Tural İsmayılov: "Nikol Paşinyan bu cinayət işini qaldıraraq müxalifətə qarşı həbs dalğası başlada bilər"
Ermənistanda 1999-cu il oktyabrın 27-də törədilən cinayətin 25 ili tamam olur. 25 il əvvəl törədilən vəhşilik nəticəsində Ermənistan Milli Assambleyasının sədri Karen Dəmirçyan, Ermənistanın baş naziri Vazgen Sarkisyan, parlamentin vitse-spikerləri Yuri Baxşyan və Ruben Miroyan, deputatlar Armenak Armenakyan, Henrik Abramyan, Mikael Kotanyan və əməliyyatlar naziri Leonard Petrosyan öldürüldü (sonuncu əslində baş nazirin müavini vəzifəsini icra edən).
Ermənistan parlamentinə hücum edən silahlı şəxslər Nairi Hunanyan, Karen Hunanyan, Eduard Qriqoryan, Vram Qalstyan və Derenik Becanyan olub.
27 oktyabr aksiyalarına Nairi Hunanyan rəhbərlik edirdi. Hunanyan daha sonra ifadə verərək 1991-ci ildə dövlət səviyyəsində terror planları hazırladığını, lakin şəraitə görə onları həyata keçirə bilmədiyini bildirib.
Qeyd edək ki, "27 oktyabr" işi üzrə hökm 2003-cü il dekabrın 2-də dərc olunub.
Məhkəmənin qərarı ilə 6 nəfər ömürlük, daha bir nəfər isə 14 il müddətinə azadlıqdan məhrum edilib.
Altı müttəhim, o cümlədən onların lideri Nairi Hunanyan, onun qardaşı Karen Hunanyan, əmisi oğlu Vram Qalstyan, həmçinin Derenik Becanyan, Edik Qriqoryan və Aşot Knyazyan ömürlük həbs cəzasına məhkum ediliblər. Hamlet Stepanyan 14 il müddətinə azadlıqdan məhrum edilib.
Ömürlük azadlıqdan məhrum edilənlərdən Nairi və Karen Hunanyan, Derenik Becanyan və Aşot Knyazyan hələ də sağdır. Vram Qalstyan, rəsmi versiyaya görə, 2004-cü il aprelin 27-də Nubaraşen cəzaçəkmə müəssisəsində bir nəfərlik kamerada intihar edib.
14 il azadlıqdan məhrum edilən Hamlet Stepanyan 2010-cu ilin mayında infarktdan vəfat edib.
Bu iş üzrə digər məhbus Norayr Yeqiazaryan isə Nubaraşen cəzaçəkmə müəssisəsində hökm elan olunmazdan əvvəl elektrik cərəyanı vurmasından ölüb.
Eduard Qriqoryan 2017-ci il noyabrın 3-də Erebuni tibb mərkəzində vəfat edib. Bu iş üzrə təqsirləndirilən şəxslər Ermənistan Respublikası Cinayət Məcəlləsinin aşağıdakı maddələri ilə təqsirli biliniblər: 300 - Dövlət hakimiyyətini qəsb etmə, 305 - Dövlət xadimini, siyasi və ya ictimai xadimi öldürmə, 34-305 - hakimiyyəti qəsb etməyə cəhd, 217 - Terrorizm, 133 - Qanunsuz həbs, 235 - Qanunsuz olaraq silah əldə etmə, istifadə etmə, gəzdirmə.
Ermənistanın baş naziri Nikol Paşinyan, respublika prezidenti Vaaqn Xaçaturyan və Ermənistan parlamentinin sədri Alen Simonyan Ermənistan Milli Assambleyasının həyətindəki 27 oktyabr 1999-cu ildə törədilmiş cinayətin qurbanı olan dövlət xadimlərinin şərəfinə ucaldılmış abidə önünə gül dəstələri qoyub, respublikanın dövlət və siyasi xadimlərinin xatirəsini ehtiramla yad ediblər. Nikol Paşinyan törən zamanı deyib ki, biz 27 oktyabr 1999-cu il cinayəti qurbanlarının xatirəsini ehtiramla yad etdik.
Əvvəldən ehtimal edilirdi ki, bu terror hücumunun arxasında Rusiya dayanır və bu, Azərbaycan-Ermənistan münasibətlərindəki normallaşmanı hədəfə almışdı. İndi görəsən Rusiya ilə konfrontasiyada olan Nikol Paşinyan bu cinayətin axıra qədər araşdırılmasını təmin etməkdə maraqlı olacaqmı?
Sualımızı cavablandıran politoloq Tural İsmayılov bildirdi ki, hazırkı Ermənistan hakimiyyətinin 27 oktyabr terrorunun əsl səbəbinin üstünü aça biləcəyinə inanmır: "Ümumiyyətlə, bu hadisənin özü də göstərir ki, Ermənistan real olaraq müstəqil dövlət deyil və xarici güc faktorlarından asılıdır. Bu, xarici güclərin hər zaman Ermənistanda qarışıqlıq salmaq potensialının daha bir nümunəsidir. Paşinyan hakimiyyəti 27 oktyabr gülləbaranı qurbanlarını yad etsə də, bu cinayət işinin açılmasında o qədər də maraqlı deyil. Əslində Nikol Paşinyan bu cinayət işini qaldıraraq özündən əvvəlki hökumətlərin nümayəndələrinə - müxalifətə qarşi həbs dalğası başlada bilər. Amma yuxarıda qeyd etdiyim kimi, cinayətin arxasında xarici güc faktorunun olması onun sonadək araşdırılmasına imkan verməyəcək. Yəni düşünmürəm ki, indiki hakimiyyət bu cinayətin açılmasına hansısa bir töhfə verə bilər".
Doğrudan da, bu gün Ermənistan iqtisadiyyatının Rusiyadan ciddi bəhrələndiyi, hakimiyyətin Moskvaya qarşi ehtiyatla davrandığı bir vaxtda kökü Rusiyaya gedib çıxa bilən cinayət işinin sonadək araşdırılması Paşinyan hakimiyyətinə yalnız başağrısı gətirə bilər. Amma bundan istifadə edib müxalifəti bir qədər də zəiflətmək olar...
Dəniz NƏSİRLİ
