Emin Həsənli: "Azərbaycan ordusu Dünya Silahlı Qüvvələri sırasında ən nüfuzlu yerlərdə yer alır"
Azərbaycanın Silahlı Qüvvələri dünyanın ən güclü ordularının reytinqində yer alıb. Bunu ABŞ-nin "U.S. News and World Report" nəşri tərəfindən təqdim olunan məlumatlar əks etdirir.
Qeyd edək ki, siyahıda ilk sıralarda Rusiya, ABŞ, İsrail, Çin, Böyük Britaniya, Almaniya, Türkiyə, Ukrayna orduları yer alıb. Məlumat üçün bildirək ki, siyahıda Azərbaycan Ordusu 29-cu yerdə qərarlaşıb.
Onu da bildirək ki, Banqladeş siyahıda 30-cu, Kolumbiya 31-ci, Kanada 32-ci, İtaliya 34-cü yeri tutur. Ermənistan və Gürcüstan siyahıda yer almayıb.
Son illər ərzində bu sahədə həyata keçirilən davamlı islahatlar və məqsədyönlü tədbirlər nəticəsində Azərbaycanda çox sürətlə və yüksək səviyyədə aparılan ordu quruculuğu işi artıq öz bəhrəsini verib. Bunun qanunauyğun nəticəsi kimi, Azərbaycan regionda ən güclü orduya malik olan dövlətə çevrilib. Hazırda Azərbaycan Ordusu dünyanın ən güclü orduları sırasındadır. Yəni ölkəmiz güclü orduya, təkmilləşmiş hərbi sistemə və inkişaf etmiş müdafiə sənayesinə malikdir. Azərbaycan Silahlı Qüvvələri quruda, suda və havada döyüş tapşırığını yerinə yetirmək, ölkəni istənilən hücumdan müdafiə etmək qüdrətinə malikdir. Beynəlxalq hərbi tədqiqat mərkəzlərinin rəyinə görə, Azərbaycan Ordusu regionun ən hazırlıqlı və müasir hərbi strukturu sayılır.
"Mənəvi, psixoloji hazırlığına və döyüş ruhuna görə də Azərbaycan ordusu reytinq siyahılarında ilk yerlərdə yer alıb"
Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli "Bakı-Xəbər"ə açıqlamasında bildirdi ki, son illər Azərbaycan ordusunun reytinqi dünyanın ən məşhur hərbi nəşrləri, agentlikləri tərəfindən yüksək qiymətləndirilir. Azərbaycan ordusu Dünya Silahlı Qüvvələri sırasında ən nüfuzlu yerlərdə yer alır: "Azərbaycan ordusunun peşəkarlığı dünyanın diqqətini cəlb edir. 2020-ci ildə 44 günlük Vətən müharibəsində Azərbaycanın əldə etdiyi qələbə və birgünlük antiterror tədbiri yüksək qiymətləndirilir. Azərbaycan ordusu müxtəlif reyleflərdə, dağlıq ərazilərdə müasir və klassik döyüş üsulunu peşəkarcasına həyata keçirir. Bu kimi amillər Azərbaycan ordusunun dünyada reytinqini yüksəldir".
Həmsöhbətimizin sözlərinə görə, Azərbaycan ordusu bizim qürurumuzdur. Mənəvi, psixoloji hazırlığına və döyüş ruhuna görə də Azərbaycan ordusu reytinq siyahılarında ilk yerlərdə yer alıb. 44 günlük Vətən Müharibəsi zamanı Azərbaycan xalqının hər bir üzvü səfərbər oldu və döyüşə getmək istəyini bəyan etdilər. Bu kimi faktlar Azərbaycan ordusunun qüdrətini, gücünü artırır.
Günel CƏLİLOVA
