Azər Həsrət: “Bütün bunlar ölkəmizin tərəqqisi üçün vacib amillərdir”
“Azərbaycan mətbuatının müstəqilliyi cəmiyyətimizin inkişafının başlıca şərtlərindən biridir”. Bu fikir Prezident İlham Əliyevin Azərbaycan Milli Mətbuatının yaranmasının 150-ci ildönümü münasibətilə media nümayəndələrinə təbrik məktubunda yer alıb.
“Müstəqil, güclü, günümüzün tələblərinə cavab verən, xalqın maraqlarını rəhbər tutan mətbuatın inkişafı və onun sərbəst fəaliyyəti üçün zəruri şəraitin yaradılması hər zaman dövlətimizin qarşısında duran prioritet vəzifələrdən olmuşdur. Bu istiqamətdə daim sistemli iş aparılmış, ölkəmizin informasiya mühitinin sağlamlaşdırılmasını, media fəaliyyətinin potensialının və iqtisadi əsaslarının möhkəmləndirilməsini, rəqəmsal dövrün çağırışlarına uyğunlaşdırılmasını hədəfləyən normativ-hüquqi baza yaradılmış, informasiya resurslarının iqtisadi müstəqilliyinin gücləndirilməsi və jurnalistlərin sosial müdafiəsinin yaxşılaşdırılması məqsədilə əsaslı islahatlar həyata keçirilmişdir”, - deyə məktubda vurğulanıb.
“Azərbaycan mətbautının üzərinə düşən vəzifə də bu vəziyyətdən sui-istifadə etməmək, əksinə, azad media fəaliyyəti ilə bərabər məsuliyyətli davranışları da mənimsəməkdir”
Media eksperti, siyasi şərhçi Azər Həsrət “Bakı-Xəbər”ə bildirdi ki, Prezident İlham Əliyev Azərbaycan mediası ilə bağlı ən doğru, ən düzgün təsbitlərə malikdir. “Ötən onilliklər ərzində, təbiidir ki, həmişə mətbuatla birlik olub, jurnalistlərin yanında olub. Azərbaycan mətbuatının, bütövlükdə mediasının inkişafı üçün dövlətin edə biləcəklərinin memarı, müəllifi İlham Əliyevdir. Prezident İlham Əliyevin atdığı addımlar nəticəsində bu gün biz hətta gəliri olmayan qəzetləri belə ayaqda tuta bilirik. Yəni Azərbaycan dövləti, Prezident İlham Əliyevin şəxsən özü müstəqil mətbuatın, müstəqil medianın ayaqda dura bilməsi üçün mümkün olan hər şeyi edir. Niyə? Ona görə ki, müstəqil media fikir plüralizmi, azad cəmiyyət, ifadə azadlığı, cəmiyyətin inkişafı deməkdir. Üstəlik də dövlət qulluğunda olan, müxtəlif vəzifələrdə işləyən adamların üzərində vətəndaş nəzarəti deməkdir. Bütün bunlar bütövlükdə ölkənin tərəqqisi deməkdir. Bax, Azərbaycan dövləti, Azərbaycan Prezidenti məhz buna görə müstəqil medianın ayaqda durması üçün mümkün olan hər şeyi edir. Nəticələr də göz önündədir. Bu gün Azərbaycanda, özəllikdə də yüksək eşelonda olan məmurların böyük əksəriyyəti - nazirlər, deputatlar, icra başçıları, ayrı-ayrı vəzifəli şəxslər medianın tənqidinə tuş gəlməmək üçün əllərindən gələni edirlər”.
A.Həsrətin sözlərinə görə, yaxud çox-çox əvvəlki illərdən fərqli olaraq, hazırda mətbuatdan qaçan bir nəfər nazirə, icra başçısına, vəzifəli şəxsə rast gəlmirik, tək-tük adamlar var ki, mediadan gizlənir. “Əksəriyyət mediaya açıq olmağı artıq özünün vəzifə borcu hesab edir. Niyə? Ona görə ki, Prezident İlham Əliyevin özü mediaya çox açıqdır, tənqidlərə dözümlüdür, təmkinlidir, eyni zamanda mətbuatın qaldırdığı məsələlərin həllinə böyük önəm verir. Əlbəttə, onun belə xarakteri varkən şəxsinin təyin etdiyi vəzifəli insanlar mediadan qaçıb gizlənə, mediaya arxa çevirə bilməzlər. Bütün bunlar ölkəmizin tərəqqisi üçün vacib amillərdir və bu amilləri təmin edən şəxs də elə Prezident İlham Əliyevin özüdür. Azərbaycan mətbuatının üzərinə düşən vəzifə də bu vəziyyətdən sui-istifadə etməmək, əksinə, azad media fəaliyyəti ilə bərabər məsuliyyətli davranışları da mənimsəməkdir”-deyə A.Həsrət bildirdi.
İradə SARIYEVA
