Əli Orucov: "Rusiyadan fərqli olaraq, Azərbaycan imzasının və verdiyi sözün sahibi olub, dostluğa və müttəfiqliyə sadiq qalıb"
“Rusiya ilə Azərbaycan arasında münasibətlərin pisləşməsi ilə anlaşıldı ki, Bakı onun (Rusiyanın) iddia etdiyi tərəfdaş deyil”. Bunu Dövlət Dumasının MDB işləri üzrə komitəsi sədrinin birinci müavini Konstantin Zatulin deyib.
Deputat qeyd edib ki, Rusiya uzun müddət Azərbaycanla strateji tərəfdaşlıq və müttəfiqlik söhbətlərindən “məst olub”. Lakin indi, onun fikrincə, Bakının artıq dost dövlət obrazı yaratmağa ehtiyacı yoxdur, çünki Azərbaycan hakimiyyəti hesab edir ki, Rusiya Ukraynadakı hadisələrlə və Qərblə qarşıdurma ilə çox məşğuldur və onların Rusiya Federasiyasının milli maraqlarına zidd hərəkətlərinə ciddi reaksiya verə bilməz.
Zatulin vurğulayıb ki, Azərbaycan Türkiyənin dəstəyinə arxalanaraq, Rusiya və Ermənistanla əvvəlki razılaşmalara məhəl qoymadan Zaqafqaziyada vəziyyəti qəsdən gərginləşdirir. Deputat Türkiyənin NATO üzvü olduğunu da xatırladıb, o bunu RİA Novosti ilə söhbətində deyib.
Necə yəni "Rusiya anladı ki, Azərbaycan onun iddia etdiyi kimi deyil"?
Maraqlıdır, Rusiya Azərbaycanı neçə bir tərəfdaş kimi təsəvvür edirdi, amma alınmadı?..
Zatulin kimi məsuliyyətsiz şəxslərin bu cür yanlış təsəvvürləri və absurd iddialarıdır ki, Rusiya beynəlxalq qınağın və sanksiyaların altında əzilir. Dünyada demək olar ki, təklənib, dostu və müttəfiqi qalmayıb. Təkcə Rusiya dövlətinə deyil, rus xalqına qarşı da münasibət mənfiyə doğru dəyişməkdədir.
Rusiya tarixinə ötəri nəzər salmaq kifayət edər ki, bu dövlətin əsl imici və siması barədə fikir formalaşsın. SSRİ imperiyasının xalqlar həbsxanası adlandırılması da təsadüfi deyil. Həmin qanlı imperiyanın hüququ varisi olan Rusiya eyni siyasi xətti davam etdirir, təkcə qonşu millət və xalqlara deyil, öz daxilindəki etniklərə qarşı da ayrıseçkilik edir, onları assimilyasiyaya uğradır, əzir, məhv edir. Kremldəkilər hələ də keçmiş müstəmləkələri olmuş, sonradan müstəqilliklərinə qan-qada ilə yenidən qovuşan azad xalqlara yuxarıdan aşağı, özünün təbəəsi kimi baxır. Son dövrlər imperiyapərstlərin fəallaşması və postsovet ölkələrində boy göstərmə çabaları narahatlıq doğurur. Bunu baki-xəber.com-a açıqlamasında politoloq Əli Orucov deyib.
Siyasi ekspert onu da vurğuladı ki, Zatulin həmişə Azərbaycana qarşı qərəzli mövqeyinə görə xüsusilə seçilib. Rusiyadan fərqli olaraq, Azərbaycan imzasının və verdiyi sözün sahibi olub, dostluğa və müttəfiqliyə sadiq qalıb: "Azərbaycan çağdaş dünyamızda beynəlxalq hüququn işləməsində və güc amilinin əsas faktora çevrilməsinin qarşısının alınmasında təşəbbüslərini davam etdirməkdədir. Məhz buna görə də Azərbaycana hörmət və etimad göstərilir, dostlarının, tərəfdaşlarının siyasi coğrafiyası genişlənir. Rusiya dostluğu səhv improvizə edir. Moskvaya dost və qarşılıqlı maraqlara əsaslanan əməkdaşlıq deyil, satellit, arxa bağça lazımdır. Azərbaycan da heç vaxt belə dövlət olmayıb və olmayacaq. Azərbaycan müstəqil və suveren dövlətdir və öz mənafelərini qorumağa da qadirdir.
2022-ci ildə Rusiya ilə Azərbaycan arasında bağlanmış strateji müttəfiqlik bəyannaməsinə də məhz Moskva xəyanət etdi. AZAL-a məxsus şərnişin təyyarəsini qəsdlə vuraraq qəzaya uğratdı. Bu azmış kimi, törədilən cinayəti araşdırmaq və buna əmr verənləri cəzalandırmaq, zərərçəkənlərə kompensasiya ödəmək və Azərbaycan dövlətindən rəsmən üzr istəmək əvəzinə susdurmağa çalışması, soydaşlarımızı hədəf götürməsi haqlı etiraz doğurdu.
Azərbaycana Kreml başqa seçim qoymayıb. Ədalətin bərpası üçün gərəkəni etmək onun suveren və beynəlxalq hüququdur. Ukraynanın ərazi bütövlüyünün Bakı tərəfindən tanınması aydın və dəyişməz mövqe olub. 30 il ərazisinin 20 faizi işğal altında olmuş Azərbaycan işğalın, təcavüzkar müharibənin nə olduğunu çox yaxşı anlayır və sərgilədiyi mövqe də tam ədalətlidir. Bu, Moskvanın xoşuna gəlmir deyə Bakı haqsızmı davranmalıdır, dünya hüquq sisteminin dağıdılmasına gözmü yummalıdır? İndiyədək Azərbaycan heç bir xarici gücün diqtəsi ilə hərəkət etməyib, bundan sonra da etməyəcək. Bunu nəhayətdə Rusiya da qəti şəkildə anlamalıdır".
Akif NƏSİRLİ
