Xəyal Bəşirov: "Bunu qarşılıqlı şəkildə gündəmə gətirmək və "hərbi əsirlərin" mübadiləsi görüntüsünü yaratmaq cəhdi, təbii ki, Ermənistanın növbəti saxtakarlığıdır"
Ermənistan Milli Təhlükəsizlik Xidmətinin direktoru Armen Abazyan jurnalistlərə bildirib ki, yaxın vaxtlarda Ermənistan və Azərbaycan tərəfləri əsir və itkin düşmüş şəxslərlə bağlı görüş keçirəcəklər. O bildirib ki, komissiyaların tərkibi və yeri hələ seçilməyib. Abazyan deyib ki, tarixlər barədə əlavə məlumat veriləcək.
"Nəticələrlə bağlı açıqlama verməyə tələsməyək", - deyə o, bu görüşdən müəyyən nəticələr gözləmək olarmı sualına cavab verib.
Abazyan deyib ki, Bakı və İrəvan arasında yaxın zamanda itkin düşmüş və "saxlanılan şəxslərə" dair görüş keçirilə bilər.
Ermənistan tərəfi, həmişə olduğu kimi, yenə də öz məkrli məqsədlərindən çıxış edir. Bunlar iki dəxli olmayan məsələni bir-birinə birləşdirirlər. Qondarma "hərbi əsirlər" məsələsi ilə itkin düşmüş şəxslər məsələsini bir-birinə calaq edirlər. Bunları bir-birinə calamaq qəti şəkildə olmaz, çünki Azərbaycanda hərbi əsir yoxdur. Ermənistanın qondarma "hərbi əsir" məsələsini gətirib itkin düşənlərin gözünə qatmaq istəməsi o deməkdir ki, onlar itkin düşmüş şəxslərin məsələsinin müzakirəsində həqiqətən də maraqlı deyillər. Çünki məsələ belə qoyulursa, "hərbi əsir" adı qoyduqları adamları da gətirib itkin düşmüş şəxslərə qoşmaq istəyirlərsə bu alınmayacaq, bu danışıq baş tutmayacaq.
Hərbi əsirlər olmaya-olmaya Ermənistanın bu məsələni itkin düşmüş şəxslərlə birləşdirməsi nə dərəcədə doğru yanaşmadır?
"Cinayətkar ünsürlərə "hərbi əsir" adı verib onların Azərbaycanın itkin düşmüş, girov götürülmüş vətəndaşları ilə bir yerə qoyulması cəhdi yolverilməzdir, bunlar bir-biri ilə fərqli məsələlərdir"
Siyasi Hüquq və Araşdırmalar Mərkəzinin rəhbəri Xəyal Bəşirov "Bakı-Xəbər"ə şərhində bildirdi ki, Ermənistan yenə də pozuculuq siyasətini davam etdirir. O qeyd etdi ki, Ermənistan sülh sazişinin mətninə aid olmayan, eyni zamanda prosesi uzadacaq, prosesin yekunlaşmasına mane olacaq məqamları gündəmə gətirməyə çalışır: "Bundan əvvəl dırnaqarası ifadələr işlədirdilər, "Artsax", "Dağlıq Qarabağ", "status" kimi uydurmalardan danışırdılar ki, onların Azərbaycan qəti şəkildə sülh gündəliyinə daxil edilməsinə qarşı oldu. Hətta Azərbaycan sülh prosesinin sürətlə getməsi, qısa müddət ərzində sülhün əldə olunması üçün "Zəngəzur dəhlizi" məsələsinin də sülh gündəliyindən çıxarılmasına razılıq verdi. Əslində, faktiki olaraq "Zəngəzur dəhlizi" məsələsi 10 noyabr 2020-ci il tarixli bəyanatın tələblərinə uyğun idi. Yəni orda qeyd olunmuşdu. Biz gördük ki, bu məsələ prosesi uzadır, biz onun hələlik sülh gündəliyindən çıxarılmasına və gələcəkdə müzakirə predmetinə çevrilməsinə razılıq verdik. Amma Ermənistan tərəfi olmayan "hərbi əsir" məsələsini ortaya atır. Bəli, azərbaycanlıların Ermənistanda itkin düşməsi, bu ölkədə hərbi və mülkü əsir olaraq 4 minə yaxın insanımızın müqəddəratının bugünə qədər məlum olmaması məsələsi var. Amma bunu qarşılıqlı şəkildə gündəmə gətirmək və "hərbi əsirlərin" mübadiləsi görüntüsünü yaratmaq cəhdi, təbii ki, Ermənistanın növbəti təxribatıdır, növbəti saxtakarlığıdır. Düşünürəm, əslində Ermənistan bu məsələni bu şəkildə gündəmə gətirməli idi ki, o artıq Azərbaycanla həqiqətən də sülh istəyir, Azərbaycana qarşı ərazi iddiasından əl çəkir, eyni zamanda bunu konstitusional qaydada edir, öz konstitusiyasına, digər qanunvericilik aktlarına dəyişiklik edərək bu iddiasına birdəfəlik son qoyur. Həmçinin, bizim Ermənistanla gələcəkdə münasibətlərimizin normallaşması, diplomatik əlaqələrin yaranması üçün qalan probemlərdən biri Azərbaycanın Ermənistandakı hərbi əsirlərinin, mülki insanlarının, qadınlarımızın, körpələrimizin, köməksiz vəziyyətdə olan insanlarımızın müqəddəratı ilə bağlı məsələdir. Birinci Qarabağ müharibəsi dövründə bizim 4 minə yaxın insanımızın, İkinci Qarabağ müharibəsində 6 vətəndaşımızın müqəddəratı bugünə qədər bəlli deyil. Ermənistan onlarla bağlı heç bir məlumat vermək istəmir. Hər bir halda bizə məlumdur ki, Ermənistan onlara qarşı hansı cinayətləri törədib, amma Ermənistan tərəfi düşmənçilik daşını birdəfəlik atmaq, özünü dünyaya sülh tərəfdarı olaraq həqiqətən də reallıqda göstərmək istəyirsə bu addımları atmalıdır".
X.Bəşirovun sözlərinə görə, Ermənistan tərəfin son zamanlar ortaya atdığı "hərbi əsir" məsələsi isə absurddur, olmayan bir şeydən necə danışmaq olar? "Ermənistan Milli Təhlükəsizlik Xidmətinin direktoru Armen Abazyandan əvvəl bu absurd məsələni bir neçə Ermənistan nümayəndəsi dilə gətirib, ən son isə Ermənistan prezidenti bu fikri səsləndirmişdi. O qeyd etmişdi ki, Azərbaycanla hərbi əsirlərin qaytarılması məsələsi müzakirə edilir. Təbii ki, bununla bağlı Azərbaycanın rəsmi mövqeyi bəllidir. Azərbaycan ərazisində separatizmlə, bölücülüklə, cinayətkarlıqla və sairlə məşğul olan və hazırda həbsdə olan şəxsləri onlar "hərbi əsir" adlandırırlar. Halbuki, onlar "hərbi əsir" yox, cinayətkar ünsürlərdir. Araik Artunyunyan, Ruben Vartanyan, Bako Saakyan, Arkadi Qukasyan kimi cinayətkar ünsürlər var ki, onlar Azərbaycan ərazilərində qanunsuz olaraq cinayətkar bir rejim yaradıb, onu "dövlət" adlandırıblar və özlərini həmin "dövlətin rəhbərləri" kimi qələmə verirdilər. Həmin o cinayətkarların əlləri Azərbaycan xalqının qanına batıb, onlar İkinci Qarabağ müharibəsinə qədər də ağır cinayətlər törətdiblər, bu da sübut olunub. Həmin o şəxslərin əlləri Azərbaycan xalqının qanına batıb, bunu yaxın tarix göstərir. Eyni zamanda onlar İkinci Qarabağ müharibəsi zamanı Azərbaycanın döyüş meydanından kənarda yerləşən ayrı-ayrı mülki şəhərlərinə, dinc insanlarına qarşı terror həyata keçiriblər. Döyüş cəbhəsindən uzaqda olan Gəncəyə, Bərdəyə, Tərtərə və başqa şəhərlərimizə raket atıblar, nə qədər mülki əhalimiz şəhid olub, insanların mal-mülkünə ziyan dəyib, evlər, binalar dağıdılıb. Cinayətkar ünsürlər tərəfindən törədilmiş o cinayətlər nəticəsində yaranan faciələrin 4 illiyini qeyd edirik bu günlərdə. O adamlar Azərbaycana qarşı müharibə cinayətləri törədiblər, Azərbaycan xalqına qarşı etnik, milli-irqi, dini təmizləmə həyata keçiriblər. "Smerç", "Toçka-U" raketlərindən, kasetli bombalardan və digər qadağan olunmuş silahlardan istifadə ediblər. Hətta onlar bunu açıq şəkidlə bəyan edirdilər. Araik Artunyunyan özü hələ tutulmamışdan əvvəl müsahibə zamanı deyirdi ki, Azərbaycanın cəbhə bölgəsindən kənarda yerləşən mülki şəhərlərinə raketlərin atılmasına o göstəriş verib. Bu cinayətkar ünsürləri "hərbi əsir" adlandırmaq özü-özlüyündə erməni rəsmilərin nə qədər yalan, nə qədər saxtakar, nə qədər ikiüzlü olmalarından xəbər verir.
Cinayətkar ünsürlərə "hərbi əsir" adı verib onların Azərbaycanın itkin düşmüş, girov götürülmüş vətəndaşları ilə bir yerə qoyulması cəhdi yolverilməzdir, bunlar bir-biri ilə fərqli məsələlərdir".
X.Bəşirovun sözlərinə görə, Ermənistan cəmiyyəti, Ermənistan dövləti, Ermənistana rəhbərlik edən şəxslər həqiqətən də Azərbaycanla sülh istəyirlərə, Cənubi Qafqaz bölgəsində növbəti eskalasiyalardan yana deyillərsə, düşmənçilik siyasətini bir kənara qoymaq istəyirlərsə, özləri belə cinayətkar ünsürlərdən qurtulmağa çalışmalıdırlar. X.Bəşirov qeyd etdi ki, Azərbaycan da o şəxsləri antiterror tədbirləri zamanı zərərsizləşdirdi və onları həbs etdi, indi də bu cinayətkarları ədalət mühakiməsinin qarşısına çıxarmaq istəyir. "Ermənistanın bu məsələdə Azərbaycana dəstək olmaq, təşəkkür etmək əvəzinə həmin o cinayətkar ünsürləri "hərbi əsir" adlandırması ondan xəbər verir ki, Ermənistana bu gün rəhbərlik edən şəxslərin mahiyyəti həmin o cinayətkar ünsürlərdən fərqlənmir. O cinayətkar ünsürlərin yürütdükləri düşmənçilik siyasətini onlar bu gün də davam etdirmək niyyətindədirlər. Düşünürəm ki, bu, sülh prosesinə mane olur. Ermənistan nə qədər bu şəkildə davam edəcəksə Azərbaycanla sülh əldə olunmayacaq. Bunun da əsas baiskarı məhz Ermənistan və Ermənistana rəhbərlik edən, pozuculuqla məşğul olan şəxslərdir" - deyə X.Bəşirov qeyd etdi.
İradə SARIYEVA
