsin zəruri olduğunu, bunun mülki hədəflərə hücumların dayandırılmasının vacibliyini və liderlərin sammitinin siyasi irəliləyiş üçün həlledici olacağını deyib. Ukrayna tərəfi bildirib ki, diplomatiyanı sülhün yeganə yolu olaraq görür və bunun üçün hücumlar tamamilə dayandırılmalıdır.
TAHİR
