Əli Orucov: "Böyük dövlətlər arasında gedən geosiyasi mübarizə üzündən BMT nüfuzunu itirib"
"Mehr" agentliyi xəbər verir ki, İran xarici işlər nazirinin hüquq və beynəlxalq məsələlər üzrə müavini Kazem Qaribabadi xarici işlər nazirinin BMT Təhlükəsizlik Şurasına İsrailin İrana hücumu ilə bağlı təcili iclas keçirməyə çağıran məktubundan çıxarışlar dərc edib.
Qaribabadi sosial şəbəkə hesabında xarici işlər naziri Abbas Araqçının BMT-nin baş katibi və Təhlükəsizlik Şurasının üzvlərinə İsrail qüvvələrinin İranın hərbi obyektlərinə son hücumu ilə bağlı məktubundan çıxarışlar dərc edib. Məktubda deyilir: "İranın hava hücumundan müdafiə sistemi raketlərin əksəriyyətini ələ keçirdiyi halda, İran ordusunun dörd zabiti öz ölkələrinin milli təhlükəsizliyini qorumaq üçün cəsarətlə canlarını fəda etdilər və şəhid oldular".
O, İsrailin qəsdən hücumunu qətiyyətlə pisləyib və qeyd edib ki, İsrail BMT Nizamnaməsinin 2-ci maddəsinin 4-cü bəndini pozur. İranlı diplomat vurğulayıb ki, İran İslam Respublikası Birləşmiş Millətlər Təşkilatının Nizamnaməsində və beynəlxalq hüquqda təsbit olunmuş prinsiplərə uyğun olaraq, lazımi vaxtda bu cinayətkar hücumlara qanuni cavab vermək hüququnu özündə saxlayır.
Diqqəti çəkən məqam odur ki, İran Təhlükəsizlik Şurasının xüsusi iclasının çağrılmasını tələb edir, amma BMT susur və iclasın çağırılmasına tələsmir.
"İsrailə qarşı olan istənilən qərara ABŞ veto qoyacaq"
Sözügedən məsələni "Bakı-Xəbər"ə şərh edən AMİP funksioneri Əli Orucov belə vəziyyətin yaranmasını bir sıra amillərlə əlaqələndirdi: "Bunun başlıca səbəbi İranın mənfi beynəlxalq imici ilə əlaqəlidir. Məsələ ondadır ki, bir sıra ölkələr İranı terroru dəstəkləyən ölkə kimi tanıyır. Söhbət Yaxın Şərqdəki bir sıra qruplaşmaların İran tərəfindən himayə olunmasından və maliyyələşdirilməsindən gedir. İrana qarşı tətbiq olunan sərt sanksiyaların bir qismi bununla əlaqədardır. Ona görə də İranın tələbini görməzdən gəlirlər. İkincisi, BMT Təhlükəsizlik Şurasının 5 daimi üzvündən ikisi - ABŞ və Böyük Britaniya birmənalı olaraq İsraili dəstəkləyir. Bu dövlətlər ənənəvi olaraq İsrailə qarşı qətnamələri Təhlükəsizlik Şurasında blok edirlər. BMT Baş Assambleyasının qəbul etdiyi qərarların isə icra mexanizmi yoxdur. Üçüncüsü, böyük dövlətlər arasında gedən geosiyasi mübarizə üzündən BMT nüfuzunu itirib. Artıq neçə illərdir BMT-nin dünyada gedən proseslərə təsiri qalmayıb. BMT qətnamələrini saya salan yoxdur. İranın istəyi ilə İsrailə qarşı Təhlükəsizlik Şurasının iclası çağırılsa belə, bu nəyisə dəyişməyəcək. Ona görə ki, İsrailə qarşı olan istənilən qərara ABŞ veto qoyacaq".
Vidadi ORDAHALLI
