Elşad Həsənov: "Həqiqətən də İranla İsrail arasında razılaşdırılmış bir oyun gedir"
Məlum olduğu kimi, oktyabrın 26-na keçən gecə İsrail İrana çoxsaylı raket hücumları həyata keçirib və bununla da bu ayın əvvəlində İslam Respublikasının kütləvi hücumuna cavab verib. İsrail Müdafiə Qüvvələri İranın raket istehsal edən obyektlərinə, eləcə də raket sistemlərinə zərbələr endirib. İsrail Hərbi Hava Qüvvələri İrana gecə hücumu zamanı 100-dən çox təyyarədən istifadə edib.
Ancaq proseslərin gedişinə baxanda görürük ki, sanki ortada bir razılaşma var. Yəni məhdud miqyaslı bir zərbə endirəcəyik və bununla da məsələ bitəcək. Məsələ ondadır ki, oktyabrın 1-də İran İsraili vurub. Ayın 26-da da İsrail İranı vurdu. İsrail bəyan etdi ki, İranı 3 saat bombalayıb. Ancaq İranda çox adamın heç bundan xəbəri yox idi və üstəlik, ilkin olaraq Tehran bu barədə çox az məlumat verdi. Sanki gizlətməyə çalışırdılar. Yalnız 2 əsgərin ölümündən sonra etiraf etməyə başladılar. Hücumdan sonra İranın hava məkanı bağlandı, təyyarə uçuşları dayandırıldı. Bombardmanlardan sonra İsrail bəyan etdi ki, əməliyyatlar dayandırıldı, qarşıya qoyulan missiya yerinə yetirildi. Bu açıqlamadan dərhal sonra İran daxildə təyyarə reyslərini bərpa etdi. Sanki İsrailin bu açıqlamasını gözləyirdilər. İndi də İranın dini lideri Ayətullah Əli Xamnei bəyan edir ki, İsrailin vurduğu zərbələri nə şişirtmək, nə də kiçiltmək lazımdır. Bu nə reaksiyadır? Görünən odur ki, ortada sanki bir razılaşma var. O mənada ki, oktyabrın 1-də İran İsrailə zərbə vurmuşdu. Ona cavab olaraq İsrail zərbə vursun və bununla da məsələ bitsin. O baxımdan İranla İsrail arasında son bir ayda qarşılıqlı bonbardmanın arxasında sanki bir razılaşma var. Sanki hər iki tərəf qabaqcadan razılaşaraq bunun məhdud miqyasda keçirilməsini istəyir və bununla da məsələ bitdi. Çünki prosesin qəribə formada baş verməsi və bir sıra qeyri-müəyyənliklər bu qənaətə gəlməyə əsas verir.
"Qəribə olan həm də odur ki, İranın hava hücumundan müdafiə vasitələri çox passiv idi"
Sözügedən məsələni "Bakı-Xəbər"ə şərh edən siyasi ekspert Elşad Həsənov hesab edir ki, həqiqətən də İranla İsrail arasında razılaşdırılmış bir oyun gedir: "Dünya ictimaiyyətinə göstərmək üçün oktyabrın 1-də İran raket və dronlarla İsrailə hücum etdi. Ancaq İranın bu hücumunun elə bir ciddi zərəri olmadı. Çünki İsrail qabaqcadan bunu bilirdi və buna hazır idi. Bu səbəbdən İrandan atılan raket və dronların 99 faizi zərərsizləşdirildi. İran raketlərinin bir çoxu İordaniya üzərində zərərsizləşdirildi və bu işdə Birləşmiş Ştatlar da İsrailə yardım etdi. İsrail buna cavab olaraq bildirdi ki, İranın hərbi obyektlərini darmadağın edəcək. Ancaq ABŞ buna mane oldu və bildirdi ki, neft, nüvə obyektlərini vurmaq olmaz. Elə bundan sonra 26 oktyabrda İsrail İrana hava hücumu edərkən yalnız hərbi obyektləri vurdu. Halbuki, İsrail politoloqları bəyan edirdilər ki, İran nüvə silahına malikdir. Həmin obyektləri də İsrail vura bilməz. Ona görə ki, həmin obyektlər dağların altındadır və betonlanıb. Bunu yalnız ABŞ-ın xüsusi bombaları ilə etmək mümkündür. Buna da ABŞ icazə vermədi. Baxmayaraq ki, yaxın strateji tərəfdaşdılar. İran sərt cavab verəcəyini bəyan etsə də, bu, söz oyunundan başqa bir şey deyil. İsrail İrana zərbə vursa da, bu elə də böyük miqyasda olmadı. Üstəlik, bəlli deyil ki, İsrailin zərbələri İranın hərbi sənayesinə nə dərəcədə zərər vurub. Sadəcə olaraq görünən odur ki, razılaşdırılmış oyun gedir. Qəribə olan həm də odur ki, İranın hava hücumundan müdafiə vasitələri çox passiv idi. Halbuki, Rusiya kəşfiyyatı hücumun olacağı ilə bağlı İranı xəbərdar edib. Ona görə də bu məsələdə şübhəli məqamlar çoxdur".
Vidadi ORDAHALLI
