Gürcüstanda parlament seçkilərinin nəticələrini tənqid edən Avropa İttifaqı ölkələrinin nazirləri yerli hökumətin Brüsseldən deyil, xalq tərəfindən seçildiyini həzm edə bilmirlər. Belə bir açıqlama ilə Macarıstanın xarici işlər və xarici iqtisadi əlaqələr naziri Peter Siyarto çıxış edib.
Həqiqətən də Qərb Gürcüstanda parlament seçkilərinin nəticələrindən şoka düşmüş vəziyyətdədir. Bu fonda da Gürcüstana yeni təzyiqlərə start verilib. Qərbdən olan müşahidəçilər Gürcüstanda "dərin qütbləşmənin" olduğunu iddia edərək, seçicilərə və vətəndaş cəmiyyətinə əsassız təzyiqlərin olduğunu bildiriblər. Qeyd edək ki, Gürcüstanda keçirilən parlament seçkiləri üzrə beynəlxalq müşahidə missiyası 42 ölkədən 529 müşahidəçi, o cümlədən 380 ekspertdən ibarət olub. Lakin seçkilərdə hansısa ciqqi qanun pozuntusuna dair ortaya hansısa fakt qoyulmayıb. Buna rəğmən, ATƏT-dən olan avropalı müşahidəçilər heç bir əsas olmadan bəyan edirlər ki, Gürcüstan seçkiləri qeyri-bərabər şərait, təzyiq və gərginliklə keçib, lakin seçicilərə geniş seçim imkanları təklif edilib. AŞPA nümayəndə heyətinin rəhbəri İulian Bulay deyib: "Müşahidələrimiz zamanı, xüsusən də kənd yerlərində seçkilərdən əvvəl və seçkilər zamanı səslərin satın alınması və ikiqat səsvermə hallarını qeyd etdik". Avropa Parlamentinin Müşahidəçilər Missiyasının rəhbəri Antonio Lopez-İsturiz Uayt bildirir: "Hakim "Gürcü Arzusu" partiyası səsverməyə xələl gətirmək və manipulyasiya etmək məqsədilə seçki öncəsi düşmənçilik ritorikasından istifadə edib, Rusiya dezinformasiyasını və konspirasiya nəzəriyyələrini təbliğ edib". "Gürcü Arzusu" partiyası seçkilərin nəticələrinin saxtalaşdırılması ilə bağlı xəbərləri təkzib edib. Baş nazir İrakli Kobaxidze nəticələri yekunlaşdırdıqdan sonra deyib: "Gürcü xalqı alternativi olmayan yeganə seçim etdi ki, onlar ölkənin sülhünü və inkişafını, onun parlaq, Avropa gələcəyini seçdi". Macarıstanın baş naziri Viktor Orban da bu fonda dəqiq mövqe ifadı edir: "Gürcüstanda seçkilərin nəticələri danılmazdır, onlar azad və demokratik keçib. Avropada hələ mübahisələr olacaq, bunu ciddi qəbul etmək lazım deyil. Əgər liberallar qalib gəlirsə, Brüsseldə deyirlər ki, demokratiya var. Mühafizəkarlar qalib gəlirsə, demokratiyanın olmadığını bildirirlər. Bu, adi haldır". Gürcüstanda keçirilən parlament seçkiləri nəticəsində hakim "Gürcü Arzusu" partiyasının qalib gəlməsi bir daha göstərdi ki, Qərbin region dövlətlərinin daxili işlərinə qarışmaq cəhdləri baş tutmayacaq. Gürcü xalqı müxtəlif geosiyasi oyunlar nəticəsində üzləşdiyi müharibə və iqtisadi tənəzzülü rəd edərək dövlətin yanında olduğunu göstərdi. Gürcü politoloq Lali Moroşkina seçkilərin nəticələrini qiymətləndirərək bildirib ki, Gürcüstanda müxalifətyönlü mətbuat və televiziya kanallarının çox olmasına baxmayaraq, hakim "Gürcü Arzusu" səslərin böyük hissəsini qazandı. Onun fikrincə, hazırda müxalifət partiyaları Qərbdən göstəriş gözləyirlər ki, növbəti addımlarını atsınlar. Əgər siyasi mübarizə "küçədə" davam etsə, Gürcüstanda ictimai-siyasi vəziyyət pozula bilər və buna görə məsuliyyəti Qərb daşıyacaq. Hakim partiyanın qələbəsi Qərbin Gürcüstanda yürütdüyü siyasətə və regionda ayırıcı xətlər yaratmaq cəhdlərinə böyük zərbədir.
Belə vəziyyətdə Qərb təmsilçilərinin fəaliyyəti Gürcüstanın sabitliyinə və inkişafına xələl gətirmək cəhdlərindən başqa bir şey deyil. ABŞ-ın proksiləri hesab olunan Estoniya, Litva, Latviya kimi ölkələrin ortaya düşmələri də bundan qaynaqlanır. Onlar faktiki olaraq, Qərbin uduzmasına görə Gürcüstana qarşı hibrid müharibəyə başlayıblar. Bunun davamı olaraq, Gürcüstanda keçirilən parlament seçkilərindən sonra Kanada bu ölkənin rəhbərliyi ilə münasibətlərinə yenidən baxmaq niyyətində olduğunu açıqlayıb. Qeyd olunur ki, Kanada 2024-cü il oktyabrın 26-da ölkənin Mərkəzi Seçki Komissiyasının elan etdiyi parlament seçkilərinin rəsmi nəticələrini nəzərə alıb. Kanada Xarici İşlər Nazirliyi bildirir: "Biz bütün tərəfləri sakitliyə, Gürcüstan hakimiyyətini isə dinc etirazlar kontekstində insanların hüquq və təhlükəsizliyinə hörmət etməyə çağırırıq". Bütün bunlar ona görədir ki, Brüsseldə Gürcüstanın Ukrayna taleyini yaşamasını istəyən çox adam var, lakin Gürcüstan xalqı bununla razılaşmadı. Latviyalı politoloq Karlis Daukşts bu fonda bildirir ki, Gürcüstan müxalifəti seçkilərin nəticələrini tanımadığını bəyan edir, lakin ortaya əsaslı arqument qoya bilmir. Politoloq seçkiləri yaxından müşahidə etdiyini deyib və belə nəticəyə gəlib ki, ölkənin məhkəmə orqanları seçkilərin qanunauyğun keçdiyini bildirərək nəticələri təsdiqləyəcək. Onun fikrincə, müxtəlif xarici mərkəzlərdən idarə olunan müxalifətdə birlik olamadığı üçün məğlubiyyəti qaçılmaz idi. Amma Qərb bununla barışmaq istəmir. Çünki Qərbin əsas məqsədi Cənubi Qafqazda Ermənistanın ardınca Gürcüstanda da marionet hökumət formalaşdırmaq, ölkəni geosiyasi qarşıdurma platformasına çevirməkdir. Amma Gürcüstan hakimiyyət buna imkan vermir və ölkədəki r Qərb şəbəkəsini ifşa etmək istiqamətində ciddi addımlar atır. İndi hesab olunur ki, artıq Gürcüstanda Qərbin təhlükə yaradan şəbəkəsini tam yığışdırmağın vaxtı çatıb. Azərbaycan da regionun lider ölkəsi kimi bu prosesdə Gürcüstana bütün lazımi dəstəyi verməyə hazırdır. Bu gün Gürcüstan-Azərbaycan birliyi mövcuddur və tarix də göstərir ki, bu birlik olanda hər iki dövlət güclü olur, öz maraqlarını müdafiə edir, beynəlxalq səviyyədə də eyni mövqedən çıxış edir. Onu da qeyd edək ki, Gürcüstanda 300 minə yaxın azərbaycanlı yaşayır və bu ərazilərdə yüksək seçki fəallığı müşahidə olunurdu. Azərbaycanlı seçicilər ümumi səslərin formalaşmasında təxminən 7-8 faizlik paya malik olaraq Gürcüstanın gələcək siyasi mənzərəsinə təsir göstərdilər. Bu, gələcəkdə Azərbaycan və Gürcüstan arasındakı əlaqələrin daha da möhkəmlənməsinə şərait yaradan amillərdəndir. Hər iki ölkə üçün belə əlaqələr olduqca mühümdür.
Tahir TAĞIYEV
