Tural İsmayılov: "Donald Trampın Prezident İlham Əliyevin III Şuşa Qlobal Media Forumundakı çıxışından bir hissəni paylaşması sadəcə bir jest deyil – bu, siyasi siqnaldır"
ABŞ Prezidenti Donald Tramp Prezident İlham Əliyevin Xankəndi şəhərində keçirilən III Şuşa Qlobal Media Forumunda çıxışından fraqmenti “Truth” sosial şəbəkəsindəki səhifəsində paylaşıb.
Çıxışın paylasılan hissəsində Əliyev bəyan edib ki, Donald Tramp Azərbaycan xalqı ilə fundamental dəyərləri, o cümlədən ailə dəyərlərini bölüşür və buna görə də ABŞ onun seçilməsini istəyir. Dövlət başçısı qeyd edib ki, Tramp ABŞ-ın yeganə prezidentidir ki, bir dəfə də olsun müharibəyə başlamayıb, əksinə, onlara son qoymağa çalışır.
Əliyev Donald Trampın daha böyük qlobal təhlükəsizlik məsələlərinə diqqət yetirməsinə baxmayaraq, Ermənistan və Azərbaycan arasında yekun razılığın əldə olunmasında şəxsi marağına görə ona minnətdarlığını bildirib.
Tramp İlham Əliyevin fikirlərini sosial şəbəkədə paylaşmaqla nə demək istəyir?
Donald Trampın Prezident İlham Əliyevin III Şuşa Qlobal Media Forumundakı çıxışından bir hissəni paylaşması sadəcə bir jest deyil – bu, siyasi siqnaldır. Tramp bu paylaşım vasitəsi ilə bir neçə məsələni eyni anda vurğulayır. Əvvəla o, Azərbaycan Prezidentinin fikirlərində özünün beynəlxalq siyasətdəki əsas iddialarını əks olunmuş görür: müharibəyə yox, sabitliyə və dəyərlərə bəli. İlham Əliyevin onun haqqında dediyi "bir dəfə də olsun müharibəyə başlamamış prezident" fikri Trampın ritorikasına birbaşa uyğundur.
Bunları baki-xeber.com-a açıqlamasında siyasi şərhçi Tural İsmayılov deyib.
O əlavə etdi ki, eyni zamanda, bu paylaşım Trampın ABŞ-ın ənənəvi müttəfiqlərindən kənarda da nüfuzunun olduğunu nümayiş etdirir: "Azərbaycan kimi strateji və enerji baxımından önəmli bir ölkənin lideri ilə dəyərlərin üst-üstə düşməsi Tramp üçün diplomatik kapitaldır. İlham Əliyevin onun ailə dəyərləri və müharibəsiz siyasətinə verdiyi dəyəri paylaşmaq Trampın beynəlxalq səviyyədə də dəstəkləndiyini göstərmək məqsədi daşıyır.
Burada daha incə bir məqam da var: Tramp Ermənistan-Azərbaycan məsələsində, görünür, yenidən vasitəçi rolu oynamaq niyyətindədir. Əliyevin onun şəxsi maraq göstərməsinə dair sözləri də bu ehtimalı gücləndirir. Tramp bu paylaşımı ilə həm də mesaj verir ki, bölgədə sabitlik və ədalət onun siyasi gündəmində yer almağa davam edir".
Siyasi şərhçi vurğuladı ki, bundan əlavə, “Truth Social” platformasında bu paylaşıma yer verilməsi Trampın ailə dəyərləri, ənənəvi mühafizəkar mövqe və beynəlxalq məsuliyyət daşıyan lider obrazını çatdırmaq üçündür: "O göstərmək istəyir ki, təkcə ABŞ daxilində deyil, xaricdə də lider kimi qəbul olunur. Tramp bu paylaşımı ilə həm öz ritorikasını gücləndirir, həm də İlham Əliyevin regional liderlik iddiasına hörmət göstərir.
Bu, eyni zamanda ABŞ-Azərbaycan münasibətlərinin gələcəyi üçün də müəyyən işarədir. Paylaşım həm də göstərdi ki, Azərbaycanın mövqeyi və liderinin beynəlxalq çıxışları artıq qlobal informasiya gündəminə təsir edə bilir. Yəni Prezident Əliyevin fikirləri artıq təkcə region üçün deyil, dünya üçün mesaj xarakteri daşıyır. Tramp bunu görür və bu fikirləri paylaşaraq öz maraqlarına uyğun dəyərləndirir".
Dəniz NƏSİRLİ
