Əliyevlə Trampın mövqeyi Ermənistanda dərin narahatlıq doğurub...
ABŞ prezidenti Donald Trampın Azərbaycan prezidenti İlham Əliyevin Xankəndidə III Şuşa Qlobal Media Forumunun iştirakçıları ilə görüşündəki çıxışını paylaşması və dövlət başçımızın buna görə təşəkkür etməsi iki ölkə arasında münasibətlərin inkişafına xüsusi töhfə verəcək. Bu sözləri millət vəkili Vüqar Bayramov qeyd edib.
O bildirib ki, ABŞ prezidentinin başqa bir prezidentin fikirlərini paylaşması mütəmadi müşahidə edilən hal deyil: “ABŞ prezidentləri çox az hallarda digər dövlət rəhbərlərinin çıxışlarını paylaşırlar. Bu, həmçinin cənab Əliyev tərəfindən Xankəndidə təşkil edilən forumda qaldırılan məsələlərə qlobal diqqət kimi xarakterizə olunmalıdır. Ermənistan işğalı zamanı baxımsız şəhərə çevrilən və son 2 ildə yenidənqurma və inkişaf mərhələsinə qədəm qoyan Xankəndi şəhərində keçirilən forum ilə bağlı belə bir paylaşımın olması həm də geosiyasi əhəmiyyət daşıyır. Xankəndidə verilən mesajlar paylaşılır və qlobal olaraq yüksək səviyyədə müzakirə edilir. Azərbaycanla ABŞ arasında ticarət dövriyyəsi ötən il 2022-ci il ilə müqayəsidə 3 dəfədən çox artıb. 2022-ci ildə 570 milyon dollar olan ticarət dövriyyəmiz 2023-cü ildə 904 milyon, ötən il isə 1 milyard 752 milyon dollar olub. Dövlətlər arasında əməkdaşlığın inkişaf edən dinamikası ticarət və qarşılıqlı sərmayə qoyluşları sahəsində daha geniş imkanlar yaradacaq”. Bu arada onu da xatırladaq ki, prezident İlham Əliyev Donald Trampa öz sosial şəbəkəsində onun Şuşa Qlobal Media Forumundakı çıxışını paylaşdığına görə təşəkkür edib. Dövlətn başçısı “X” hesabında bildirib: “Şuşa Qlobal Media Forumunda ABŞ-Azərbaycan tərəfdaşlığı və həmçinin prezident Donald Trampın həm qlobal, həm də regionumuzda sülh gündəliyinə sadiqliyi ilə bağlı qeyd etdiyim fikirlərimi öz sosial media platformasında paylaşdığına görə ona minnətdarlığımı bildirmək istərdim. Mən bir daha prezident Trampın bütün dünyada, o cümlədən regionumuzda sülhün və sabitliyin təşviq edilməsi ilə bağlı baxışını və səylərini dəstəklədiyimizi vurğulamaq istəyirəm. Biz, həmçinin ailə ənənələrinin əhəmiyyəti kimi ortaq dəyərləri bölüşürük və onun prezidentliyi dövründə ABŞ-Azərbaycan münasibətlərinin yeni səviyyəyə qalxacağına ümid edirik. Biz ona bu məqsədə nail olunması istiqamətində bütün səylərində uğurlar arzulayırıq”. Bütün bunlar Ermənistanda da diqqətlə izlənilir. Məsələ ilə bağlı “armenianreport” portal yazır ki, Azərbaycanın keçirdiyi qlobal media forumları Ermənistan üçün sarsıdıcı zərbələrdən biridir. Çünki burada Azərbaycan özünün təbliği baxımından mühüm üstünlüklər əldə edir: “Müxtəlif ölkələrdən və dünyanın guşələrindən olan təbliğatçılar, o cümlədən Yeni Kaledoniyadan olanlar ora axışırlar. Əliyevlə bir otaqda oturmaq hüququ qazananların hamısı belə xoşbəxtliyə görə ona dəfələrlə təşəkkür edirlər.
Ona verilən suallar da diqqət mərkəzindədir. Belə bir suala cavab verən Əliyev ABŞ prezidenti Donald Trampı tərifləyib. Bəli, bu, erməni cəmiyyətində emosiyalar fırtınasına səbəb olub. Lakin Azərbaycan prezidentinin Donald Trampa ünvanladığı sözlərə nə qədər emosiyalı yanaşılsa da, özünü heç nə baş verməyib kimi göstərmək elə özünü aldatmaqdır. Baş verən budur: rəsmi Bakı, deyəsən, ABŞ prezidentinin ürəyinə yol tapıb. Və bu yol, ümumi dəyərlərlə, daha doğrusu, bugünkü dünya siyasətində getdikcə daha çox dəyərləri əvəz edən məqamlarla bağlıdır. Əliyev açıq şəkildə bildirib ki, Tramp onun üçün ideal tərəfdaşdır. Nə üçün? Çünki o, Əliyev kimi, ailə də daxil olmaqla, fundamental dəyərləri bölüşür. Və ən əsası, ona görə ki, Tramp “heç bir müharibəyə başlamamış” yeganə ABŞ prezidentidir. Kim nə deyə bilər, amma bütün siyasi karyerası ərzində Donald Tramp heç vaxt Azərbaycanı tənqid etməyib. O, Qarabağ məsələsi haqqında bir söz deməyib. O, Bakıya qarşı heç bir sanksiya təşəbbüsü ilə çıxış etməyib… İndi də Tramp ABŞ-a rəhbərlik etdiyi üçün Əliyev rəğbətini gizlətmədən onu açıq şəkildə dəstəkləyir. Trampın zəif tərəfini başa düşən Əliyev qeyd edib ki, “Azərbaycan təbii ki, onun bir çox səbəblərə görə qalib gəlməsinə sevinir və təbii ki, biz ona məsələni sona qədər görməsini, xüsusən də “Vaşinqton bataqlığı”nı dibinə qədər qurutmasını arzulayırıq”. “Co Baydenin ağır irsi” ilə mübarizə Tramp üçün xüsusi məqamdır. Bu səbəbdən o, Azərbaycan prezidentinin çıxışından fraqmenti özünün “Truth Social” sosial şəbəkəsində paylaşıb. Belə çıxır ki, gözü Zəngəzurda olan qonşu ölkənin rəhbərliyi Vaşinqtondan təkcə siyasi sükutla yanaşı, həm də açıq dəstək alır. Bu, Birləşmiş Ştatların əxlaqi qaydalarının əsl deqradasiyasıdır. Vaxtilə özünü azadlıqların, demokratiyanın, məzlumların hüquqlarının müdafiəçisi elan edən Amerika, prinsiplərdən daha çox şəxsi simpatiyanın önəm verdiyi ölkəyə çevrilir. Bu, təkcə xarici siyasət böhranı deyil - bu, imperiyanın daxildən parçalanmasıdır. Axı Sovet İttifaqının dağılması belə başladı: sistemin qurulduğu mənəvi təməlin itirilməsi ilə. Amerikanın güclü və sarsılmaz olduğunu düşünənlər SSRİ-nin sonunu xatırlamalıdırlar. Onda da güldülər, geri dönməz hala gələnə qədər daxili çürüməyə əhəmiyyət vermədilər. Əgər ABŞ prezidenti həqiqətən də Azərbaycan modelinin örnək olduğuna inanırsa, bu, təkcə Ermənistan üçün deyil, bütün dünya üçün həyəcan siqnalıdır. Bu, o deməkdir ki, mənəvi sərhədlər artıq mövcud deyil”.
Nahid SALAYEV
