Faiq Ələkbərli: "Yeni Kalendoniya prezidentinin atdığı bu səhv addım və sazişi ləğv etməsi kanak xalqının iradəsini əks etdirmir"
Fransa hökumətinin Yeni Kaledoniyada həyata keçirdiyi repressiyalar, basqılar, kanak xalqının başına gətirdiyi faciələr dünyaya məlumdur. Azərbaycan hər zaman öz humanistliyi ilə əzilən haqlı tərəflərin yanında olub.
Azərbaycanın kanak xalqının haqlı mübarizəsini dəstəkləməsi Makron hökumətini ciddi narahat edir. Müstəmləkəçiliyini qorumaq üçün Yeni Kaledoniyanın yeni seçilmiş prezidentinə təsir göstərməyə başlayıb.
Yayılan məlumata görə, Yeni Kaledoniya Konqresinin yeni seçilmiş prezidenti Veylma Falaeo aprel ayında Azərbaycan parlamenti ilə imzalanmış əməkdaşlıq sazişinin ləğv edildiyini bəyan edib.
O bildirib ki, bu sazişin artıq heç bir hüquqi qüvvəsi yoxdur.
Yeni prezident Azərbaycanın addımlarını Yeni Kaledoniyanın "işlərinə xarici müdaxilə kimi qiymətləndirib". Guya Azərbaycan Yeni Kalendoniyanın işinə müdaxilə edirmiş və Makronun bu adamı da gələn kimi Azərbaycan parlamenti ilə sazişi ləğv edib.
Qeyd edək ki, kanak xalqına qarşı Fransa hökumətinin törətdiyi qanlı hadisələr nəticəsində insanlara ciddi zərər dəyib, onların azadlıq mübarizəsi boğulub. Fransa hökuməti və onun Yeni Kalendoniyada prezident olan adamı iddia edirlər ki, Azərbaycan guya kanak xalqının işinə müdaxilə edir, halbuki, vəziyyət başqadır və proseslər Fransa tərəfindən təhrif edilir.
Erməni mediası yazır ki, "yeni seçilmiş prezident Veilma Falaeo müstəqilliyə nail olmaq səyləri çərçivəsində kanakın digər liderləri ilə birlikdə Azərbaycanla əlaqələri gücləndirən sələfi Roch Vamitanın siyasətini dəyişib".
Bildiyimiz kimi, kanak xalqının və Fransa müstəmləkəçiliyindən əziyyət çəkən bir sıra digər xalqların fransız müstəmləkəsindən azad olunması, tapdanan hüquqlarının bərpa edilməsi tələbi və onların nümayəndələrinin iştirakı ilə Bakı Təşəbbüs Qrupu tərəfindən bir neçə tədbir keçirilib. Bu tədbirlər vasitəsilə Fransa müstəmləkəsi altında inləyən xalqların səsi beynəlxalq aləmə çatdırılıb.
Aydın görsənir ki, Makron faktlarla, haqlı tələblərlə heç cür barışmaq istəmədiyi və müstəmləkəçiliyini Yeni Kalendoniyada davam etdirmək üçün bu ərazidə "dövlət çevrilişi" edib və hakimiyyətə öz adımını gətirərək, onu Azərbaycan parlamenti ilə konqresin bağladığı sazişi ləğv etməyə məcbur edib.
"Makron irticaçı və radikal addımlar ataraq, zor tətbiq edərək müstəqillik tərəfdarı olan prezidenti hakimiyyətdən uzaqlaşdırıb Yeni Kalendoniyaya mülayim və onun sözü ilə oturub-duran şəxsi prezident gətirdi"
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi şərhçi Faiq Ələkbərli "Bakı-Xəbər"ə bildirdi ki, Bakı Təşəbbüs Qrupunun kolonializmlə mübarizədə verdiyi mücadilə, gördüyü işlər misilsizdir və Makron hökumətinin hansı çirkin üsullara əl atmasından, kimi Yeni Kalendoniyada vəzifə başına gətirməsindən aslı olmayaraq mübarizə prosesi uğurla nəticələnəcək, müstəmləkədən əziyyət çəkən xalqlar müstəqillilk əldə edəcəklər. "Görünür ki, Makron çox ciddi şəkildə Yeni Kalendoniyaya təsir göstərir. Makronun Yeni Kalendoniyanın yeni prezidentinə çox ciddi təzyiqləri və təsirləri nəticəsində bu xoşagəlməz hal baş verib. Yeni Kalendoniyanın bundan əvvəlki rəhbəri daha çox müstəqilliyə can atırdı və müstəmləkəçiliyə qarşı idi. İndi Makron onun apardığı siyasəti dəyişdirib. Köhnə rəhbərlik xalqının azadılığa çıxmasına çalışırdı, irticaçı siyasət yürüdən Fransa hökumətini tənqid edirdi. Amma indiki prezident Fransa hökumətinin irticaçı siyasətinə münasibətdə daha yumşaq davranış göstərir. Azərbaycan parlamenti ilə Yeni Kolendoniya konqresi arasında bağlanan sazişi ləğv etməklə yeni prezident Makronun təsiri altında olduğunu göstərir. O saziş çərçivəsində kanak liderləri Bakıda tədbirlər keçirir, səslərini dünyaya yayırdılar. Amma bu saziş birtərəfli qaydada dayandırılıb. O sazişin ləğv edilməsi kanak xalqının azadlıq, müstəqillik uğrunda apardığı mübarizəyə böyük xəyanətdir. Fransa Yeni Kalendoniya prezidentinin müstəqillikdən tam olaraq əl çəkməyə, bu ərazinin Fransanın müstəmləkəsi kimi davam etməsinə səy göstərir.
Fransa müstəmləkəçilik siyasətini davam etdirmək üçün olduqca məkrli, irticaçı addımlar atır. Burda söhbət təkcə iqtisadi, siyasi məsələlərdən getmir, eyni zamanda hərbi amillərin işə düşməsindən, polis rejiminin gücləndirilməsindən gedir ki, bu da orada insanların kütləvi şəkildə öldürülməsi, repressiyalara məruz qalması deməkdir. Bunu Fransa mütəmadi olaraq kanak xalqına qarşı edir".
O hesab edir ki, Fransanın təzyiqi ilə Yeni Kalendoniyanın yeni prezidenti azadlıq, müstəqillik mübarizəsindən geri çəkilib. F.Ələkbərli hesab edir ki, bu müvəqqətidir. "Fransa hökumətinin ciddi təzyiqləri altında, daha dəhşətli radikal addımlar atması nəticəsində bu hal baş verib. Bu müəyyən müddət belə davam edə bilər, amma əbədi davam edə bilməz. Çünki kanak xalqı gec-tez Fransaya qarşı daha ciddi müqavimət göstərib müstəqilliklərini əldə edəcəklər. Ola bilsin, onlar indi bu təzyiqlərə görə müstəqillik məsələlərində geryə addım atırlar. Burda digər amillər də ola bilər. Bu heç də Yeni Kaledoniya xalqının öz müstəqilliyindən, azadlıq mübarizəsindən tam vaz keçməsi anlamına gələ bilməz. İndiki rəhbərlik ola bilsin, mülayim, yaxud mötədil mövqe tutur. Sonrakı dönəmdə nə baş verəcəyini növbəti mərhələdə görəcəyik. Kanaklar mütləq şəkildə Fransanın müstəmləkəçiliyinə son qoyacaqlar, öz azadlıqlarını əldə edəcəklər.
Yeni Kalendoniya prezidentinin atdığı bu səhv addım və sazişin ləğv etməsi kanak xalqının iradəsini əks etdirmir.
Makron irticaçı və radikal addımlar ataraq, zor tətbiq edərək müstəqillik tərəfdarı olan prezidenti hakimiyyətdən uzaqlaşdırıb Yeni Kaledoniyaya mülayim və onun sözü ilə oturub-duran şəxsi prezident gətirdi. Makron bunu etdi, onun bu siyasəti müəyyən bir müddətdə qüvvədə ola bilər. O Yeni Kalendoniyanın köhnə prezidentini devirib onun yerinə daha mülayim birini gətirməklə müstəmləkəçiliyini uzada bilməz, gec-tez kanaklar öz müstəqilliklərini əldə edəcəklər" - deyə F.Ələkbərli vurğuladı.
İradə SARIYEVA
